| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២. ឯកទុស្សទាយកត្ថេរអបទានំ
2. Ekadussadāyakattheraapadānaṃ
១៥.
15.
‘‘នគរេ ហំសវតិយា, អហោសិំ តិណហារកោ;
‘‘Nagare haṃsavatiyā, ahosiṃ tiṇahārako;
តិណហារេន ជីវាមិ, តេន បោសេមិ ទារកេ។
Tiṇahārena jīvāmi, tena posemi dārake.
១៦.
16.
‘‘បទុមុត្តរោ នាម ជិនោ, សព្ពធម្មាន បារគូ;
‘‘Padumuttaro nāma jino, sabbadhammāna pāragū;
តមន្ធការំ នាសេត្វា, ឧប្បជ្ជិ លោកនាយកោ។
Tamandhakāraṃ nāsetvā, uppajji lokanāyako.
១៧.
17.
‘‘សកេ ឃរេ និសីទិត្វា, ឯវំ ចិន្តេសិ តាវទេ;
‘‘Sake ghare nisīditvā, evaṃ cintesi tāvade;
‘ពុទ្ធោ លោកេ សមុប្បន្នោ, ទេយ្យធម្មោ ន វិជ្ជតិ។
‘Buddho loke samuppanno, deyyadhammo na vijjati.
១៨.
18.
‘‘‘ឥទំ មេ សាដកំ ឯកំ, នត្ថិ មេ កោចិ ទាយកោ;
‘‘‘Idaṃ me sāṭakaṃ ekaṃ, natthi me koci dāyako;
ទុក្ខោ និរយសម្ផស្សោ, រោបយិស្សាមិ ទក្ខិណំ’។
Dukkho nirayasamphasso, ropayissāmi dakkhiṇaṃ’.
១៩.
19.
‘‘ឯវាហំ ចិន្តយិត្វាន, សកំ ចិត្តំ បសាទយិំ;
‘‘Evāhaṃ cintayitvāna, sakaṃ cittaṃ pasādayiṃ;
ឯកំ ទុស្សំ គហេត្វាន, ពុទ្ធសេដ្ឋស្សទាសហំ។
Ekaṃ dussaṃ gahetvāna, buddhaseṭṭhassadāsahaṃ.
២០.
20.
‘‘ឯកំ ទុស្សំ ទទិត្វាន, ឧក្កុដ្ឋិំ សម្បវត្តយិំ;
‘‘Ekaṃ dussaṃ daditvāna, ukkuṭṭhiṃ sampavattayiṃ;
‘យទិ ពុទ្ធោ តុវំ វីរ, តារេហិ មំ មហាមុនិ’។
‘Yadi buddho tuvaṃ vīra, tārehi maṃ mahāmuni’.
២១.
21.
‘‘បទុមុត្តរោ លោកវិទូ, អាហុតីនំ បដិគ្គហោ;
‘‘Padumuttaro lokavidū, āhutīnaṃ paṭiggaho;
មម ទានំ បកិត្តេន្តោ, អកា មេ អនុមោទនំ។
Mama dānaṃ pakittento, akā me anumodanaṃ.
២២.
22.
‘‘‘ឥមិនា ឯកទុស្សេន, ចេតនាបណិធីហិ ច;
‘‘‘Iminā ekadussena, cetanāpaṇidhīhi ca;
កប្បសតសហស្សានិ, វិនិបាតំ ន គច្ឆសិ។
Kappasatasahassāni, vinipātaṃ na gacchasi.
២៣.
23.
‘‘‘ឆត្តិំសក្ខត្តុំ ទេវិន្ទោ, ទេវរជ្ជំ ករិស្សសិ;
‘‘‘Chattiṃsakkhattuṃ devindo, devarajjaṃ karissasi;
២៤.
24.
ទេវលោកេ មនុស្សេ វា, សំសរន្តោ តុវំ ភវេ។
Devaloke manusse vā, saṃsaranto tuvaṃ bhave.
២៥.
25.
អក្ខោភំ អមិតំ ទុស្សំ, លភិស្សសិ យទិច្ឆកំ’។
Akkhobhaṃ amitaṃ dussaṃ, labhissasi yadicchakaṃ’.
២៦.
26.
‘‘ឥទំ វត្វាន សម្ពុទ្ធោ, ជលជុត្តមនាមកោ;
‘‘Idaṃ vatvāna sambuddho, jalajuttamanāmako;
២៧.
27.
‘‘យំ យំ យោនុបបជ្ជាមិ, ទេវត្តំ អថ មានុសំ;
‘‘Yaṃ yaṃ yonupapajjāmi, devattaṃ atha mānusaṃ;
ភោគេ មេ ឩនតា នត្ថិ, ឯកទុស្សស្សិទំ ផលំ។
Bhoge me ūnatā natthi, ekadussassidaṃ phalaṃ.
២៨.
28.
‘‘បទុទ្ធារេ បទុទ្ធារេ, ទុស្សំ និព្ពត្តតេ មមំ;
‘‘Paduddhāre paduddhāre, dussaṃ nibbattate mamaṃ;
ហេដ្ឋា ទុស្សម្ហិ តិដ្ឋាមិ, ឧបរិច្ឆទនំ មម។
Heṭṭhā dussamhi tiṭṭhāmi, uparicchadanaṃ mama.
២៩.
29.
‘‘ចក្កវាឡំ ឧបាទាយ, សកាននំ សបព្ពតំ;
‘‘Cakkavāḷaṃ upādāya, sakānanaṃ sapabbataṃ;
ឥច្ឆមានោ ចហំ អជ្ជ, ទុស្សេហច្ឆាទយេយ្យ តំ។
Icchamāno cahaṃ ajja, dussehacchādayeyya taṃ.
៣០.
30.
‘‘តេនេវ ឯកទុស្សេន, សំសរន្តោ ភវាភវេ;
‘‘Teneva ekadussena, saṃsaranto bhavābhave;
សុវណ្ណវណ្ណោ ហុត្វាន, សំសរាមិ ភវាភវេ។
Suvaṇṇavaṇṇo hutvāna, saṃsarāmi bhavābhave.
៣១.
31.
‘‘វិបាកំ វិឯកទុស្សស្ស, នាជ្ឈគំ កត្ថចិក្ខយំ;
‘‘Vipākaṃ viekadussassa, nājjhagaṃ katthacikkhayaṃ;
អយំ មេ អន្តិមា ជាតិ, វិបច្ចតិ ឥធាបិ មេ។
Ayaṃ me antimā jāti, vipaccati idhāpi me.
៣២.
32.
‘‘សតសហស្សិតោ កប្បេ, យំ ទុស្សមទទិំ តទា;
‘‘Satasahassito kappe, yaṃ dussamadadiṃ tadā;
ទុគ្គតិំ នាភិជានាមិ, ឯកទុស្សស្សិទំ ផលំ។
Duggatiṃ nābhijānāmi, ekadussassidaṃ phalaṃ.
៣៣.
33.
‘‘កិលេសា ឈាបិតា មយ្ហំ…បេ.… វិហរាមិ អនាសវោ។
‘‘Kilesā jhāpitā mayhaṃ…pe… viharāmi anāsavo.
៣៤.
34.
‘‘ស្វាគតំ វត មេ អាសិ…បេ.… កតំ ពុទ្ធស្ស សាសនំ។
‘‘Svāgataṃ vata me āsi…pe… kataṃ buddhassa sāsanaṃ.
៣៥.
35.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ឯកទុស្សទាយកោ ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā ekadussadāyako thero imā gāthāyo abhāsitthāti;
ឯកទុស្សទាយកត្ថេរស្សាបទានំ ទុតិយំ។
Ekadussadāyakattherassāpadānaṃ dutiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ១-៦០. សកិំសម្មជ្ជកត្ថេរអបទានាទិវណ្ណនា • 1-60. Sakiṃsammajjakattheraapadānādivaṇṇanā
