៣. និស្សគ្គិយកណ្ឌំ (ភិក្ខុនីវិភង្គវណ្ណនា)

3. Nissaggiyakaṇḍaṃ (bhikkhunīvibhaṅgavaṇṇanā)

៧៣៣. និស្សគ្គិយេសុ បឋមំ ឧត្តានមេវ។

733. Nissaggiyesu paṭhamaṃ uttānameva.

៧៤០. ទុតិយេ ‘‘អយ្យាយ ទម្មីតិ ឯវំ បដិលទ្ធន្តិ និស្សដ្ឋបដិលទ្ធំ។ តេនេវ មាតិកាដ្ឋកថាយម្បិ ‘‘និស្សដ្ឋំ បដិលភិត្វាបិ យថាទានេយេវ ឧបនេតព្ព’’ន្តិ វុត្តំ។ យថាទានេយេវ ឧបនេតព្ពន្តិ យថា ទាយកេន ទិន្នំ, តថា ឧបនេតព្ពំ, អកាលចីវរបក្ខេយេវ ឋបេតព្ពន្តិ វុត្តំ ហោតិ។ ឯត្ថ ច ភាជាបិតាយ លទ្ធចីវរមេវ និស្សគ្គិយំ ហោតិ, តំ វិនយកម្មំ កត្វាបិ អត្តនា ន លភតិ។ សេសមេត្ថ ឧត្តានមេវ។ អកាលចីវរតា, តថាសញ្ញិតា, កាលចីវរន្តិ អធិដ្ឋាយ លេសេន ភាជាបនំ, បដិលាភោតិ ឥមានិ បនេត្ថ ចត្តារិ អង្គានិ។

740. Dutiye ‘‘ayyāya dammīti evaṃ paṭiladdhanti nissaṭṭhapaṭiladdhaṃ. Teneva mātikāṭṭhakathāyampi ‘‘nissaṭṭhaṃ paṭilabhitvāpi yathādāneyeva upanetabba’’nti vuttaṃ. Yathādāneyeva upanetabbanti yathā dāyakena dinnaṃ, tathā upanetabbaṃ, akālacīvarapakkheyeva ṭhapetabbanti vuttaṃ hoti. Ettha ca bhājāpitāya laddhacīvarameva nissaggiyaṃ hoti, taṃ vinayakammaṃ katvāpi attanā na labhati. Sesamettha uttānameva. Akālacīvaratā, tathāsaññitā, kālacīvaranti adhiṭṭhāya lesena bhājāpanaṃ, paṭilābhoti imāni panettha cattāri aṅgāni.

៧៤៣. តតិយេ មេតន្តិ មេ ឯតំ។ សកសញ្ញាយ គហិតត្តា បាចិត្តិយំ ទុក្កដញ្ច វុត្តំ។ ឥតរថា ភណ្ឌគ្ឃេន ការេតព្ពំ។ ឧបសម្បន្នតា, បរិវត្តិតចីវរស្ស វិកប្បនុបគតា, សកសញ្ញាយ អច្ឆិន្ទនំ វា អច្ឆិន្ទាបនំ វាតិ ឥមានិ បនេត្ថ តីណិ អង្គានិ។

743. Tatiye metanti me etaṃ. Sakasaññāya gahitattā pācittiyaṃ dukkaṭañca vuttaṃ. Itarathā bhaṇḍagghena kāretabbaṃ. Upasampannatā, parivattitacīvarassa vikappanupagatā, sakasaññāya acchindanaṃ vā acchindāpanaṃ vāti imāni panettha tīṇi aṅgāni.

៧៤៨-៧៥២. ចតុត្ថេ អាហដសប្បិំ ទត្វាតិ អត្តនោ ទត្វា។ យមកំ បចិតព្ពន្តិ សប្បិញ្ច តេលញ្ច ឯកតោ កត្វា បចិតព្ពំ។ លេសេន គហេតុកាមតា, អញ្ញស្ស វិញ្ញាបនំ, បដិលាភោតិ ឥមានិ បនេត្ថ តីណិ អង្គានិ។

748-752. Catutthe āhaṭasappiṃ datvāti attano datvā. Yamakaṃ pacitabbanti sappiñca telañca ekato katvā pacitabbaṃ. Lesena gahetukāmatā, aññassa viññāpanaṃ, paṭilābhoti imāni panettha tīṇi aṅgāni.

៧៥៣. បញ្ចមេ សាតិ ថុល្លនន្ទា។ អយន្តិ អយំ សិក្ខមានា។ ចេតាបេត្វាតិ ជានាបេត្វា ឥច្ចេវ អត្ថោតិ ឥធ វុត្តំ, មាតិកាដ្ឋកថាយំ (កង្ខា. អដ្ឋ. អញ្ញចេតាបនសិក្ខាបទវណ្ណនា) បន ‘‘អញ្ញំ ចេតាបេត្វាតិ អត្តនោ កប្បិយភណ្ឌេន ឥទំ នាម អាហរាតិ អញ្ញំ បរិវត្តាបេត្វា’’តិ វុត្តំ, តស្មា ‘‘ចេតាបេត្វា’’តិ ឥមស្ស បរិវត្តាបេត្វាតិបិ អត្ថោ ទដ្ឋព្ពោ។ អញ្ញំ ចេតាបេយ្យាតិ ‘‘ឯវំ មេ ឥទំ ទត្វា អញ្ញម្បិ អាហរិស្សតី’’តិ មញ្ញមានា ‘‘ន មេ ឥមិនា អត្ថោ, ឥទំ នាម មេ អាហរា’’តិ តតោ អញ្ញំ ចេតាបេយ្យ។

753. Pañcame sāti thullanandā. Ayanti ayaṃ sikkhamānā. Cetāpetvāti jānāpetvā icceva atthoti idha vuttaṃ, mātikāṭṭhakathāyaṃ (kaṅkhā. aṭṭha. aññacetāpanasikkhāpadavaṇṇanā) pana ‘‘aññaṃ cetāpetvāti attano kappiyabhaṇḍena idaṃ nāma āharāti aññaṃ parivattāpetvā’’ti vuttaṃ, tasmā ‘‘cetāpetvā’’ti imassa parivattāpetvātipi attho daṭṭhabbo. Aññaṃ cetāpeyyāti ‘‘evaṃ me idaṃ datvā aññampi āharissatī’’ti maññamānā ‘‘na me iminā attho, idaṃ nāma me āharā’’ti tato aññaṃ cetāpeyya.

៧៥៨. ឆដ្ឋេ ធម្មកិច្ចន្តិ បុញ្ញកម្មំ។ បាវារិកស្សាតិ ទុស្សវាណិជកស្ស។ យាយ ចេតាបិតំ, តស្សាយេវ និស្សគ្គិយំ និស្សដ្ឋបដិលាភោ ច, តស្មា តាយ ភិក្ខុនិយា និស្សដ្ឋំ បដិលភិត្វា យថាទានេ ឧបនេតព្ពំ, ន អត្តនា គហេតព្ពំ។ អញ្ញស្សត្ថាយាតិ ចីវរាទីសុ អញ្ញតរស្សត្ថាយ។ អញ្ញុទ្ទិសិកេនាតិ បុរិមស្សេវត្ថទីបនំ។ បរិក្ខារេនាតិ កប្បិយភណ្ឌេន។

758. Chaṭṭhe dhammakiccanti puññakammaṃ. Pāvārikassāti dussavāṇijakassa. Yāya cetāpitaṃ, tassāyeva nissaggiyaṃ nissaṭṭhapaṭilābho ca, tasmā tāya bhikkhuniyā nissaṭṭhaṃ paṭilabhitvā yathādāne upanetabbaṃ, na attanā gahetabbaṃ. Aññassatthāyāti cīvarādīsu aññatarassatthāya. Aññuddisikenāti purimassevatthadīpanaṃ. Parikkhārenāti kappiyabhaṇḍena.

៧៦៤. សត្តមេ សយំ យាចិតកេនាតិ សយំ យាចិតកេនាបីតិ អត្ថោ។ តេនេវ បាឡិយំ ‘‘តេន ច បរិក្ខារេន សយម្បិ យាចិត្វា’’តិ វុត្តំ, តតោយេវ មាតិកាដ្ឋកថាយំ ‘‘សញ្ញាចិកេនាតិ សយំ យាចិតកេនាបី’’តិ អត្ថោ វុត្តោ។

764. Sattame sayaṃ yācitakenāti sayaṃ yācitakenāpīti attho. Teneva pāḷiyaṃ ‘‘tena ca parikkhārena sayampi yācitvā’’ti vuttaṃ, tatoyeva mātikāṭṭhakathāyaṃ ‘‘saññācikenāti sayaṃ yācitakenāpī’’ti attho vutto.

៧៦៨-៧៧៣. អដ្ឋមនវមទសមានិ ឧត្តានត្ថានេវ។

768-773. Aṭṭhamanavamadasamāni uttānatthāneva.

៧៨៤. ឯកាទសមេ យស្មា បវារិតដ្ឋានេ វិញ្ញត្តិ នាម ន បដិសេធេតព្ពា, តស្មា ភគវា ធម្មនិមន្តនវសេន បវារិតដ្ឋានេ ‘‘វទេយ្យាសិ យេនត្ថោ’’តិ វុត្តាយ ‘‘ចតុក្កំសបរមំ វិញ្ញាបេតព្ព’’ន្តិ បរិច្ឆេទំ ទស្សេតីតិ វេទិតព្ពំ។ តេនេវ មាតិកាដ្ឋកថាយំ (កង្ខា. អដ្ឋ. គរុបាវុរណសិក្ខាបទវណ្ណនា) ‘‘ចេតាបេតព្ពន្តិ ឋបេត្វា សហធម្មិកេ ច ញាតកបវារិតេ ច អញ្ញេន កិស្មិញ្ចិទេវ គុណេ បរិតុដ្ឋេន វទេយ្យាសិ យេនត្ថោតិ វុត្តាយ វិញ្ញាបេតព្ព’’ន្តិ វុត្តំ។

784. Ekādasame yasmā pavāritaṭṭhāne viññatti nāma na paṭisedhetabbā, tasmā bhagavā dhammanimantanavasena pavāritaṭṭhāne ‘‘vadeyyāsi yenattho’’ti vuttāya ‘‘catukkaṃsaparamaṃ viññāpetabba’’nti paricchedaṃ dassetīti veditabbaṃ. Teneva mātikāṭṭhakathāyaṃ (kaṅkhā. aṭṭha. garupāvuraṇasikkhāpadavaṇṇanā) ‘‘cetāpetabbanti ṭhapetvā sahadhammike ca ñātakapavārite ca aññena kismiñcideva guṇe parituṭṭhena vadeyyāsi yenatthoti vuttāya viññāpetabba’’nti vuttaṃ.

៧៨៨. ទ្វាទសមំ ឧត្តានត្ថមេវ។

788. Dvādasamaṃ uttānatthameva.

ភិក្ខុនីវិភង្គេ និស្សគ្គិយបាចិត្តិយសិក្ខាបទវណ្ណនា និដ្ឋិតា។

Bhikkhunīvibhaṅge nissaggiyapācittiyasikkhāpadavaṇṇanā niṭṭhitā.

និស្សគ្គិយកណ្ឌំ និដ្ឋិតំ។

Nissaggiyakaṇḍaṃ niṭṭhitaṃ.

Next: ៤. បាចិត្តិយកណ្ឌំ (ភិក្ខុនីវិភង្គវណ្ណនា) • 4. Pācittiyakaṇḍaṃ (bhikkhunīvibhaṅgavaṇṇanā)

ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ទុតិយនិស្សគ្គិយាទិបាចិត្តិយសិក្ខាបទវណ្ណនា • 2. Dutiyanissaggiyādipācittiyasikkhāpadavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact