| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
អាចរិយវត្តកថា
Ācariyavattakathā
៧៥. កិន្តាយំ ភិក្ខុ ហោតីតិ កិំ តេ អយំ ភិក្ខុ ហោតិ។ អញ្ញេហិ ឱវទិយោ អនុសាសិយោតិ អញ្ញេហិ ឱវទិតព្ពោ ចេវ អនុសាសិតព្ពោ ច។ ពាហុល្លាយ អាវត្តោ យទិទំ គណពន្ធិកន្តិ គណពន្ធោ ឯតស្ស ពាហុល្លស្ស អត្ថីតិ គណពន្ធិកំ, ពាហុល្លំ។ យំ ឥទំ គណពន្ធិកំ នាម ពាហុល្លំ, តទត្ថាយ អតិលហុំ ត្វំ អាបន្នោតិ វុត្តំ ហោតិ។
75.Kintāyaṃ bhikkhu hotīti kiṃ te ayaṃ bhikkhu hoti. Aññehi ovadiyo anusāsiyoti aññehi ovaditabbo ceva anusāsitabbo ca. Bāhullāya āvatto yadidaṃ gaṇabandhikanti gaṇabandho etassa bāhullassa atthīti gaṇabandhikaṃ, bāhullaṃ. Yaṃ idaṃ gaṇabandhikaṃ nāma bāhullaṃ, tadatthāya atilahuṃ tvaṃ āpannoti vuttaṃ hoti.
៧៦. អព្យត្តាតិ បញ្ញាវេយ្យត្តិយេន វិរហិតា។ អញ្ញត្តរោបិ អញ្ញតិត្ថិយបុព្ពោតិ បសូរោ បរិព្ពាជកោ។ សោ កិរ ‘‘ធម្មំ ថេនេស្សាមី’’តិ ឧទាយិត្ថេរស្ស សន្តិកេ បព្ពជិត្វា តេន សហធម្មិកំ វុច្ចមានោ តស្ស វាទំ អារោបេសិ។ អនុជានាមិ ភិក្ខវេ ព្យត្តេន ភិក្ខុនាតិអាទិម្ហិ ព្យត្តោ បុព្ពេ ភិក្ខុនោវាទកវណ្ណនាយំ វុត្តលក្ខណោយេវ។ យោ បន អន្តេវាសិនោ វា សទ្ធិវិហារិកស្ស វា គិលានស្ស សក្កោតិ ឧបដ្ឋានាទីនិ កាតុំ, អយំ ឥធ បដិពលោតិ អធិប្បេតោ។ វុត្តម្បិ ចេតំ –
76.Abyattāti paññāveyyattiyena virahitā. Aññattaropi aññatitthiyapubboti pasūro paribbājako. So kira ‘‘dhammaṃ thenessāmī’’ti udāyittherassa santike pabbajitvā tena sahadhammikaṃ vuccamāno tassa vādaṃ āropesi. Anujānāmi bhikkhave byattena bhikkhunātiādimhi byatto pubbe bhikkhunovādakavaṇṇanāyaṃ vuttalakkhaṇoyeva. Yo pana antevāsino vā saddhivihārikassa vā gilānassa sakkoti upaṭṭhānādīni kātuṃ, ayaṃ idha paṭibaloti adhippeto. Vuttampi cetaṃ –
‘‘បញ្ចហុបាលិ , អង្គេហិ សមន្នាគតេន ភិក្ខុនា ឧបសម្បាទេតព្ពំ, និស្សយោ ទាតព្ពោ, សាមណេរោ ឧបដ្ឋាបេតព្ពោ។ កតមេហិ បញ្ចហិ? បដិពលោ ហោតិ អន្តេវាសិំ វា សទ្ធិវិហារិំ វា គិលានំ ឧបដ្ឋាតុំ វា ឧបដ្ឋាបេតុំ វា, អនភិរតំ វូបកាសេតុំ វា វូបកាសាបេតុំ វា, ឧប្បន្នំ កុក្កុច្ចំ ធម្មតោ វិនោទេតុំ, អភិធម្មេ វិនេតុំ, អភិវិនយេ វិនេតូ’’ន្តិ (បរិ. ៤១៨)។
‘‘Pañcahupāli , aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetū’’nti (pari. 418).
៧៧. បក្ខសង្កន្តេសូតិ តិត្ថិយបក្ខសង្កន្តេសុ។ អនុជានាមិ ភិក្ខវេ អាចរិយន្តិ អាចារសមាចារសិក្ខាបនកំ អាចរិយំ អនុជានាមិ។ អាចរិយោ ភិក្ខវេ អន្តេវាសិកម្ហីតិអាទិ សព្ពំ ‘‘ឧបជ្ឈាយោ ភិក្ខវេ សទ្ធិវិហារិកម្ហី’’តិអាទិនា នយេន វុត្តវសេនេវ វេទិតព្ពំ។ នាមមត្តមេវ ហិ ឯត្ថ នានំ។
77.Pakkhasaṅkantesūti titthiyapakkhasaṅkantesu. Anujānāmi bhikkhave ācariyanti ācārasamācārasikkhāpanakaṃ ācariyaṃ anujānāmi. Ācariyo bhikkhave antevāsikamhītiādi sabbaṃ ‘‘upajjhāyo bhikkhave saddhivihārikamhī’’tiādinā nayena vuttavaseneva veditabbaṃ. Nāmamattameva hi ettha nānaṃ.
អាចរិយវត្តកថា និដ្ឋិតា។
Ācariyavattakathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៨. អាចរិយវត្តកថា • 18. Ācariyavattakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អាចរិយវត្តកថាវណ្ណនា • Ācariyavattakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អាចរិយវត្តកថាវណ្ណនា • Ācariyavattakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អាចរិយវត្តកថាវណ្ណនា • Ācariyavattakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១៨. អាចរិយវត្តកថា • 18. Ācariyavattakathā
