| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៦. សុរុសុរុវគ្គវណ្ណនា
6. Surusuruvaggavaṇṇanā
៦២៧. បាឡិយំ សីតីកតោតិ សីតបីឡិតោ។ សិលកពុទ្ធោតិ បរិហាសវចនមេតំ។ សិលកញ្ហិ កិញ្ចិ ទិស្វា ‘‘ពុទ្ធោ អយ’’ន្តិ វោហរន្តិ។
627. Pāḷiyaṃ sītīkatoti sītapīḷito. Silakabuddhoti parihāsavacanametaṃ. Silakañhi kiñci disvā ‘‘buddho aya’’nti voharanti.
៦២៨. ‘‘អង្គុលិយោ មុខេ បវេសេត្វា ភុញ្ជិតុំ វដ្ដតី’’តិ ឥមិនា សព្ពំ ហត្ថំ អន្តោមុខេ បក្ខិបនសិក្ខាបទស្សបិ បវិដ្ឋង្គុលិនិល្លេហនេន ឥមស្សបិ សិក្ខាបទស្ស អនាបត្តិំ ទស្សេតិ។ ឯសេវ នយោតិ ឃនយាគុអាទីសុ បត្តំ ហត្ថេន, ឱដ្ឋញ្ច ជិវ្ហាយ និល្លេហិតុំ វដ្ដតីតិ អតិទិសតិ។ តស្មាតិ យស្មា ឃនយាគុអាទិវិរហិតំ និល្លេហិតុំ ន វដ្ដតិ។
628.‘‘Aṅguliyo mukhe pavesetvā bhuñjituṃ vaṭṭatī’’ti iminā sabbaṃ hatthaṃ antomukhe pakkhipanasikkhāpadassapi paviṭṭhaṅgulinillehanena imassapi sikkhāpadassa anāpattiṃ dasseti. Eseva nayoti ghanayāguādīsu pattaṃ hatthena, oṭṭhañca jivhāya nillehituṃ vaṭṭatīti atidisati. Tasmāti yasmā ghanayāguādivirahitaṃ nillehituṃ na vaṭṭati.
៦៣៤. វិលីវច្ឆត្តន្តិ វេណុបេសិកាហិ កតំ។ មណ្ឌលពទ្ធានីតិ ទីឃសលាកាសុ តិរិយំ វលយាការេន សលាកំ ឋបេត្វា សុត្តេហិ ពទ្ធានិ ទីឃញ្ច តិរិយញ្ច ឧជុកមេវ សលាកាយោ ឋបេត្វា ទឡ្ហពទ្ធានិ ចេវ តិរិយំ ឋបេត្វា ទីឃទណ្ឌកេហេវ សង្កោចារហំ កត្វា សុត្តេហេវ តិរិយំ ពទ្ធានិ។ តត្ថជាតកទណ្ឌកេន កតន្តិ សហ ទណ្ឌកេន ឆិន្នតាលបណ្ណាទីហិ កតំ។ ឆត្តបាទុកាយាតិ យស្មិំ ឆត្តទណ្ឌកោដិំ បវេសេត្វា ឆត្តំ ឧជុកំ ឋបេត្វា ហេដ្ឋា ឆាយាយ និសីទន្តិ, តិដ្ឋន្តិ វា, តាទិសេ ឆត្តាធារេ។
634.Vilīvacchattanti veṇupesikāhi kataṃ. Maṇḍalabaddhānīti dīghasalākāsu tiriyaṃ valayākārena salākaṃ ṭhapetvā suttehi baddhāni dīghañca tiriyañca ujukameva salākāyo ṭhapetvā daḷhabaddhāni ceva tiriyaṃ ṭhapetvā dīghadaṇḍakeheva saṅkocārahaṃ katvā sutteheva tiriyaṃ baddhāni. Tatthajātakadaṇḍakena katanti saha daṇḍakena chinnatālapaṇṇādīhi kataṃ. Chattapādukāyāti yasmiṃ chattadaṇḍakoṭiṃ pavesetvā chattaṃ ujukaṃ ṭhapetvā heṭṭhā chāyāya nisīdanti, tiṭṭhanti vā, tādise chattādhāre.
៦៣៧. ចាបោតិ មជ្ឈេ វង្កកាជទណ្ឌសទិសា ធនុវិកតិ។ កោទណ្ឌោតិ វិទ្ធទណ្ឌា ធនុវិកតិ។
637.Cāpoti majjhe vaṅkakājadaṇḍasadisā dhanuvikati. Kodaṇḍoti viddhadaṇḍā dhanuvikati.
សុរុសុរុវគ្គវណ្ណនា និដ្ឋិតា។
Surusuruvaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរុសុរុវគ្គោ • 6. Surusuruvaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៦. សុរុសុរុវគ្គវណ្ណនា • 6. Surusuruvaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. សុរុសុរុវគ្គវណ្ណនា • 6. Surusuruvaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. សុរុសុរុវគ្គវណ្ណនា • 6. Surusuruvaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. សុរុសុរុវគ្គ-អត្ថយោជនា • 6. Surusuruvagga-atthayojanā
