| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២៥. តុវរទាយកវគ្គោ
25. Tuvaradāyakavaggo
១-១០. តុវរទាយកត្ថេរអបទានាទិវណ្ណនា
1-10. Tuvaradāyakattheraapadānādivaṇṇanā
១. បញ្ចវីសតិមេ វគ្គេ បឋមាបទានេ ភរិត្វា តុវរមាទាយាតិ តុវរអដ្ឋិំ មុគ្គកលយសទិសំ តុវរដ្ឋិំ ភជ្ជិត្វា បុប្ផេត្វា ភាជនេន អាទាយ សង្ឃស្ស វនមជ្ឈោគាហកស្ស អទទិំ អទាសិន្តិ អត្ថោ។
1. Pañcavīsatime vagge paṭhamāpadāne bharitvā tuvaramādāyāti tuvaraaṭṭhiṃ muggakalayasadisaṃ tuvaraṭṭhiṃ bhajjitvā pupphetvā bhājanena ādāya saṅghassa vanamajjhogāhakassa adadiṃ adāsinti attho.
៤-៥. ទុតិយាបទានេ ធនុំ អទ្វេជ្ឈំ កត្វានាតិ មិគាទីនំ មារណត្ថាយ ធនុំ សន្នយ្ហិត្វា ចរមានោ កេសរំ ឱគតំ ទិស្វាតិ សុបុប្ផិតំ ខុទ្ទកសរំ ទិស្វា ពុទ្ធស្ស អភិរោបេសិន្តិ អហំ ចិត្តំ បសាទេត្វា វនំ សម្បត្តស្ស តិស្សស្ស ភគវតោ អភិរោបយិំ បូជេសិន្តិ អត្ថោ។
4-5. Dutiyāpadāne dhanuṃ advejjhaṃ katvānāti migādīnaṃ māraṇatthāya dhanuṃ sannayhitvā caramāno kesaraṃ ogataṃ disvāti supupphitaṃ khuddakasaraṃ disvā buddhassa abhiropesinti ahaṃ cittaṃ pasādetvā vanaṃ sampattassa tissassa bhagavato abhiropayiṃ pūjesinti attho.
៩-១០. តតិយាបទានេ ជលកុក្កុដោតិ ជាតស្សរេ ចរមានកុក្កុដោ។ តុណ្ឌេន កេសរិំ គយ្ហាតិ បទុមបុប្ផំ មុខតុណ្ឌេន ឌំសិត្វា អាកាសេន គច្ឆន្តស្ស តិស្សស្ស ភគវតោ អភិរោបេសិំ បូជេសិន្តិ អត្ថោ។
9-10. Tatiyāpadāne jalakukkuṭoti jātassare caramānakukkuṭo. Tuṇḍena kesariṃ gayhāti padumapupphaṃ mukhatuṇḍena ḍaṃsitvā ākāsena gacchantassa tissassa bhagavato abhiropesiṃ pūjesinti attho.
១៤. ចតុត្ថាបទានេ វិរវបុប្ផមាទាយាតិ វិវិធំ រវតិ សទ្ទំ ករោតីតិ វិរវំ, សទ្ទករណវេលាយំ វិកសនតោ ‘‘វិរវ’’ន្តិ លទ្ធនាមំ បុប្ផសមូហំ អាទាយ គហេត្វា សិទ្ធត្ថស្ស ពុទ្ធស្ស អភិរោបយិំ បូជេសិន្តិ អត្ថោ។
14. Catutthāpadāne viravapupphamādāyāti vividhaṃ ravati saddaṃ karotīti viravaṃ, saddakaraṇavelāyaṃ vikasanato ‘‘virava’’nti laddhanāmaṃ pupphasamūhaṃ ādāya gahetvā siddhatthassa buddhassa abhiropayiṃ pūjesinti attho.
១៧. បញ្ចមាបទានេ កុដិគោបកោតិ សេនាសនបាលកោ។ កាលេន កាលំ ធូបេសិន្តិ សម្បត្តសម្បត្តកាលានុកាលេ ធូបេសិំ, ធូបេន សុគន្ធំ អកាសិន្តិ អត្ថោ។ សិទ្ធត្ថស្ស ភគវតោ គន្ធកុដិកាលានុសារិធូបេន ធូបេសិំ វាសេសិន្តិ អត្ថោ។
17. Pañcamāpadāne kuṭigopakoti senāsanapālako. Kālena kālaṃ dhūpesinti sampattasampattakālānukāle dhūpesiṃ, dhūpena sugandhaṃ akāsinti attho. Siddhatthassa bhagavato gandhakuṭikālānusāridhūpena dhūpesiṃ vāsesinti attho.
ឆដ្ឋសត្តមាបទានានិ ឧត្តានត្ថានេវ។
Chaṭṭhasattamāpadānāni uttānatthāneva.
២៧. អដ្ឋមាបទានេ សត្ត សត្តលិបុប្ផានីតិ សត្តលិសង្ខាតានិ, សត្ត បុប្ផានិ សីសេនាទាយ វេស្សភុស្ស ភគវតោ អភិរោបេសិំ បូជេសិន្តិ អត្ថោ។
27. Aṭṭhamāpadāne satta sattalipupphānīti sattalisaṅkhātāni, satta pupphāni sīsenādāya vessabhussa bhagavato abhiropesiṃ pūjesinti attho.
៣១. នវមាបទានេ ពិម្ពិជាលកបុប្ផានីតិ រត្តង្កុរវកបុប្ផានិ សិទ្ធត្ថស្ស ភគវតោ បូជេសិន្តិ អត្ថោ។
31. Navamāpadāne bimbijālakapupphānīti rattaṅkuravakapupphāni siddhatthassa bhagavato pūjesinti attho.
៣៥. ទសមាបទានេ ឧទ្ទាលកំ គហេត្វានាតិ ជាតស្សរេ វិហង្គសោព្ភេ ជាតំ ឧទ្ទាលកបុប្ផំ ឱចិនិត្វា កកុសន្ធស្ស ភគវតោ បូជេសិន្តិ អត្ថោ។ សេសំ សុវិញ្ញេយ្យមេវាតិ។
35. Dasamāpadāne uddālakaṃ gahetvānāti jātassare vihaṅgasobbhe jātaṃ uddālakapupphaṃ ocinitvā kakusandhassa bhagavato pūjesinti attho. Sesaṃ suviññeyyamevāti.
បញ្ចវីសតិមវគ្គវណ្ណនា សមត្តា។
Pañcavīsatimavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi
១. តុវរទាយកត្ថេរអបទានំ • 1. Tuvaradāyakattheraapadānaṃ
២. នាគកេសរិយត្ថេរអបទានំ • 2. Nāgakesariyattheraapadānaṃ
៣. នឡិនកេសរិយត្ថេរអបទានំ • 3. Naḷinakesariyattheraapadānaṃ
៤. វិរវបុប្ផិយត្ថេរអបទានំ • 4. Viravapupphiyattheraapadānaṃ
៥. កុដិធូបកត្ថេរអបទានំ • 5. Kuṭidhūpakattheraapadānaṃ
៨. សត្តលិបុប្ផបូជកត្ថេរអបទានំ • 8. Sattalipupphapūjakattheraapadānaṃ
៩. ពិម្ពិជាលិយត្ថេរអបទានំ • 9. Bimbijāliyattheraapadānaṃ
១០. ឧទ្ទាលកទាយកត្ថេរអបទានំ • 10. Uddālakadāyakattheraapadānaṃ
