១. លសុណវគ្គវណ្ណនា

1. Lasuṇavaggavaṇṇanā

៧៩៣-៧៩៧. បាចិត្តិយេសុ លសុណវគ្គស្ស បឋមេ ជាតិំ សរតីតិ ជាតិស្សរោ។ សភាវេនេវាតិ សូបសម្បាកាទិំ វិនាវ។ ពទរសាឡវំ នាម ពទរផលានិ សុក្ខាបេត្វា ចុណ្ណេត្វា កត្តព្ពា ខាទនីយវិកតិ។ សេសមេត្ថ ឧត្តានមេវ។ អាមកលសុណញ្ចេវ អជ្ឈោហរណញ្ចាតិ ឥមានិ បនេត្ថ ទ្វេ អង្គានិ។

793-797. Pācittiyesu lasuṇavaggassa paṭhame jātiṃ saratīti jātissaro. Sabhāvenevāti sūpasampākādiṃ vināva. Badarasāḷavaṃ nāma badaraphalāni sukkhāpetvā cuṇṇetvā kattabbā khādanīyavikati. Sesamettha uttānameva. Āmakalasuṇañceva ajjhoharaṇañcāti imāni panettha dve aṅgāni.

៧៩៨-៨០២. ទុតិយតតិយចតុត្ថានិ ឧត្តានត្ថានេវ។

798-802. Dutiyatatiyacatutthāni uttānatthāneva.

៨១២. បញ្ចមេ ទ្វិន្នំ បព្ពានំ ឧបរីតិ ឯត្ថ ទ្វិន្នំ អង្គុលីនំ សហ បវេសនេ ឯកេកាយ អង្គុលិយា ឯកេកំ បព្ពំ កត្វា ទ្វិន្នំ បព្ពានំ ឧបរិ។ ឯកង្គុលិបវេសនេ ទ្វិន្នំ បព្ពានំ ឧបរិ ន វដ្ដតីតិ វេទិតព្ពំ។ មហាបច្ចរិយម្បិ អយមេវ នយោ ទស្សិតោ។ ឧទកសុទ្ធិបច្ចយេន បន សតិបិ ផស្សសាទិយនេ យថាវុត្តបរិច្ឆេទេ អនាបត្តិ។

812. Pañcame dvinnaṃ pabbānaṃ uparīti ettha dvinnaṃ aṅgulīnaṃ saha pavesane ekekāya aṅguliyā ekekaṃ pabbaṃ katvā dvinnaṃ pabbānaṃ upari. Ekaṅgulipavesane dvinnaṃ pabbānaṃ upari na vaṭṭatīti veditabbaṃ. Mahāpaccariyampi ayameva nayo dassito. Udakasuddhipaccayena pana satipi phassasādiyane yathāvuttaparicchede anāpatti.

៨១៥-៨១៧. ឆដ្ឋេ អាសុម្ភិត្វាតិ បាតេត្វា។ ទធិមត្ថូតិ ទធិមណ្ឌំ ទធិម្ហិ បសន្នោទកំ។ ភុញ្ជន្តស្ស ភិក្ខុនោ ហត្ថបាសេ ឋានំ, បានីយស្ស វា វិធូបនស្ស វា គហណន្តិ ឥមានិ បនេត្ថ ទ្វេ អង្គានិ។

815-817. Chaṭṭhe āsumbhitvāti pātetvā. Dadhimatthūti dadhimaṇḍaṃ dadhimhi pasannodakaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imāni panettha dve aṅgāni.

៨២២. សត្តមេ ‘‘បដិគ្គណ្ហាតិ, អាបត្តិ ទុក្កដស្សា’’តិ ឥទំ បុព្ពបយោគទុក្កដស្ស និទស្សនមត្តន្តិ អាហ ‘‘ន កេវលំ បដិគ្គហណេយេវ ហោតី’’តិអាទិ។ បមាណន្តិ បាចិត្តិយាបត្តិយា បមាណំ។ ឥមេហិយេវ ទ្វីហិ បាចិត្តិយំ ហោតិ, នាញ្ញេហិ ភជ្ជនាទីហីតិ អត្ថោ។ វុត្តមេវត្ថំ វិត្ថារតោ ទស្សេតុំ ‘‘តស្មា’’តិអាទិមាហ។ តំ បុព្ពាបរវិរុទ្ធន្តិ បុនបិ វុត្តន្តិ វុត្តវាទំ សន្ធាយាហ។ អញ្ញាយ វិញ្ញត្តិយា លទ្ធម្បិ ហិ អនាណត្តិយា វិញ្ញត្តិយា ឥមិស្សា អវិញ្ញត្តិយា លទ្ធបក្ខំ ភជតិ, តស្មា ហេដ្ឋា អវិញ្ញត្តិយា លទ្ធេ ករណការាបនេសុ វិសេសំ អវត្វា ឥធ វិសេសវចនំ បុព្ពាបរវិរុទ្ធំ។ យទិ ចេត្ថ ករណេ បាចិត្តិយំ, ការាបនេបិ បាចិត្តិយេនេវ ភវិតព្ពំ។ អថ ការាបនេ ទុក្កដំ, ករណេបិ ទុក្កដេនេវ ភវិតព្ពំ។ ន ហិ ករណេ វា ការាបនេ វា វិសេសោ អត្ថិ, តស្មា អញ្ញាយ វិញ្ញត្តិយា លទ្ធំ សយំ ភជ្ជនាទីនិ កត្វាបិ ការាបេត្វាបិ ភុញ្ជន្តិយា ទុក្កដមេវាតិ ឥទមេត្ថ សន្និដ្ឋានំ។ អវិសេសេន វុត្តន្តិ ករណការាបនានំ សាមញ្ញតោ វុត្តំ។ សេសមេត្ថ ឧត្តានមេវ។ សត្តន្នំ ធញ្ញានំ អញ្ញតរស្ស វិញ្ញាបនំ វា វិញ្ញាបាបនំ វា, បដិលាភោ, ភជ្ជនាទីនិ កត្វា វា ការេត្វា វា អជ្ឈោហរណន្តិ ឥមានិ បនេត្ថ តីណិ អង្គានិ។

822. Sattame ‘‘paṭiggaṇhāti, āpatti dukkaṭassā’’ti idaṃ pubbapayogadukkaṭassa nidassanamattanti āha ‘‘na kevalaṃ paṭiggahaṇeyeva hotī’’tiādi. Pamāṇanti pācittiyāpattiyā pamāṇaṃ. Imehiyeva dvīhi pācittiyaṃ hoti, nāññehi bhajjanādīhīti attho. Vuttamevatthaṃ vitthārato dassetuṃ ‘‘tasmā’’tiādimāha. Taṃ pubbāparaviruddhanti punapi vuttanti vuttavādaṃ sandhāyāha. Aññāya viññattiyā laddhampi hi anāṇattiyā viññattiyā imissā aviññattiyā laddhapakkhaṃ bhajati, tasmā heṭṭhā aviññattiyā laddhe karaṇakārāpanesu visesaṃ avatvā idha visesavacanaṃ pubbāparaviruddhaṃ. Yadi cettha karaṇe pācittiyaṃ, kārāpanepi pācittiyeneva bhavitabbaṃ. Atha kārāpane dukkaṭaṃ, karaṇepi dukkaṭeneva bhavitabbaṃ. Na hi karaṇe vā kārāpane vā viseso atthi, tasmā aññāya viññattiyā laddhaṃ sayaṃ bhajjanādīni katvāpi kārāpetvāpi bhuñjantiyā dukkaṭamevāti idamettha sanniṭṭhānaṃ. Avisesena vuttanti karaṇakārāpanānaṃ sāmaññato vuttaṃ. Sesamettha uttānameva. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imāni panettha tīṇi aṅgāni.

៨២៤. អដ្ឋមេ និព្ពិដ្ឋោតិ បតិដ្ឋាបិតោ។ កេណីតិ រញ្ញោ ទាតព្ពស្ស អាយស្សេតំ អធិវចនំ។ ឋានន្តរន្តិ គាមជនបទាទិឋានន្តរំ។ សេសមេត្ថ ឧត្តានមេវ។ ឧច្ចារាទិភាវោ, អនវលោកនំ, វឡញ្ជនដ្ឋានំ, តិរោកុដ្ដបាការតា, ឆឌ្ឌនំ វា ឆឌ្ឌាបនំ វាតិ ឥមានិ បនេត្ថ បញ្ច អង្គានិ។

824. Aṭṭhame nibbiṭṭhoti patiṭṭhāpito. Keṇīti rañño dātabbassa āyassetaṃ adhivacanaṃ. Ṭhānantaranti gāmajanapadādiṭhānantaraṃ. Sesamettha uttānameva. Uccārādibhāvo, anavalokanaṃ, vaḷañjanaṭṭhānaṃ, tirokuṭṭapākāratā, chaḍḍanaṃ vā chaḍḍāpanaṃ vāti imāni panettha pañca aṅgāni.

៨៣០. នវមេ សព្ពេសន្តិ ភិក្ខុស្ស ភិក្ខុនិយា ច។ ឥធ ខេត្តបាលកា អារាមាទិគោបកា ច សាមិកា ឯវ។

830. Navame sabbesanti bhikkhussa bhikkhuniyā ca. Idha khettapālakā ārāmādigopakā ca sāmikā eva.

៨៣៦. ទសមេ ឯកបយោគេនាតិ ឯកទិសាវលោកនបយោគេន។ តេសំយេវាតិ យេសំ នច្ចំ បស្សតិ។ កិញ្ចាបិ សយំ នច្ចនាទីសុ បាចិត្តិយំ បាឡិយំ ន វុត្តំ, តថាបិ អដ្ឋកថាបមាណេន គហេតព្ពន្តិ ទស្សេតុំ ‘‘សព្ពអដ្ឋកថាសុ វុត្ត’’ន្តិ អាហ។ ‘‘អារាមេ ឋត្វាតិ ន កេវលំ ឋត្វា, តតោ តតោ គន្ត្វាបិ សព្ពិរិយាបថេហិ លភតិ, ‘អារាមេ ឋិតា’តិ បន អារាមបរិយាបន្នភាវទស្សនត្ថំ វុត្តំ។ ឥតរថា និសិន្នាបិ ន លភេយ្យា’’តិ តីសុបិ គណ្ឋិបទេសុ វុត្តំ។ សេសមេត្ថ ឧត្តានមេវ។ នច្ចាទីនំ អញ្ញតរតា, អញ្ញត្រ អនុញ្ញាតការណា គមនំ, ទស្សនំ វា សវនំ វាតិ ឥមានិ បនេត្ថ តីណិ អង្គានិ។

836. Dasame ekapayogenāti ekadisāvalokanapayogena. Tesaṃyevāti yesaṃ naccaṃ passati. Kiñcāpi sayaṃ naccanādīsu pācittiyaṃ pāḷiyaṃ na vuttaṃ, tathāpi aṭṭhakathāpamāṇena gahetabbanti dassetuṃ ‘‘sabbaaṭṭhakathāsu vutta’’nti āha. ‘‘Ārāme ṭhatvāti na kevalaṃ ṭhatvā, tato tato gantvāpi sabbiriyāpathehi labhati, ‘ārāme ṭhitā’ti pana ārāmapariyāpannabhāvadassanatthaṃ vuttaṃ. Itarathā nisinnāpi na labheyyā’’ti tīsupi gaṇṭhipadesu vuttaṃ. Sesamettha uttānameva. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imāni panettha tīṇi aṅgāni.

លសុណវគ្គវណ្ណនា និដ្ឋិតា។

Lasuṇavaggavaṇṇanā niṭṭhitā.

Next: ២. អន្ធការវគ្គវណ្ណនា • 2. Andhakāravaggavaṇṇanā

ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
១. បឋមលសុណសិក្ខាបទវណ្ណនា • 1. Paṭhamalasuṇasikkhāpadavaṇṇanā
២. ទុតិយសិក្ខាបទវណ្ណនា • 2. Dutiyasikkhāpadavaṇṇanā
៥. បញ្ចមសិក្ខាបទវណ្ណនា • 5. Pañcamasikkhāpadavaṇṇanā
៧. សត្តមសិក្ខាបទវណ្ណនា • 7. Sattamasikkhāpadavaṇṇanā
៨. អដ្ឋមសិក្ខាបទវណ្ណនា • 8. Aṭṭhamasikkhāpadavaṇṇanā
១០. ទសមសិក្ខាបទវណ្ណនា • 10. Dasamasikkhāpadavaṇṇanā

ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ១. បឋមលសុណាទិសិក្ខាបទវណ្ណនា • 1. Paṭhamalasuṇādisikkhāpadavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact