| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. ពោធិឃរទាយកត្ថេរអបទានំ
10. Bodhigharadāyakattheraapadānaṃ
៦៩.
69.
‘‘សិទ្ធត្ថស្ស ភគវតោ, ទ្វិបទិន្ទស្ស តាទិនោ;
‘‘Siddhatthassa bhagavato, dvipadindassa tādino;
បសន្នចិត្តោ សុមនោ, ពោធិឃរមការយិំ។
Pasannacitto sumano, bodhigharamakārayiṃ.
៧០.
70.
‘‘តុសិតំ ឧបបន្នោម្ហិ, វសាមិ រតនេ ឃរេ;
‘‘Tusitaṃ upapannomhi, vasāmi ratane ghare;
ន មេ សីតំ វា ឧណ្ហំ វា, វាតោ គត្តេ ន សម្ផុសេ។
Na me sītaṃ vā uṇhaṃ vā, vāto gatte na samphuse.
៧១.
71.
‘‘បញ្ចសដ្ឋិម្ហិតោ កប្បេ, ចក្កវត្តី អហោសហំ;
‘‘Pañcasaṭṭhimhito kappe, cakkavattī ahosahaṃ;
៧២.
72.
‘‘ទសយោជនអាយាមំ, អដ្ឋយោជនវិត្ថតំ;
‘‘Dasayojanaāyāmaṃ, aṭṭhayojanavitthataṃ;
ន តម្ហិ នគរេ អត្ថិ, កដ្ឋំ វល្លី ច មត្តិកា។
Na tamhi nagare atthi, kaṭṭhaṃ vallī ca mattikā.
៧៣.
73.
‘‘តិរិយំ យោជនំ អាសិ, អទ្ធយោជនវិត្ថតំ;
‘‘Tiriyaṃ yojanaṃ āsi, addhayojanavitthataṃ;
មង្គលោ នាម បាសាទោ, វិស្សកម្មេន មាបិតោ។
Maṅgalo nāma pāsādo, vissakammena māpito.
៧៤.
74.
‘‘ចុល្លាសីតិសហស្សានិ, ថម្ភា សោណ្ណមយា អហុំ;
‘‘Cullāsītisahassāni, thambhā soṇṇamayā ahuṃ;
មណិមយា ច និយ្យូហា, ឆទនំ រូបិយំ អហុ។
Maṇimayā ca niyyūhā, chadanaṃ rūpiyaṃ ahu.
៧៥.
75.
‘‘សព្ពសោណ្ណមយំ ឃរំ, វិស្សកម្មេន មាបិតំ;
‘‘Sabbasoṇṇamayaṃ gharaṃ, vissakammena māpitaṃ;
អជ្ឈាវុត្ថំ មយា ឯតំ, ឃរទានស្សិទំ ផលំ។
Ajjhāvutthaṃ mayā etaṃ, gharadānassidaṃ phalaṃ.
៧៦.
76.
‘‘តេ សព្ពេ អនុភោត្វាន, ទេវមានុសកេ ភវេ;
‘‘Te sabbe anubhotvāna, devamānusake bhave;
អជ្ឈបត្តោម្ហិ និព្ពានំ, សន្តិបទមនុត្តរំ។
Ajjhapattomhi nibbānaṃ, santipadamanuttaraṃ.
៧៧.
77.
‘‘តិំសកប្បសហស្សម្ហិ, ពោធិឃរមការយិំ;
‘‘Tiṃsakappasahassamhi, bodhigharamakārayiṃ;
ទុគ្គតិំ នាភិជានាមិ, ឃរទានស្សិទំ ផលំ។
Duggatiṃ nābhijānāmi, gharadānassidaṃ phalaṃ.
៧៨.
78.
‘‘កិលេសា ឈាបិតា មយ្ហំ…បេ.… វិហរាមិ អនាសវោ។
‘‘Kilesā jhāpitā mayhaṃ…pe… viharāmi anāsavo.
៧៩.
79.
‘‘ស្វាគតំ វត មេ អាសិ…បេ.… កតំ ពុទ្ធស្ស សាសនំ។
‘‘Svāgataṃ vata me āsi…pe… kataṃ buddhassa sāsanaṃ.
៨០.
80.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ពោធិឃរទាយកោ ថេរោ ឥមា គាថាយោ
Itthaṃ sudaṃ āyasmā bodhigharadāyako thero imā gāthāyo
អភាសិត្ថាតិ។
Abhāsitthāti.
ពោធិឃរទាយកត្ថេរស្សាបទានំ ទសមំ។
Bodhigharadāyakattherassāpadānaṃ dasamaṃ.
វិភីតកវគ្គោ បញ្ចចត្តាលីសមោ។
Vibhītakavaggo pañcacattālīsamo.
តស្សុទ្ទានំ –
Tassuddānaṃ –
វិភីតកី កោលផលី, ពិល្លភល្លាតកប្បទោ;
Vibhītakī kolaphalī, billabhallātakappado;
ឧត្តលម្ពដកី ចេវ, អាសនី បាទបីឋកោ។
Uttalambaṭakī ceva, āsanī pādapīṭhako.
វេទិកោ ពោធិឃរិកោ, គាថាយោ គណិតាបិ ច;
Vediko bodhighariko, gāthāyo gaṇitāpi ca;
ឯកូនាសីតិកា សព្ពា, អស្មិំ វគ្គេ បកិត្តិតា។
Ekūnāsītikā sabbā, asmiṃ vagge pakittitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ១-៦០. សកិំសម្មជ្ជកត្ថេរអបទានាទិវណ្ណនា • 1-60. Sakiṃsammajjakattheraapadānādivaṇṇanā
