| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
រាធព្រាហ្មណវត្ថុកថាវណ្ណនា
Rādhabrāhmaṇavatthukathāvaṇṇanā
៦៩. រាធព្រាហ្មណវត្ថុស្មិំ បាឡិយំ ឧប្បណ្ឌុប្បណ្ឌុកជាតោតិ សកលសរីរេ សញ្ជាតបណ្ឌុវណ្ណោ។ បណ្ឌុវណ្ណស្ស សកលសរីរេ ព្យាបិតភាវទស្សនត្ថញ្ហិ វិច្ឆាវចនំ កតំ។ អធិការន្តិ ឧបការំ។ កតវេទិនោតិ អត្តនោ កតំ ឧបការំ បដិកិរិយាយ ញាបកា។ ឧបសម្បទាកម្មវាចាយ យំ វត្តព្ពំ, តំ បរិយោសានេ វក្ខាម។ បរិមណ្ឌលេហីតិ បរិបុណ្ណេហិ។
69. Rādhabrāhmaṇavatthusmiṃ pāḷiyaṃ uppaṇḍuppaṇḍukajātoti sakalasarīre sañjātapaṇḍuvaṇṇo. Paṇḍuvaṇṇassa sakalasarīre byāpitabhāvadassanatthañhi vicchāvacanaṃ kataṃ. Adhikāranti upakāraṃ. Katavedinoti attano kataṃ upakāraṃ paṭikiriyāya ñāpakā. Upasampadākammavācāya yaṃ vattabbaṃ, taṃ pariyosāne vakkhāma. Parimaṇḍalehīti paripuṇṇehi.
៧១-៧៣. បណ្ណត្តិវីតិក្កមន្តិ សិក្ខាបទវីតិក្កមំ។ បាឡិយំ បិណ្ឌិយាលោបភោជនន្តិ ជង្ឃបិណ្ឌិមំសពលេន ចរិត្វា អាលោបាលោបវសេន បរិយិដ្ឋភោជនំ។ អតិរេកលាភោតិ ភិក្ខាហារតោ អធិកលាភោ។ សង្ឃភត្តាទីនំ វិភាគោ សេនាសនក្ខន្ធកេ អាវិ ភវិស្សតិ។ វិហារោតិ តិណកុដិកាទិសហិតោ បាការបរិច្ឆិន្នោ សកលោ សង្ឃារាមោ។ អឌ្ឍយោគោតិ ឯកសាលោ ទីឃបាសាទោ។ ហត្ថិបិដ្ឋិគរុឡសណ្ឋានោ ទីឃបាសាទោតិបិ វទន្តិ។ បាសាទោតិ ចតុរស្សោ ឧច្ចោ អនេកភូមកបាសាទោ។ ហម្មិយន្តិ មុណ្ឌច្ឆទនោ ចន្ទិកង្គណយុត្តោ នាតិឧច្ចោ បាសាទោ។ គុហាតិ បព្ពតគុហា។ បូតិមុត្តន្តិ គោមុត្តំ។
71-73.Paṇṇattivītikkamanti sikkhāpadavītikkamaṃ. Pāḷiyaṃ piṇḍiyālopabhojananti jaṅghapiṇḍimaṃsabalena caritvā ālopālopavasena pariyiṭṭhabhojanaṃ. Atirekalābhoti bhikkhāhārato adhikalābho. Saṅghabhattādīnaṃ vibhāgo senāsanakkhandhake āvi bhavissati. Vihāroti tiṇakuṭikādisahito pākāraparicchinno sakalo saṅghārāmo. Aḍḍhayogoti ekasālo dīghapāsādo. Hatthipiṭṭhigaruḷasaṇṭhāno dīghapāsādotipi vadanti. Pāsādoti caturasso ucco anekabhūmakapāsādo. Hammiyanti muṇḍacchadano candikaṅgaṇayutto nātiucco pāsādo. Guhāti pabbataguhā. Pūtimuttanti gomuttaṃ.
រាធព្រាហ្មណវត្ថុកថាវណ្ណនា និដ្ឋិតា។
Rādhabrāhmaṇavatthukathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៧. បណាមិតកថា • 17. Paṇāmitakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / រាធព្រាហ្មណវត្ថុកថា • Rādhabrāhmaṇavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / រាធព្រាហ្មណវត្ថុកថាវណ្ណនា • Rādhabrāhmaṇavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / រាធព្រាហ្មណវត្ថុកថាវណ្ណនា • Rādhabrāhmaṇavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / រាធព្រាហ្មណវត្ថុកថា • Rādhabrāhmaṇavatthukathā
