| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១២២. បវារណាទានានុជាននា
122. Pavāraṇādānānujānanā
២១៣. អថ ខោ ភគវា ភិក្ខូ អាមន្តេសិ – ‘‘សន្និបតថ, ភិក្ខវេ។ សង្ឃោ បវារេស្សតី’’តិ។ ឯវំ វុត្តេ អញ្ញតរោ ភិក្ខុ ភគវន្តំ ឯតទវោច – ‘‘អត្ថិ, ភន្តេ, ភិក្ខុ គិលានោ , សោ អនាគតោ’’តិ។ អនុជានាមិ, ភិក្ខវេ, គិលានេន ភិក្ខុនា បវារណំ ទាតុំ។ ឯវញ្ច បន, ភិក្ខវេ, ទាតព្ពា – តេន គិលានេន ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘បវារណំ ទម្មិ, បវារណំ មេ ហរ, បវារណំ មេ អារោចេហិ, មមត្ថាយ បវារេហី’’តិ កាយេន វិញ្ញាបេតិ, វាចាយ វិញ្ញាបេតិ, កាយេន វាចាយ វិញ្ញាបេតិ, ទិន្នា ហោតិ បវារណា; ន កាយេន វិញ្ញាបេតិ, ន វាចាយ វិញ្ញាបេតិ, ន កាយេន វាចាយ វិញ្ញាបេតិ, ន ទិន្នា ហោតិ បវារណា។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, សោ, ភិក្ខវេ, គិលានោ ភិក្ខុ មញ្ចេន វា បីឋេន វា សង្ឃមជ្ឈេ អានេត្វា បវារេតព្ពំ។ សចេ, ភិក្ខវេ, គិលានុបដ្ឋាកានំ ភិក្ខូនំ ឯតទហោសិ – ‘‘សចេ ខោ មយំ គិលានំ ឋានា ចាវេស្សាម, អាពាធោ វា អភិវឌ្ឍិស្សតិ, កាលំកិរិយា វា ភវិស្សតី’’តិ ន, ភិក្ខវេ, គិលានោ ភិក្ខុ ឋានា ចាវេតព្ពោ។ សង្ឃេន តត្ថ គន្ត្វា បវារេតព្ពំ; ន ត្វេវ វគ្គេន សង្ឃេន បវារេតព្ពំ។ បវារេយ្យ ចេ, អាបត្តិ ទុក្កដស្ស។
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
បវារណហារកោ 1 ចេ, ភិក្ខវេ, ទិន្នាយ បវារណាយ តត្ថេវ បក្កមតិ, អញ្ញស្ស ទាតព្ពា បវារណា។ បវារណហារកោ ចេ, ភិក្ខវេ, ទិន្នាយ បវារណាយ តត្ថេវ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ … លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អញ្ញស្ស ទាតព្ពា បវារណា។
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
បវារណហារកោ ចេ, ភិក្ខវេ, ទិន្នាយ បវារណាយ អន្តរាមគ្គេ បក្កមតិ, អនាហដា ហោតិ បវារណា។ បវារណហារកោ ចេ, ភិក្ខវេ, ទិន្នាយ បវារណាយ អន្តរាមគ្គេ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ… លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អនាហដា ហោតិ បវារណា។
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ បក្កមតិ, អាហដា ហោតិ បវារណា។ បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ… លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អាហដា ហោតិ បវារណា។
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ សុត្តោ នារោចេតិ, អាហដា ហោតិ បវារណា។ បវារណហារកស្ស អនាបត្តិ ។ បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ បមត្តោ នារោចេតិ…បេ.… សមាបន្នោ នារោចេតិ, អាហដា ហោតិ បវារណា។ បវារណហារកស្ស អនាបត្តិ។
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
បវារណហារកោ ចេ, ភិក្ខវេ , ទិន្នាយ បវារណាយ សង្ឃប្បត្តោ សញ្ចិច្ច នារោចេតិ, អាហដា ហោតិ បវារណា។ បវារណហារកស្ស អាបត្តិ ទុក្កដស្ស។ អនុជានាមិ, ភិក្ខវេ, តទហុ បវារណាយ បវារណំ ទេន្តេន ឆន្ទម្បិ ទាតុំ, សន្តិ សង្ឃស្ស ករណីយន្តិ។
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
បវារណាទានានុជាននា និដ្ឋិតា។
Pavāraṇādānānujānanā niṭṭhitā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / បវារណាទានានុជាននកថា • Pavāraṇādānānujānanakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បវារណាទានានុជាននកថាវណ្ណនា • Pavāraṇādānānujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បវារណាទានានុជាននកថាវណ្ណនា • Pavāraṇādānānujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អផាសុវិហារកថាទិវណ្ណនា • Aphāsuvihārakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១២១. បវារណាភេទកថា • 121. Pavāraṇābhedakathā
