| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២៨. សុវណ្ណពិព្ពោហនវគ្គោ
28. Suvaṇṇabibbohanavaggo
១-១០. សុវណ្ណពិព្ពោហនិយត្ថេរអបទានាទិវណ្ណនា
1-10. Suvaṇṇabibbohaniyattheraapadānādivaṇṇanā
អដ្ឋវីសតិមេ វគ្គេ បឋមាបទានំ ឧត្តានមេវ។
Aṭṭhavīsatime vagge paṭhamāpadānaṃ uttānameva.
៥. ទុតិយាបទានេ មនោមយេន កាយេនាតិ យថា ចិត្តវសេន បវត្តកាយេនាតិ អត្ថោ។
5. Dutiyāpadāne manomayena kāyenāti yathā cittavasena pavattakāyenāti attho.
១០. តតិយាបទានេ មហាសមុទ្ទំ និស្សាយាតិ មហាសាគរាសន្នេ ឋិតស្ស បព្ពតស្ស អន្តរេ បព្ពតលេណេតិ អត្ថោ។ សិទ្ធត្ថោ ភគវា វិវេកកាមតាយ វសតិ បដិវសតីតិ អត្ថោ។ បច្ចុគ្គន្ត្វានកាសហន្តិ អហំ តស្ស ភគវតោ បដិឧគ្គន្ត្វា សមីបំ គន្ត្វា វន្ទនាទិបុញ្ញំ អកាសិន្តិ អត្ថោ។ ចង្កោដកមទាសហន្តិ សិទ្ធត្ថស្ស ភគវតោ អហំ បុប្ផភរិតំ ចង្កោដកំ កទម្ពំ អទាសិំ បូជេសិន្តិ អត្ថោ។
10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.
១៤. ចតុត្ថាបទានេ អកក្កសចិត្តស្សាថាតិ អផរុសចិត្តស្ស, អថ-សទ្ទោ បទបូរណេ។
14. Catutthāpadāne akakkasacittassāthāti apharusacittassa, atha-saddo padapūraṇe.
១៩. បញ្ចមាបទានេ ឧទុម្ពរេ វសន្តស្សាតិ ឧទុម្ពររុក្ខមូលេ រុក្ខច្ឆាយាយ វសន្តស្ស តិស្សស្ស ភគវតោ។ និយតេ បណ្ណសន្ថរេតិ និយាមិតេ បដិពទ្ធេ បណ្ណសន្ថរេ សាខាភង្គាសនេ និសិន្នស្ស។ វុត្ថោកាសោ មយា ទិន្នោតិ វិវិត្តោកាសេ មណ្ឌបទ្វារាទីហិ បិហិតោកាសោ មយា ទិន្នោ សម្បាទិតោតិ អត្ថោ។
19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.
២៤. ឆដ្ឋាបទានេ បោត្ថទានំ មយា ទិន្នន្តិ បោត្ថវដ្ដិំ បោត្ថឆល្លិំ តាឡេត្វា កតំ សាដកំ វិសមំ គោផាសុកេន ឃំសិត្វា និម្មិតំ សុត្តំ គហេត្វា កន្តិត្វា តេន សុត្តេន និសីទនត្ថាយ វា ភូមត្ថរណត្ថាយ វា សាដកំ វាយាបេត្វា តំ សាដកំ មយា រតនត្តយស្ស ទិន្នន្តិ អត្ថោ។
24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.
២៧. សត្តមាបទានេ ចន្ទភាគានទីតីរេតិ ចន្ទភាគាយ នាម នទិយា តីរតោ, និស្សក្កេ ភុម្មវចនំ ។ អនុសោតន្តិ សោតស្ស អនុ ហេដ្ឋាគង្គំ វជាមិ គច្ឆាមិ អហន្តិ អត្ថោ។ សត្ត មាលុវបុប្ផានិ, ចិតមារោបយិំ អហន្តិ អហំ មាលុវបុប្ផានិ សត្ត បត្តានិ គហេត្វា ចិតកេ វាលុករាសិម្ហិ វាលុកាហិ ថូបំ កត្វា បូជេសិន្តិ អត្ថោ។
27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.
៣១-៣២. អដ្ឋមាបទានេ មហាសិន្ធុ សុទស្សនាតិ សុន្ទរទស្សនសុន្ទរោទកធវលបុលិនោបសោភិតត្តា សុដ្ឋុ មនោហរា មហាសិន្ធុ នាម វារិនទី អហោសិ។ តត្ថ តិស្សំ សិន្ធុវារិនទិយំ សប្បភាសំ បភាយ សហិតំ សុទស្សនំ សុន្ទររូបំ បរមោបសមេ យុត្តំ ឧត្តមេ ឧបសមេ យុត្តំ សមង្គីភូតំ វីតរាគំ អហំ អទ្ទសន្តិ អត្ថោ។ ទិស្វាហំ វិម្ហិតាសយោតិ ‘‘ឯវរូបំ ភយានកំ ហិមវន្តំ កថំ សម្បត្តោ’’តិ វិម្ហិតអជ្ឈាសយោ អច្ឆរិយព្ភុតចិត្តោតិ អត្ថោ។ អាលុវំ តស្ស បាទាសិន្តិ តស្ស អរហតោ អហំ បសន្នមានសោ អាលុវកន្ទំ បាទាសិំ អាទរេន អទាសិន្តិ អត្ថោ។
31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.
នវមទសមាបទានានិ ឧត្តានានេវាតិ។
Navamadasamāpadānāni uttānānevāti.
អដ្ឋវីសតិមវគ្គវណ្ណនា សមត្តា។
Aṭṭhavīsatimavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi
២. តិលមុដ្ឋិទាយកត្ថេរអបទានំ • 2. Tilamuṭṭhidāyakattheraapadānaṃ
៣. ចង្កោដកិយត្ថេរអបទានំ • 3. Caṅkoṭakiyattheraapadānaṃ
៤. អព្ភញ្ជនទាយកត្ថេរអបទានំ • 4. Abbhañjanadāyakattheraapadānaṃ
៥. ឯកញ្ជលិកត្ថេរអបទានំ • 5. Ekañjalikattheraapadānaṃ
៦. បោត្ថកទាយកត្ថេរអបទានំ • 6. Potthakadāyakattheraapadānaṃ
៧. ចិតកបូជកត្ថេរអបទានំ • 7. Citakapūjakattheraapadānaṃ
៨. អាលុវទាយកត្ថេរអបទានំ • 8. Āluvadāyakattheraapadānaṃ
