| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១២១. បវារណាភេទា
121. Pavāraṇābhedā
២១២. អថ ខោ ភិក្ខូនំ ឯតទហោសិ – ‘‘កតិ នុ ខោ បវារណា’’តិ? ភគវតោ ឯតមត្ថំ អារោចេសុំ។ ទ្វេមា, ភិក្ខវេ, បវារណា – ចាតុទ្ទសិកា ច បន្នរសិកា ច។ ឥមា ខោ, ភិក្ខវេ, ទ្វេ បវារណាតិ។
212. Atha kho bhikkhūnaṃ etadahosi – ‘‘kati nu kho pavāraṇā’’ti? Bhagavato etamatthaṃ ārocesuṃ. Dvemā, bhikkhave, pavāraṇā – cātuddasikā ca pannarasikā ca. Imā kho, bhikkhave, dve pavāraṇāti.
អថ ខោ ភិក្ខូនំ ឯតទហោសិ – ‘‘កតិ នុ ខោ បវារណកម្មានី’’តិ? 1 ភគវតោ ឯតមត្ថំ អារោចេសុំ។ ចត្តារិមានិ, ភិក្ខវេ, បវារណកម្មានិ – អធម្មេន វគ្គំ បវារណកម្មំ, អធម្មេន សមគ្គំ បវារណកម្មំ, ធម្មេន វគ្គំ បវារណកម្មំ, ធម្មេន សមគ្គំ បវារណកម្មំ។ តត្រ, ភិក្ខវេ, យទិទំ អធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ អធម្មេន សមគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន សមគ្គំ បវារណកម្មំ, ឯវរូបំ, ភិក្ខវេ, បវារណកម្មំ កាតព្ពំ; ឯវរូបញ្ច មយា បវារណកម្មំ អនុញ្ញាតំ។ តស្មាតិហ, ភិក្ខវេ, ឯវរូបំ បវារណកម្មំ ករិស្សាម យទិទំ ធម្មេន សមគ្គន្តិ, ឯវញ្ហិ វោ, ភិក្ខវេ, សិក្ខិតព្ពន្តិ។
Atha kho bhikkhūnaṃ etadahosi – ‘‘kati nu kho pavāraṇakammānī’’ti? 2 Bhagavato etamatthaṃ ārocesuṃ. Cattārimāni, bhikkhave, pavāraṇakammāni – adhammena vaggaṃ pavāraṇakammaṃ, adhammena samaggaṃ pavāraṇakammaṃ, dhammena vaggaṃ pavāraṇakammaṃ, dhammena samaggaṃ pavāraṇakammaṃ. Tatra, bhikkhave, yadidaṃ adhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ adhammena samaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena samaggaṃ pavāraṇakammaṃ, evarūpaṃ, bhikkhave, pavāraṇakammaṃ kātabbaṃ; evarūpañca mayā pavāraṇakammaṃ anuññātaṃ. Tasmātiha, bhikkhave, evarūpaṃ pavāraṇakammaṃ karissāma yadidaṃ dhammena samagganti, evañhi vo, bhikkhave, sikkhitabbanti.
បវារណាភេទា និដ្ឋិតា។
Pavāraṇābhedā niṭṭhitā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / បវារណាភេទកថា • Pavāraṇābhedakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បវារណាភេទកថាវណ្ណនា • Pavāraṇābhedakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បវារណាភេទវណ្ណនា • Pavāraṇābhedavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១២១. បវារណាភេទកថា • 121. Pavāraṇābhedakathā
