| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
រាធព្រាហ្មណវត្ថុកថា
Rādhabrāhmaṇavatthukathā
៦៩. រាធព្រាហ្មណវត្ថុស្មិំ – កិញ្ចាបិ អាយស្មា សារិបុត្តោ ភគវតា ពារាណសិយំ តីហិ សរណគមនេហិ អនុញ្ញាតំ បព្ពជ្ជញ្ចេវ ឧបសម្បទញ្ច ជានាតិ, ភគវា បន តំ លហុកំ ឧបសម្បទំ បដិក្ខិបិត្វា ញត្តិចតុត្ថកម្មេន គរុកំ កត្វា ឧបសម្បទំ អនុញ្ញាតុកាមោ។ អថស្ស ថេរោ អជ្ឈាសយំ វិទិត្វា ‘‘កថាហំ ភន្តេ តំ ព្រាហ្មណំ បព្ពាជេមិ ឧបសម្បាទេមី’’តិ អាហ។ ពុទ្ធានញ្ហិ បរិសា អជ្ឈាសយកុសលា ហោន្តិ, អយញ្ច ពុទ្ធបរិសាយ អគ្គោ។
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
ព្យត្តេន ភិក្ខុនា បដិពលេនាតិ ឯត្ថ ព្យត្តោ នាម យស្ស សាដ្ឋកថំ វិនយបិដកំ វាចុគ្គតំ បវត្តតិ, តស្មិំ អសតិ យស្ស អន្តមសោ ឥទំ ញត្តិចតុត្ថកម្មវាចាមត្តម្បិ សុគ្គហិតំ ហោតិ, វាចុគ្គតំ បវត្តតិ, អយម្បិ ឥមស្មិំ អត្ថេ ព្យត្តោ។ យោ បន កាសសោសសេម្ហាទិនា វា គេលញ្ញេន ឱដ្ឋទន្តជិវ្ហាទីនំ វា អសម្បត្តិយា បរិយត្តិយំ វា អកតបរិចយត្តា ន សក្កោតិ បរិមណ្ឌលេហិ បទព្យញ្ជនេហិ កម្មវាចំ សាវេតុំ, ព្យញ្ជនំ វា បទំ វា ហាបេតិ, អញ្ញថា វា វត្តព្ពំ អញ្ញថា វទតិ, អយំ អប្បដិពលោ។ តព្ពិបរីតោ ឥមស្មិំ អត្ថេ ‘‘បដិពលោ’’តិ វេទិតព្ពោ។ សង្ឃោ ញាបេតព្ពោតិ សង្ឃោ ជានាបេតព្ពោ។ តតោ បរំ យំ សង្ឃោ ជានាបេតព្ពោ, តំ ទស្សេតុំ ‘‘សុណាតុ មេ ភន្តេ’’តិអាទិមាហ។
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
៧១. ឧបសម្បន្នសមនន្តរាតិ ឧបសម្បន្នោ ហុត្វា សមនន្តរា។ អនាចារំ អាចរតីតិ បណ្ណត្តិវីតិក្កមំ ករោតិ។ ឧល្លុម្បតុ មន្តិ ឧទ្ធរតុ មំ, អកុសលា វុដ្ឋាបេត្វា កុសលេ បតិដ្ឋបេតុ; សាមណេរភាវា វា ឧទ្ធរិត្វា ភិក្ខុភាវេ បតិដ្ឋាបេតូតិ។ អនុកម្បំ ឧបាទាយាតិ អនុទ្ទយំ បដិច្ច; មយិ អនុកប្បំ កត្វាតិ អត្ថោ។
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
៧៣. អដ្ឋិតា ហោតីតិ និច្ចប្បវត្តិនី ហោតិ។ ចត្តារោ និស្សយេតិ ចត្តារោ បច្ចយេ។ យស្មា ចត្តារោ បច្ចយេ និស្សាយ អត្តភាវោ បវត្តតិ, តស្មា តេ និស្សយាតិ វុច្ចន្តិ។
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
រាធព្រាហ្មណវត្ថុកថា និដ្ឋិតា។
Rādhabrāhmaṇavatthukathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៧. បណាមិតកថា • 17. Paṇāmitakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / រាធព្រាហ្មណវត្ថុកថាវណ្ណនា • Rādhabrāhmaṇavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / រាធព្រាហ្មណវត្ថុកថាវណ្ណនា • Rādhabrāhmaṇavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / រាធព្រាហ្មណវត្ថុកថាវណ្ណនា • Rādhabrāhmaṇavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / រាធព្រាហ្មណវត្ថុកថា • Rādhabrāhmaṇavatthukathā
