១-៦០. សកិំសម្មជ្ជកត្ថេរអបទានាទិវណ្ណនា

1-60. Sakiṃsammajjakattheraapadānādivaṇṇanā

តេចត្តាលីសមវគ្គេ សព្ពថេរាបទានានិ ឧត្តានានេវ។ កេវលំ ថេរានំ នាមនានត្តំ បុញ្ញនានត្តញ្ច វិសេសោ។

Tecattālīsamavagge sabbatherāpadānāni uttānāneva. Kevalaṃ therānaṃ nāmanānattaṃ puññanānattañca viseso.

ចតុចត្តាលីសមេ វគ្គេបិ សព្ពានិ អបទានានិ បាកដានេវ។ កេវលំ បុញ្ញនានត្តំ ផលនានត្តញ្ច វិសេសោ។

Catucattālīsame vaggepi sabbāni apadānāni pākaṭāneva. Kevalaṃ puññanānattaṃ phalanānattañca viseso.

១. បញ្ចចត្តាលីសមវគ្គេ បឋមាបទានេ កកុសន្ធោ មហាវីរោតិអាទិកំ អាយស្មតោ វិភីដកមិញ្ជិយត្ថេរស្ស អបទានំ។

1. Pañcacattālīsamavagge paṭhamāpadāne kakusandho mahāvīrotiādikaṃ āyasmato vibhīṭakamiñjiyattherassa apadānaṃ.

២. តត្ថ ពីជមិញ្ជមទាសហន្តិ វិភីដកផលានិ ផាលេត្វា ពីជានិ មិញ្ជានិ គហេត្វា មធុសក្ករាហិ យោជេត្វា កកុសន្ធស្ស ភគវតោ អទាសិន្តិ អត្ថោ។ ទុតិយាបទានាទីនិ សព្ពានិ សុវិញ្ញេយ្យានេវ, ថេរានំ នាមនានត្តាទីនិបិ បាឋានុសារេន វេទិតព្ពានិ។

2. Tattha bījamiñjamadāsahanti vibhīṭakaphalāni phāletvā bījāni miñjāni gahetvā madhusakkarāhi yojetvā kakusandhassa bhagavato adāsinti attho. Dutiyāpadānādīni sabbāni suviññeyyāneva, therānaṃ nāmanānattādīnipi pāṭhānusārena veditabbāni.

១. ឆចត្តាលីសមេ វគ្គេ បឋមាបទានេ ជគតិំ ការយិំ អហន្តិ ឧត្តមពោធិរុក្ខស្ស សមន្តតោ អាឡិន្ទំ អហំ ការយិន្តិ អត្ថោ។ សេសានិ ទុតិយាបទានាទីនិ សព្ពានិបិ ឧត្តានានេវ។

1. Chacattālīsame vagge paṭhamāpadāne jagatiṃ kārayiṃ ahanti uttamabodhirukkhassa samantato āḷindaṃ ahaṃ kārayinti attho. Sesāni dutiyāpadānādīni sabbānipi uttānāneva.

សត្តចត្តាលីសមេ វគ្គេ បឋមាបទានាទីនិ បាឡិអនុសារេន សុវិញ្ញេយ្យានេវ។

Sattacattālīsame vagge paṭhamāpadānādīni pāḷianusārena suviññeyyāneva.

អដ្ឋចត្តាលីសមេ វគ្គេ បឋមទុតិយាបទានានិ ឧត្តានានេវ។

Aṭṭhacattālīsame vagge paṭhamadutiyāpadānāni uttānāneva.

៣០. តតិយាបទានេ កោសិយោ នាម ភគវាតិ កោសិយគោត្តេ ជាតត្តា កោសិយោ នាម បច្ចេកពុទ្ធោតិ អត្ថោ។ ចិត្តកូដេតិ ចិត្តកូដកេលាសកូដសានុកូដាទីសុ អនោតត្តទហំ បដិច្ឆាទេត្វា ឋិតបព្ពតកូដេសុ នានារតនឱសធាទីហិ វិចិត្តេ ចិត្តកូដបព្ពតេ សោ បច្ចេកពុទ្ធោ វសីតិ អត្ថោ។

30. Tatiyāpadāne kosiyo nāma bhagavāti kosiyagotte jātattā kosiyo nāma paccekabuddhoti attho. Cittakūṭeti cittakūṭakelāsakūṭasānukūṭādīsu anotattadahaṃ paṭicchādetvā ṭhitapabbatakūṭesu nānāratanaosadhādīhi vicitte cittakūṭapabbate so paccekabuddho vasīti attho.

ចតុត្ថបញ្ចមាបទានានិ ឧត្តានានេវ។

Catutthapañcamāpadānāni uttānāneva.

៥៦. ឆដ្ឋាបទានេ កុសដ្ឋកមទាសហន្តិ បក្ខិកភត្តឧបោសថិកភត្តធុរភត្តសលាកភត្តាទីសុ កុសបណ្ណវសេន ទាតព្ពំ អដ្ឋសលាកភត្តំ អហំ អទាសិន្តិ អត្ថោ។

56. Chaṭṭhāpadāne kusaṭṭhakamadāsahanti pakkhikabhattauposathikabhattadhurabhattasalākabhattādīsu kusapaṇṇavasena dātabbaṃ aṭṭhasalākabhattaṃ ahaṃ adāsinti attho.

៦១. សត្តមាបទានេ សោភិតោ នាម សម្ពុទ្ធោតិ អារោហបរិណាហទ្វត្តិំសមហាបុរិសលក្ខណព្យាមប្បភាទីហិ សោភមានសរីរត្តា សោភិតោ នាម សម្មាសម្ពុទ្ធោតិ អត្ថោ។

61. Sattamāpadāne sobhito nāma sambuddhoti ārohapariṇāhadvattiṃsamahāpurisalakkhaṇabyāmappabhādīhi sobhamānasarīrattā sobhito nāma sammāsambuddhoti attho.

៦៦. អដ្ឋមាបទានេ តក្ករាយំ វសី តទាតិ តំ ទសបុញ្ញកិរិយវត្ថុំ ករោន្តា ជនា បដិវសន្តិ ឯត្ថាតិ តក្ករា, រាជធានី។ តិស្សំ តក្ករាយំ, តទា វសីតិ អត្ថោ។

66. Aṭṭhamāpadāne takkarāyaṃ vasī tadāti taṃ dasapuññakiriyavatthuṃ karontā janā paṭivasanti etthāti takkarā, rājadhānī. Tissaṃ takkarāyaṃ, tadā vasīti attho.

៧២. នវមាបទានេ បានធិំ សុកតំ គយ្ហាតិ ឧបាហនយុគំ សុន្ទរាការេន និប្ផាទិតំ គហេត្វាតិ អត្ថោ។ ទសមាបទានំ សុវិញ្ញេយ្យមេវាតិ។

72. Navamāpadāne pānadhiṃ sukataṃ gayhāti upāhanayugaṃ sundarākārena nipphāditaṃ gahetvāti attho. Dasamāpadānaṃ suviññeyyamevāti.

អដ្ឋចត្តាលីសមវគ្គវណ្ណនា និដ្ឋិតា។

Aṭṭhacattālīsamavaggavaṇṇanā niṭṭhitā.

Next: ៤៩. បំសុកូលវគ្គោ • 49. Paṃsukūlavaggo

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact