១. លសុណវគ្គោ

1. Lasuṇavaggo

១. បឋមលសុណាទិសិក្ខាបទវណ្ណនា

1. Paṭhamalasuṇādisikkhāpadavaṇṇanā

៧៩៧. បាចិត្តិយេសុ លសុណវគ្គស្ស បឋមេ ពទរសាឡវំ នាម ពទរផលានិ សុក្ខាបេត្វា តេហិ កត្តព្ពព្យញ្ជនវិកតិ។ អាមកមាគធលសុណញ្ចេវ, អជ្ឈោហរណញ្ចាតិ ទ្វេ អង្គានិ។

797. Pācittiyesu lasuṇavaggassa paṭhame badarasāḷavaṃ nāma badaraphalāni sukkhāpetvā tehi kattabbabyañjanavikati. Āmakamāgadhalasuṇañceva, ajjhoharaṇañcāti dve aṅgāni.

៧៩៩-៨១២. ទុតិយាទីនិ ឧត្តានត្ថានិ។

799-812. Dutiyādīni uttānatthāni.

៨១៥. ឆដ្ឋេ បាឡិយំ អាសុម្ភិត្វាតិ បាតេត្វា។

815. Chaṭṭhe pāḷiyaṃ āsumbhitvāti pātetvā.

៨១៧. ទធិមត្ថូតិ ទធិម្ហិ បសន្នោទកំ។ រសខីរាទីនន្តិ មំសរសខីរាទីនំ។ ភុញ្ជន្តស្ស ភិក្ខុនោ ហត្ថបាសេ ឋានំ, បានីយស្ស វា វិធូបនស្ស វា គហណន្តិ ទ្វេ អង្គានិ។

817.Dadhimatthūti dadhimhi pasannodakaṃ. Rasakhīrādīnanti maṃsarasakhīrādīnaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti dve aṅgāni.

៨២២. សត្តមេ អវិញ្ញត្តិយា លទ្ធន្តិ អត្តនោ វិញ្ញត្តិំ វិនា លទ្ធំ។ បុព្ពាបរវិរុទ្ធន្តិ សយំ ករណេ បាចិត្តិយន្តិ ឥទំ ការាបនេ ទុក្កដវចនេន វិរុជ្ឈនំ សន្ធាយ វុត្តំ។ តេនាហ ‘‘ន ហី’’តិអាទិ, ‘‘អវិញ្ញត្តិយា លទ្ធ’’ន្តិអាទិវចនេន វា វិរុជ្ឈនំ សន្ធាយ វុត្តំ។ អញ្ញាយ វិញ្ញត្តិបិ ហិ ឥមិស្សា អវិញ្ញត្តិយា លទ្ធមេវាតិ។ អាមកធញ្ញវិញ្ញាបនាទិ, តំ ភជ្ជនាទិនា អជ្ឈោហរណន្តិ ទ្វេ អង្គានិ។

822. Sattame aviññattiyā laddhanti attano viññattiṃ vinā laddhaṃ. Pubbāparaviruddhanti sayaṃ karaṇe pācittiyanti idaṃ kārāpane dukkaṭavacanena virujjhanaṃ sandhāya vuttaṃ. Tenāha ‘‘na hī’’tiādi, ‘‘aviññattiyā laddha’’ntiādivacanena vā virujjhanaṃ sandhāya vuttaṃ. Aññāya viññattipi hi imissā aviññattiyā laddhamevāti. Āmakadhaññaviññāpanādi, taṃ bhajjanādinā ajjhoharaṇanti dve aṅgāni.

៨២៤. អដ្ឋមេ និព្ពិដ្ឋោតិ លទ្ធោ។ កេណីតិ រញ្ញោ ទាតព្ពោ អាយោ, អាយុប្បត្តិដ្ឋានន្តិ អត្ថោ ។ តេនាហ ‘‘ឯកំ ឋានន្តរ’’ន្តិអាទិ។ ឋានន្តរន្តិ ច គាមជនបទាណាយត្តំ។ វឡញ្ជិយមានតិរោកុដ្ដាទិតា, អនបលោកេត្វា ឧច្ចារាទីនំ ឆឌ្ឌនាទីតិ ទ្វេ អង្គានិ។

824. Aṭṭhame nibbiṭṭhoti laddho. Keṇīti rañño dātabbo āyo, āyuppattiṭṭhānanti attho . Tenāha ‘‘ekaṃ ṭhānantara’’ntiādi. Ṭhānantaranti ca gāmajanapadāṇāyattaṃ. Vaḷañjiyamānatirokuṭṭāditā, anapaloketvā uccārādīnaṃ chaḍḍanādīti dve aṅgāni.

៨៣០. នវមេ ‘‘មត្ថកច្ឆិន្ននាឡិកេរម្បី’’តិ វុត្តត្តា ហរិតូបរិ ឆឌ្ឌនមេវ បដិក្ខិត្តំ។ តេនាហ ‘‘អនិក្ខិត្តពីជេសូ’’តិអាទិ។ យត្ថ ច ឆឌ្ឌេតុំ វដ្ដតិ, តត្ថ ហរិតេ វច្ចាទិំ កាតុម្បិ វដ្ដតិ ឯវ។ សព្ពេសន្តិ ភិក្ខុភិក្ខុនីនំ។

830. Navame ‘‘matthakacchinnanāḷikerampī’’ti vuttattā haritūpari chaḍḍanameva paṭikkhittaṃ. Tenāha ‘‘anikkhittabījesū’’tiādi. Yattha ca chaḍḍetuṃ vaṭṭati, tattha harite vaccādiṃ kātumpi vaṭṭati eva. Sabbesanti bhikkhubhikkhunīnaṃ.

៨៣៦-៧. ទសមេ តេសំយេវាតិ យេសំ និច្ចំ បស្សតិ។ អារាមេ ឋត្វាតិ ឋិតនិសន្នដ្ឋានេ ឯវ ឋត្វា សមន្តតោ គីវំ បរិវត្តេត្វាបិ បស្សតិ, អនាបត្តិ។ ឋិតដ្ឋានតោ គន្ត្វា បស្សិតុំ ន វដ្ដតិ។ កេចិ បន ‘‘វដ្ដតី’’តិ វទន្តិ។ តំ បន ‘‘ទស្សនាយ គច្ឆេយ្យ, បាចិត្តិយ’’ន្តិ សាមញ្ញតោ គមនស្ស បដិក្ខិត្តត្តា, អនាបត្តិយម្បិ គមនាយ អវុត្តត្តា ច ន គហេតព្ពំ។ នច្ចាទិតា, អននុញ្ញាតការណា គមនំ, ទស្សនាទិ ចាតិ តីណិ អង្គានិ។

836-7. Dasame tesaṃyevāti yesaṃ niccaṃ passati. Ārāme ṭhatvāti ṭhitanisannaṭṭhāne eva ṭhatvā samantato gīvaṃ parivattetvāpi passati, anāpatti. Ṭhitaṭṭhānato gantvā passituṃ na vaṭṭati. Keci pana ‘‘vaṭṭatī’’ti vadanti. Taṃ pana ‘‘dassanāya gaccheyya, pācittiya’’nti sāmaññato gamanassa paṭikkhittattā, anāpattiyampi gamanāya avuttattā ca na gahetabbaṃ. Naccāditā, ananuññātakāraṇā gamanaṃ, dassanādi cāti tīṇi aṅgāni.

និដ្ឋិតោ លសុណវគ្គោ បឋមោ។

Niṭṭhito lasuṇavaggo paṭhamo.

Next: ២. អន្ធការវគ្គោ • 2. Andhakāravaggo

ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ១. លសុណវគ្គវណ្ណនា • 1. Lasuṇavaggavaṇṇanā

ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
១. បឋមលសុណសិក្ខាបទវណ្ណនា • 1. Paṭhamalasuṇasikkhāpadavaṇṇanā
២. ទុតិយសិក្ខាបទវណ្ណនា • 2. Dutiyasikkhāpadavaṇṇanā
៥. បញ្ចមសិក្ខាបទវណ្ណនា • 5. Pañcamasikkhāpadavaṇṇanā
៧. សត្តមសិក្ខាបទវណ្ណនា • 7. Sattamasikkhāpadavaṇṇanā
៨. អដ្ឋមសិក្ខាបទវណ្ណនា • 8. Aṭṭhamasikkhāpadavaṇṇanā
១០. ទសមសិក្ខាបទវណ្ណនា • 10. Dasamasikkhāpadavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact