| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៧. សំវិធានសិក្ខាបទវណ្ណនា
7. Saṃvidhānasikkhāpadavaṇṇanā
១៨៣. សត្តមេ បាឡិយំ គច្ឆាម ភគិនិ គច្ឆាមាយ្យាតិ ភិក្ខុបុព្ពកំ សំវិធានំ, ឥតរំ ភិក្ខុនិបុព្ពកំ ។ ឯកទ្ធានមគ្គន្តិ ឯកតោ អទ្ធានសង្ខាតំ មគ្គំ។ ហិយ្យោតិ សុវេ។ បរេតិ តតិយេ ទិវសេ។
183. Sattame pāḷiyaṃ gacchāma bhagini gacchāmāyyāti bhikkhupubbakaṃ saṃvidhānaṃ, itaraṃ bhikkhunipubbakaṃ . Ekaddhānamagganti ekato addhānasaṅkhātaṃ maggaṃ. Hiyyoti suve. Pareti tatiye divase.
ទ្វិធា វុត្តប្បការោតិ បាទគមនេ បក្ខគមនេតិ ទ្វិធា វុត្តប្បការោ។ ឧបចារោ ន លព្ភតីតិ យោ បរិក្ខិត្តាទិគាមស្ស ឯកលេឌ្ឌុបាតាទិឧបចារោ វុត្តោ, សោ ឥធ ន លព្ភតិ អាសន្នត្តា។ ឯតេន ច អន្តរឃរេយេវេត្ថ គាមោតិ អធិប្បេតោ, ន សកលំ គាមខេត្តំ។ តត្ថាបិ យត្ថ ឧបចារោ លព្ភតិ, តត្ថ ឧបចារោក្កមនេ ឯវ អាបត្តីតិ ទស្សេតិ។ តេនាហ ‘‘រតនមត្តន្តរោ’’តិអាទិ។ ឧបចារោក្កមនញ្ចេត្ថ ឧបចារព្ភន្តរេ បវិសនមេវ ហោតិ។ តត្ថ អប្បវិសិត្វាបិ ឧបចារតោ ពហិ អទ្ធយោជនព្ភន្តរគតេន មគ្គេន គច្ឆន្តោបិ មគ្គស្ស ទ្វីសុ បស្សេសុ អទ្ធយោជនព្ភន្តរគតំ គាមូបចារំ សព្ពំ ឱក្កមិត្វា គច្ឆតិច្ចេវ វុច្ចតិ។ អទ្ធយោជនតោ ពហិ គតេន មគ្គេន គច្ឆន្តោ ន គាមូបចារគណនាយ ការេតព្ពោ, អទ្ធយោជនគណនាយេវ ការេតព្ពោ។ ឯវញ្ច សតិ អនន្តរសិក្ខាបទេ នាវាយេវ គាមតីរបស្សេន គច្ឆន្តស្ស គាមូបចារគណនាយ អាបត្តិ សមត្ថិតា ហោតិ។ ន ហិ សក្កា នាវាយ គាមូបចារព្ភន្តរេ បវិសិតុំ។ តិណ្ណំ មគ្គានំ សម្ពន្ធដ្ឋានំ សិង្ឃាដកំ។ ឯត្ថន្តរេ សំវិទហិតេតិ ឯត្ថ ន កេវលំ យថាវុត្តរថិកាទីសុ ឯវ សំវិទហនេ ទុក្កដំ, អន្តរាមគ្គេបីតិ អធិប្បាយោ។
Dvidhā vuttappakāroti pādagamane pakkhagamaneti dvidhā vuttappakāro. Upacāro na labbhatīti yo parikkhittādigāmassa ekaleḍḍupātādiupacāro vutto, so idha na labbhati āsannattā. Etena ca antaraghareyevettha gāmoti adhippeto, na sakalaṃ gāmakhettaṃ. Tatthāpi yattha upacāro labbhati, tattha upacārokkamane eva āpattīti dasseti. Tenāha ‘‘ratanamattantaro’’tiādi. Upacārokkamanañcettha upacārabbhantare pavisanameva hoti. Tattha appavisitvāpi upacārato bahi addhayojanabbhantaragatena maggena gacchantopi maggassa dvīsu passesu addhayojanabbhantaragataṃ gāmūpacāraṃ sabbaṃ okkamitvā gacchaticceva vuccati. Addhayojanato bahi gatena maggena gacchanto na gāmūpacāragaṇanāya kāretabbo, addhayojanagaṇanāyeva kāretabbo. Evañca sati anantarasikkhāpade nāvāyeva gāmatīrapassena gacchantassa gāmūpacāragaṇanāya āpatti samatthitā hoti. Na hi sakkā nāvāya gāmūpacārabbhantare pavisituṃ. Tiṇṇaṃ maggānaṃ sambandhaṭṭhānaṃ siṅghāṭakaṃ. Etthantare saṃvidahiteti ettha na kevalaṃ yathāvuttarathikādīsu eva saṃvidahane dukkaṭaṃ, antarāmaggepīti adhippāyo.
អទ្ធយោជនំ អតិក្កមន្តស្សាតិ អសតិ គាមេ អទ្ធយោជនំ អតិក្កមន្តស្ស។ យស្មិញ្ហិ គាមខេត្តភូតេបិ អរញ្ញេ អទ្ធយោជនព្ភន្តរេ គាមោ ន ហោតិ, តម្បិ ឥធ អគាមកំ អរញ្ញន្តិ អធិប្បេតំ, ន វិញ្ឈាដវាទយោ។
Addhayojanaṃ atikkamantassāti asati gāme addhayojanaṃ atikkamantassa. Yasmiñhi gāmakhettabhūtepi araññe addhayojanabbhantare gāmo na hoti, tampi idha agāmakaṃ araññanti adhippetaṃ, na viñjhāṭavādayo.
១៨៥. រដ្ឋភេទេតិ រដ្ឋវិលោបេ។ ចក្កសមារុឡ្ហាតិ ឥរិយាបថចក្កំ, សកដចក្កំ វា សមារុឡ្ហា។ ទ្វិន្នម្បិ សំវិទហិត្វា មគ្គប្បដិបត្តិ, អវិសង្កេតំ, សមយាភាវោ, អនាបទា, គាមន្តរោក្កមនំ វា អទ្ធយោជនាតិក្កមោ វាតិ ឥមានេត្ថ បញ្ច អង្គានិ។ ឯកតោឧបសម្បន្នាទីហិ សទ្ធិំ សំវិធាយ គច្ឆន្តស្ស បន មាតុគាមសិក្ខាបទេន អាបត្តិ។
185.Raṭṭhabhedeti raṭṭhavilope. Cakkasamāruḷhāti iriyāpathacakkaṃ, sakaṭacakkaṃ vā samāruḷhā. Dvinnampi saṃvidahitvā maggappaṭipatti, avisaṅketaṃ, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi saddhiṃ saṃvidhāya gacchantassa pana mātugāmasikkhāpadena āpatti.
សំវិធានសិក្ខាបទវណ្ណនា និដ្ឋិតា។
Saṃvidhānasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ឱវាទវគ្គោ • 3. Ovādavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៧. សំវិធានសិក្ខាបទវណ្ណនា • 7. Saṃvidhānasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៧. សំវិទហនសិក្ខាបទវណ្ណនា • 7. Saṃvidahanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៧. សំវិធានសិក្ខាបទវណ្ណនា • 7. Saṃvidhānasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧. សំវិធានសិក្ខាបទំ • 7. Saṃvidhānasikkhāpadaṃ
