| Library / Tipiṭaka / តិបិដក • Tipiṭaka / វជិរពុទ្ធិ-ដីកា • Vajirabuddhi-ṭīkā |
សង្ឃសាមគ្គីកថាវណ្ណនា
Saṅghasāmaggīkathāvaṇṇanā
៤៧៥. ‘‘អថ ខោ តេ ឧក្ខិត្តានុវត្តកា ភិក្ខូ តំ ឧក្ខិត្តកំ ភិក្ខុំ ឱសារេត្វា យេន ឧក្ខេបកា ភិក្ខូ…បេ.… តស្ស វត្ថុស្ស វូបសមាយ សង្ឃសាមគ្គិំ ករោមា’’តិ វចនំ ទុវិញ្ញេយ្យវិនិច្ឆយំ វិនយលក្ខណកុសលស្ស។ វិជ្ជមានេ ហិ ការកសង្ឃេ ឥតរោ សង្ឃោ ឱសារិតុំ ន លភតិ។ ឱសារេន្តោ ចេ, តេ ភិក្ខូ ការកសង្ឃេន សមានលទ្ធិកភាវំ បត្តត្តា តេន សមានសំវាសកា ហោន្តិ, តតោ ឧក្ខេបកានំ ឆន្ទំ អគ្គហេត្វា ឱសារេន្តានំ កម្មំ កុប្បតិ, តស្មា ‘‘តេន ហិ, ភិក្ខវេ, តំ ភិក្ខុំ ឱសារេថា’’តិ (មហាវ. ៤៧៤) ភគវតោ វចនេន ឧក្ខិត្តានុវត្តកា ឱសារេសុំ, ឧទាហុ និស្សីមំ គន្ត្វា, ឧទាហុ ឥតរេសំ ឆន្ទំ គហេត្វា ឱសារេសុំ, ននុ ឯតេសមញ្ញតរេនេត្ថ ភវិតព្ពំ, ន ច បនេតំ សព្ពគណ្ឋិបទេសុ វិចារិតំ។ អយំ បនេត្ថ តក្កោ –
475. ‘‘Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū…pe… tassa vatthussa vūpasamāya saṅghasāmaggiṃ karomā’’ti vacanaṃ duviññeyyavinicchayaṃ vinayalakkhaṇakusalassa. Vijjamāne hi kārakasaṅghe itaro saṅgho osārituṃ na labhati. Osārento ce, te bhikkhū kārakasaṅghena samānaladdhikabhāvaṃ pattattā tena samānasaṃvāsakā honti, tato ukkhepakānaṃ chandaṃ aggahetvā osārentānaṃ kammaṃ kuppati, tasmā ‘‘tena hi, bhikkhave, taṃ bhikkhuṃ osārethā’’ti (mahāva. 474) bhagavato vacanena ukkhittānuvattakā osāresuṃ, udāhu nissīmaṃ gantvā, udāhu itaresaṃ chandaṃ gahetvā osāresuṃ, nanu etesamaññatarenettha bhavitabbaṃ, na ca panetaṃ sabbagaṇṭhipadesu vicāritaṃ. Ayaṃ panettha takko –
‘‘យស្មិំ វត្ថុស្មិំ សង្ឃេន, កតកម្មស្ស ភិក្ខុនោ;
‘‘Yasmiṃ vatthusmiṃ saṅghena, katakammassa bhikkhuno;
សតិ តស្មិំ ន អញ្ញស្ស, បដិប្បស្សម្ភនំ ខមំ។
Sati tasmiṃ na aññassa, paṭippassambhanaṃ khamaṃ.
‘‘វិរមន្តេ តតោ ទោសោ, អបិ សង្ឃោ អការកោ;
‘‘Viramante tato doso, api saṅgho akārako;
ឱសារេតុំ អលំ យស្មា, ការកោ អនុលោមិកោ’’តិ។
Osāretuṃ alaṃ yasmā, kārako anulomiko’’ti.
៤៧៧. ‘‘អដ្ឋ ទូតង្គានិ នាម សោតា ច ហោតិ, សាវេតា ច ឧគ្គហេតា ច ធារេតា ច វិញ្ញាតា ច វិញ្ញាបេតា ច កុសលោ ច សហិតាសហិតទស្សនោ ច អកលហការកោ ចាតិ ឯតានី’’តិ វុត្តំ។
477. ‘‘Aṭṭha dūtaṅgāni nāma sotā ca hoti, sāvetā ca uggahetā ca dhāretā ca viññātā ca viññāpetā ca kusalo ca sahitāsahitadassano ca akalahakārako cāti etānī’’ti vuttaṃ.
កោសម្ពកក្ខន្ធកវណ្ណនា និដ្ឋិតា។
Kosambakakkhandhakavaṇṇanā niṭṭhitā.
មហាវគ្គស្ស លីនត្ថបកាសនា និដ្ឋិតា។
Mahāvaggassa līnatthapakāsanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
២៧៨. សង្ឃសាមគ្គីកថា • 278. Saṅghasāmaggīkathā
២៧៩. ឧបាលិសង្ឃសាមគ្គីបុច្ឆា • 279. Upālisaṅghasāmaggīpucchā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / អដ្ឋារសវត្ថុកថា • Aṭṭhārasavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបាលិសង្ឃសាមគ្គីបុច្ឆាវណ្ណនា • Upālisaṅghasāmaggīpucchāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អដ្ឋារសវត្ថុកថាវណ្ណនា • Aṭṭhārasavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២៧៦. អដ្ឋារសវត្ថុកថា • 276. Aṭṭhārasavatthukathā
