| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
១២១. បវារណាភេទកថា
121. Pavāraṇābhedakathā
២១២. ចាតុទ្ទសិកាយាតិ ភណ្ឌនការកេហិ ឧបទ្ទុតត្តា បច្ចុក្កឌ្ឍិតាយ បុព្ពកត្តិកមាសស្ស កាឡបក្ខចាតុទ្ទសិកាយ។ ‘‘អជ្ជ បវារណា បន្នរសី’’តិ បុព្ពកិច្ចំ កាតព្ពន្តិ យោជនា។
212.Cātuddasikāyāti bhaṇḍanakārakehi upaddutattā paccukkaḍḍhitāya pubbakattikamāsassa kāḷapakkhacātuddasikāya. ‘‘Ajja pavāraṇā pannarasī’’ti pubbakiccaṃ kātabbanti yojanā.
បវារណាកម្មេសូតិ និទ្ធារណេ ភុម្មំ, ‘‘អធម្មេន វគ្គំ បវារណាកម្ម’’ន្តិអាទីសុ សម្ពន្ធិតព្ពំ។ អធម្មេន វគ្គន្តិ ឯត្ថ អធម្មំ នាម សង្ឃោ ហុត្វាបិ សង្ឃបវារណមកត្វា គណបវារណាយ ករណំ, គណោ ហុត្វាបិ គណបវារណមកត្វា សង្ឃបវារណាយ ករណញ្ច។ វគ្គំ នាម ឯកសីមាយំ វសន្តានម្បិ សព្ពេសំ ឯកតោ អសន្និបតនំ។
Pavāraṇākammesūti niddhāraṇe bhummaṃ, ‘‘adhammena vaggaṃ pavāraṇākamma’’ntiādīsu sambandhitabbaṃ. Adhammena vagganti ettha adhammaṃ nāma saṅgho hutvāpi saṅghapavāraṇamakatvā gaṇapavāraṇāya karaṇaṃ, gaṇo hutvāpi gaṇapavāraṇamakatvā saṅghapavāraṇāya karaṇañca. Vaggaṃ nāma ekasīmāyaṃ vasantānampi sabbesaṃ ekato asannipatanaṃ.
អធម្មេន សមគ្គន្តិ ឯត្ថ អធម្មំ វុត្តនយមេវ។ សមគ្គំ នាម សព្ពេសំ ឯកតោ សន្និបតនំ។
Adhammena samagganti ettha adhammaṃ vuttanayameva. Samaggaṃ nāma sabbesaṃ ekato sannipatanaṃ.
ធម្មេន វគ្គន្តិ ឯត្ថ ធម្មំ នាម សង្ឃោ ហុត្វា សង្ឃបវារណាយ ករណំ, គណោ ហុត្វា គណបវារណាយ ករណញ្ច។ វគ្គំ វុត្តនយមេវ។ ធម្មេន សមគ្គំ សុវិញ្ញេយ្យមេវ។ ឥតិសទ្ទោ បរិសមាបនត្ថោ។
Dhammena vagganti ettha dhammaṃ nāma saṅgho hutvā saṅghapavāraṇāya karaṇaṃ, gaṇo hutvā gaṇapavāraṇāya karaṇañca. Vaggaṃ vuttanayameva. Dhammena samaggaṃ suviññeyyameva. Itisaddo parisamāpanattho.
២១៣. ឯវំ ទិន្នាយាតិ ឯវំ បាឡិយំ វុត្តនយេនេវ ទិន្នាយ។ បវារេតព្ពន្តិ វស្សំវុត្ថបវារណាយ បវារេតព្ពំ។ តិស្សោតិ តិស្សនាមកោ។ ទិដ្ឋេន វា វទតូតិ សម្ពន្ធោ។ តន្តិ តិស្សនាមកំ ភិក្ខុំ។ សង្ឃោ អនុកម្បំ ឧបាទាយ វទតូតិ យោជនា។ វុឌ្ឍតរោតិ បវារណាទាយកោ តំហារកតោ វុឌ្ឍតរោ។ ហីតិ លទ្ធគុណោ។ តេនាតិ បវារណាហារកេន។ តស្សាតិ បវារណាទាយកស្ស។
213.Evaṃ dinnāyāti evaṃ pāḷiyaṃ vuttanayeneva dinnāya. Pavāretabbanti vassaṃvutthapavāraṇāya pavāretabbaṃ. Tissoti tissanāmako. Diṭṭhena vā vadatūti sambandho. Tanti tissanāmakaṃ bhikkhuṃ. Saṅgho anukampaṃ upādāya vadatūti yojanā. Vuḍḍhataroti pavāraṇādāyako taṃhārakato vuḍḍhataro. Hīti laddhaguṇo. Tenāti pavāraṇāhārakena. Tassāti pavāraṇādāyakassa.
ឥធាបិ ចាតិ ឥមស្មិំ បវារណាក្ខន្ធកេបិ ច។ អបិសទ្ទោ ឧបោសថក្ខន្ធកំ អបេក្ខតិ។ អវសេសកម្មត្ថាយាតិ បវារណាកម្មតោ អវសេសានំ កម្មានមត្ថាយ ហោតីតិ សម្ពន្ធោ។ បវារណាយ អាហដាយ សតិយាតិ យោជនា។ តស្ស ចាតិ បវារណាទាយកស្ស ច។ សព្ពេសន្តិ បវារណាទាយកស្ស ច សង្ឃស្ស ចាតិ សព្ពេសំ។ អញ្ញំ បន កម្មន្តិ បវារណាកម្មតោ អញ្ញំ កម្មំ បន។ តេន បន ភិក្ខុនាតិ បវារណាទាយកេន ភិក្ខុនា បន។ ឯត្ថ ច តទហុបវារណាយ អត្តនោ ច សង្ឃស្ស ច សចេ បវារណាកម្មមេវ ហោតិ, បវារណាយេវ ទាតព្ពា។ អថ អញ្ញមេវ កម្មំ ហោតិ, ឆន្ទោយេវ ទាតព្ពោ។ យទិ បវារណាកម្មញ្ច អញ្ញកម្មញ្ច ហោតិ, បវារណា ច ឆន្ទោ ច ទាតព្ពោ ។ តំ សន្ធាយ វុត្តំ ‘‘តទហុ បវារណាយ បវារណំ ទេន្តេន ឆន្ទម្បិ ទាតុ’’ន្តិ (មហាវ. ២១៣)។ តេនាតិ ទានហេតុនា។
Idhāpi cāti imasmiṃ pavāraṇākkhandhakepi ca. Apisaddo uposathakkhandhakaṃ apekkhati. Avasesakammatthāyāti pavāraṇākammato avasesānaṃ kammānamatthāya hotīti sambandho. Pavāraṇāya āhaṭāya satiyāti yojanā. Tassa cāti pavāraṇādāyakassa ca. Sabbesanti pavāraṇādāyakassa ca saṅghassa cāti sabbesaṃ. Aññaṃ pana kammanti pavāraṇākammato aññaṃ kammaṃ pana. Tena pana bhikkhunāti pavāraṇādāyakena bhikkhunā pana. Ettha ca tadahupavāraṇāya attano ca saṅghassa ca sace pavāraṇākammameva hoti, pavāraṇāyeva dātabbā. Atha aññameva kammaṃ hoti, chandoyeva dātabbo. Yadi pavāraṇākammañca aññakammañca hoti, pavāraṇā ca chando ca dātabbo . Taṃ sandhāya vuttaṃ ‘‘tadahu pavāraṇāya pavāraṇaṃ dentena chandampi dātu’’nti (mahāva. 213). Tenāti dānahetunā.
២១៨. អជ្ជ មេ បវារណាតិ ឯត្ថ បាឡិនយតោ អញ្ញំ អដ្ឋកថានយំ ទស្សេន្តោ អាហ ‘‘សចេ’’តិអាទិ។
218.Ajja me pavāraṇāti ettha pāḷinayato aññaṃ aṭṭhakathānayaṃ dassento āha ‘‘sace’’tiādi.
២១៩. វុត្តនយមេវាតិ ឧបោសថក្ខន្ធកេ (មហាវ. អដ្ឋ. ១៦៩) វុត្តនយមេវ។
219.Vuttanayamevāti uposathakkhandhake (mahāva. aṭṭha. 169) vuttanayameva.
២២២. បុន បវារេតព្ពន្តិ ឯត្ថ ន កេវលំ បវារណាយេវ បុន កាតព្ពា, បុព្ពកិច្ចាទីនិបិ បុន កាតព្ពានីតិ ទស្សេន្តោ អាហ ‘‘បុន បុព្ពកិច្ច’’ន្តិអាទិ។
222.Puna pavāretabbanti ettha na kevalaṃ pavāraṇāyeva puna kātabbā, pubbakiccādīnipi puna kātabbānīti dassento āha ‘‘puna pubbakicca’’ntiādi.
២២៨. ឯសេវ នយោតិ ‘‘អជ្ជ បវារណា បន្នរសី’’តិ បុព្ពកិច្ចំ អតិទិសតិ។ អស្សាតិ វចនស្ស។ ញត្តិន្តិ ‘‘សុណាតុ មេ ភន្តេ សង្ឃោ អជ្ជ បវារណា’’តិ ញត្តិំ។ បច្ឆិមេហីតិ បច្ឆិមវស្សំ ឧបគតេហិ ភិក្ខូហិ។ ឧបោសថគ្គេតិ ឧបោសថស្ស គណ្ហនដ្ឋានេ គេហេ។ ទ្វេ ញត្តិយោតិ បវារណាញត្តិ ច ឧបោសថញត្តិ ចាតិ ទ្វេ ញត្តិយោ។ ឥទញ្ចាតិ ឥទំ វក្ខមានំ បន។ ឯត្ថាតិ បុរិមិកបច្ឆិមិកភិក្ខូនំ សំសគ្គដ្ឋានេ។ បុរិមិកាយ ឧបគតេហីតិ វិភត្តអបាទានំ អនុមេយ្យវិសយអបាទានំ, ថោកតរាតិ សម្ពន្ធោ, សហាទិយោគោ វា, សមសមាតិ សម្ពន្ធោ។ សមសមាតិ សមេន, សមតោ វា សមា សមសមា, អតិរេកសមាតិ អត្ថោ។ កិញ្ចិ ឩនំ វា អធិកំ វា នត្ថីតិ អធិប្បាយោ។ ឥតីតិ ឥទំ លក្ខណំ។
228.Eseva nayoti ‘‘ajja pavāraṇā pannarasī’’ti pubbakiccaṃ atidisati. Assāti vacanassa. Ñattinti ‘‘suṇātu me bhante saṅgho ajja pavāraṇā’’ti ñattiṃ. Pacchimehīti pacchimavassaṃ upagatehi bhikkhūhi. Uposathaggeti uposathassa gaṇhanaṭṭhāne gehe. Dve ñattiyoti pavāraṇāñatti ca uposathañatti cāti dve ñattiyo. Idañcāti idaṃ vakkhamānaṃ pana. Etthāti purimikapacchimikabhikkhūnaṃ saṃsaggaṭṭhāne. Purimikāya upagatehīti vibhattaapādānaṃ anumeyyavisayaapādānaṃ, thokatarāti sambandho, sahādiyogo vā, samasamāti sambandho. Samasamāti samena, samato vā samā samasamā, atirekasamāti attho. Kiñci ūnaṃ vā adhikaṃ vā natthīti adhippāyo. Itīti idaṃ lakkhaṇaṃ.
សោតិ បច្ឆិមិកោ ភិក្ខុ។ ឥតរេនាតិ បច្ឆិមិកេន។ តេសន្តិ បុរិមិកានំ។ ឯកេនាតិ បុរិមិកេន។ ឯកស្សាតិ បច្ឆិមិកស្ស។ បុន ឯកេនាតិ បច្ឆិមិកេន។ ‘‘ឯកស្សា’’តិ អនុវត្តេតព្ពោ, បុរិមិកស្សាតិ អត្ថោ។ បុរិមវស្សូបគតេហិ អធិកតរាតិ សម្ពន្ធោ។ ថោកតរេហីតិ បច្ឆិមវស្សូបគតេហិ ថោកតរេហិ បុរិមវស្សូបគតេហីតិ យោជនា។
Soti pacchimiko bhikkhu. Itarenāti pacchimikena. Tesanti purimikānaṃ. Ekenāti purimikena. Ekassāti pacchimikassa. Puna ekenāti pacchimikena. ‘‘Ekassā’’ti anuvattetabbo, purimikassāti attho. Purimavassūpagatehi adhikatarāti sambandho. Thokatarehīti pacchimavassūpagatehi thokatarehi purimavassūpagatehīti yojanā.
កត្តិកាយាតិ បច្ឆិមកត្តិកាយ។ ចាតុមាសិនិយា បវារណាយាតិ ចតុន្នំ មាសានំ បូរណិយា បវារណាយ។ បវារណាញត្តិំ ឋបេត្វាតិ សមសមា ហុត្វាបិ បវារណាទិវសត្តា បវារណាញត្តិំ ឋបេត្វា។ តេហីតិ បច្ឆិមិកេហិ។ ឥតរេហីតិ បុរិមិកេហិ។ តេសន្តិ បច្ឆិមិកានំ។ ថោកតរា វាតិ ឯកាទិនា ថោកតរា វា។ តេសន្តិ បុរិមិកានំ។ តេហីតិ បច្ឆិមិកេហិ។
Kattikāyāti pacchimakattikāya. Cātumāsiniyā pavāraṇāyāti catunnaṃ māsānaṃ pūraṇiyā pavāraṇāya. Pavāraṇāñattiṃ ṭhapetvāti samasamā hutvāpi pavāraṇādivasattā pavāraṇāñattiṃ ṭhapetvā. Tehīti pacchimikehi. Itarehīti purimikehi. Tesanti pacchimikānaṃ. Thokatarā vāti ekādinā thokatarā vā. Tesanti purimikānaṃ. Tehīti pacchimikehi.
២៣៣. សង្ឃសាមគ្គិយាតិ ឯត្ថ កីទិសី សង្ឃសាមគ្គី វេទិតព្ពាតិ អាហ ‘‘កោសម្ពកសាមគ្គីសទិសាវ វេទិតព្ពា’’តិ។ ឯត្ថាតិ សាមគ្គីបវារណាយំ។ អប្បមត្តកេតិ បត្តចីវរាទិំ បដិច្ច ឧប្បន្នេ អប្បមត្តកេ វិវាទេ។ បវារណាយមេវាតិ បវារណាទិវសេយេវ។ កស្មិំ ទិវសេ សាមគ្គីបវារណា កាតព្ពាតិ អាហ ‘‘សាមគ្គីបវារណ’’ន្តិអាទិ។ បឋមបវារណន្តិ បុព្ពកត្តិកបុណ្ណមិំ។ យាវ កត្តិកចាតុមាសិនី បុណ្ណមាតិ អយំ អវធិ អនភិវិធិអវធិ នាម។ កស្មា? កត្តិកចាតុមាសិនិបុណ្ណមិំ ឋបេត្វា អន្តោយេវ គហេតព្ពត្តា។ ឯត្ថន្តរេតិ ឯតស្មិំ ទ្វិន្នំ បុណ្ណមិនមន្តរេ អដ្ឋវីសតិបមាណេ ទិវសេ កាតព្ពា។ តតោតិ ឯត្ថន្តរសង្ខាតា អដ្ឋវីសទិវសតោ។
233.Saṅghasāmaggiyāti ettha kīdisī saṅghasāmaggī veditabbāti āha ‘‘kosambakasāmaggīsadisāva veditabbā’’ti. Etthāti sāmaggīpavāraṇāyaṃ. Appamattaketi pattacīvarādiṃ paṭicca uppanne appamattake vivāde. Pavāraṇāyamevāti pavāraṇādivaseyeva. Kasmiṃ divase sāmaggīpavāraṇā kātabbāti āha ‘‘sāmaggīpavāraṇa’’ntiādi. Paṭhamapavāraṇanti pubbakattikapuṇṇamiṃ. Yāva kattikacātumāsinī puṇṇamāti ayaṃ avadhi anabhividhiavadhi nāma. Kasmā? Kattikacātumāsinipuṇṇamiṃ ṭhapetvā antoyeva gahetabbattā. Etthantareti etasmiṃ dvinnaṃ puṇṇaminamantare aṭṭhavīsatipamāṇe divase kātabbā. Tatoti etthantarasaṅkhātā aṭṭhavīsadivasato.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
១២១. បវារណាភេទា • 121. Pavāraṇābhedā
១២២. បវារណាទានានុជាននា • 122. Pavāraṇādānānujānanā
១២៤. សង្ឃបវារណាទិប្បភេទា • 124. Saṅghapavāraṇādippabhedā
១២៥. អាបត្តិបដិកម្មវិធិ • 125. Āpattipaṭikammavidhi
១២៨. អនាបត្តិបន្នរសកំ • 128. Anāpattipannarasakaṃ
១៣៤. ទិវសនានត្តំ • 134. Divasanānattaṃ
១៣៩. វជ្ជនីយបុគ្គលសន្ទស្សនា • 139. Vajjanīyapuggalasandassanā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā
បវារណាភេទកថា • Pavāraṇābhedakathā
បវារណាទានានុជាននកថា • Pavāraṇādānānujānanakathā
អនាបត្តិបន្នរសកាទិកថា • Anāpattipannarasakādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā
បវារណាភេទកថាវណ្ណនា • Pavāraṇābhedakathāvaṇṇanā
បវារណាទានានុជាននកថាវណ្ណនា • Pavāraṇādānānujānanakathāvaṇṇanā
អនាបត្តិបន្នរសកកថាវណ្ណនា • Anāpattipannarasakakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
បវារណាភេទវណ្ណនា • Pavāraṇābhedavaṇṇanā
បវារណាទានានុជាននកថាវណ្ណនា • Pavāraṇādānānujānanakathāvaṇṇanā
អនាបត្តិបន្នរសកាទិកថាវណ្ណនា • Anāpattipannarasakādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អផាសុវិហារកថាទិវណ្ណនា • Aphāsuvihārakathādivaṇṇanā
