| Library / Tipiṭaka / តិបិដក • Tipiṭaka / វជិរពុទ្ធិ-ដីកា • Vajirabuddhi-ṭīkā |
១១. ឯកាទសមនិស្សគ្គិយបាចិត្តិយសិក្ខាបទវណ្ណនា
11. Ekādasamanissaggiyapācittiyasikkhāpadavaṇṇanā
៧៨៤. ‘‘ទុតិយវគ្គស្ស បឋមេ’’តិ អវត្វា ‘‘ឯកាទសមេ’’តិ ឥធ វុត្តំ។ កស្មា? ភិក្ខុនិវិភង្គេ តិំសកកណ្ឌំ បត្វា វគ្គក្កមស្ស អវុត្តត្តា។ យស្មា បវារិតដ្ឋានេ វិញ្ញត្តិ នាម ន បដិសេធេតព្ពា, តស្មា ភគវា អញ្ញាតិកអប្បវារិតដ្ឋានេ ធម្មនិមន្តនវសេន វទេយ្យ ‘‘យេនត្ថោ’’តិ វុត្តាយ ‘‘ចតុក្កំសបរមំ វិញ្ញាបេតព្ព’’ន្តិ បរិច្ឆេទំ ទស្សេតីតិ វេទិតព្ពំ។ អញ្ញថា ‘‘និទានេន សិក្ខាបទំ ន សមេតិ, សិក្ខាបទេន ច អនាបត្តិវារោ’’តិ ច ‘‘អកតវិញ្ញត្តិយា ចតុក្កំសបរមំ វិញ្ញាបេតព្ព’’ន្តិ ច អនិដ្ឋំ អាបជ្ជតិ, តស្មា មាតិកាដ្ឋកថាយំ ចេតាបេតព្ពន្តិ ឋបេត្វា សហធម្មិកេ ច ញាតកបវារិតេ ច អញ្ញេន កិស្មិញ្ចិទេវ គុណេន, បរិតុដ្ឋេន ច វទេយ្យ ‘‘យេនត្ថោ’’តិ វុត្តស្ស ‘‘វិញ្ញាបេតព្ព’’ន្តិ វុត្តនយេន អត្ថោ ទដ្ឋព្ពោ។ បោរាណគណ្ឋិបទេ បន ‘‘ឥទំ បរិច្ឆិន្នបវារណំ សន្ធាយ វុត្តំ។ អនាបត្តិ ញាតកានំ បវារិតានន្តិ បន សព្ពប្បការេន បវត្តំ និច្ចបវារណំ សន្ធាយ វុត្តំ។ និច្ចបវារណា នាម យទា យេនត្ថោ, តទា តំ វទេយ្យាថាតិ ឯវំ បវត្តា ។ ‘ហន្ទ សីតបាវុរណ’ន្តិ ទេន្តានំ បន អតិរេកចតុក្កំសម្បិ គហេតុំ វដ្ដតី’’តិ វុត្តំ។ អយមេវ នយោ ទសមេបីតិ។
784. ‘‘Dutiyavaggassa paṭhame’’ti avatvā ‘‘ekādasame’’ti idha vuttaṃ. Kasmā? Bhikkhunivibhaṅge tiṃsakakaṇḍaṃ patvā vaggakkamassa avuttattā. Yasmā pavāritaṭṭhāne viññatti nāma na paṭisedhetabbā, tasmā bhagavā aññātikaappavāritaṭṭhāne dhammanimantanavasena vadeyya ‘‘yenattho’’ti vuttāya ‘‘catukkaṃsaparamaṃ viññāpetabba’’nti paricchedaṃ dassetīti veditabbaṃ. Aññathā ‘‘nidānena sikkhāpadaṃ na sameti, sikkhāpadena ca anāpattivāro’’ti ca ‘‘akataviññattiyā catukkaṃsaparamaṃ viññāpetabba’’nti ca aniṭṭhaṃ āpajjati, tasmā mātikāṭṭhakathāyaṃ cetāpetabbanti ṭhapetvā sahadhammike ca ñātakapavārite ca aññena kismiñcideva guṇena, parituṭṭhena ca vadeyya ‘‘yenattho’’ti vuttassa ‘‘viññāpetabba’’nti vuttanayena attho daṭṭhabbo. Porāṇagaṇṭhipade pana ‘‘idaṃ paricchinnapavāraṇaṃ sandhāya vuttaṃ. Anāpatti ñātakānaṃ pavāritānanti pana sabbappakārena pavattaṃ niccapavāraṇaṃ sandhāya vuttaṃ. Niccapavāraṇā nāma yadā yenattho, tadā taṃ vadeyyāthāti evaṃ pavattā . ‘Handa sītapāvuraṇa’nti dentānaṃ pana atirekacatukkaṃsampi gahetuṃ vaṭṭatī’’ti vuttaṃ. Ayameva nayo dasamepīti.
ឯកាទសមនិស្សគ្គិយបាចិត្តិយសិក្ខាបទវណ្ណនា និដ្ឋិតា។
Ekādasamanissaggiyapācittiyasikkhāpadavaṇṇanā niṭṭhitā.
ភិក្ខុនីវិភង្គេ តិំសកវណ្ណនា និដ្ឋិតា។
Bhikkhunīvibhaṅge tiṃsakavaṇṇanā niṭṭhitā.
និស្សគ្គិយកណ្ឌវណ្ណនា និដ្ឋិតា។
Nissaggiyakaṇḍavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ភិក្ខុនីវិភង្គ • Bhikkhunīvibhaṅga / ១១. ឯកាទសមសិក្ខាបទំ • 11. Ekādasamasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā / ឯកាទសមនិស្សគ្គិយបាចិត្តិយសិក្ខាបទវណ្ណនា • Ekādasamanissaggiyapācittiyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៣. និស្សគ្គិយកណ្ឌំ (ភិក្ខុនីវិភង្គវណ្ណនា) • 3. Nissaggiyakaṇḍaṃ (bhikkhunīvibhaṅgavaṇṇanā)
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ទុតិយនិស្សគ្គិយាទិបាចិត្តិយសិក្ខាបទវណ្ណនា • 2. Dutiyanissaggiyādipācittiyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១១. ឯកាទសមនិស្សគ្គិយបាចិត្តិយសិក្ខាបទំ • 11. Ekādasamanissaggiyapācittiyasikkhāpadaṃ
