សំយុត្ត និកាយ ២៧។១០

១។ កិលេសវគ្គ

ខន្ធសុត្ត

សាវត្ថិនិទានំ។

“យោ, ភិក្ខវេ, រូបស្មិំ ឆន្ទរាគោ, ចិត្តស្សេសោ ឧបក្កិលេសោ …បេ… យោ វិញ្ញាណស្មិំ ឆន្ទរាគោ, ចិត្តស្សេសោ ឧបក្កិលេសោ។ យតោ ខោ, ភិក្ខវេ, ភិក្ខុនោ ឥមេសុ បញ្ចសុ ឋានេសុ ចេតសោ ឧបក្កិលេសោ បហីនោ ហោតិ, នេក្ខម្មនិន្នញ្ចស្ស ចិត្តំ ហោតិ។ នេក្ខម្មបរិភាវិតំ ចិត្តំ កម្មនិយំ ខាយតិ, អភិញ្ញា សច្ឆិករណីយេសុ ធម្មេសូ”តិ។

ទសមំ។

កិលេសវគ្គោ បឋមោ។

តស្សុទ្ទានំ

ចក្ខុ រូបញ្ច វិញ្ញាណំ, ផស្សោ ច វេទនាយ ច; សញ្ញា ច ចេតនា តណ្ហា, ធាតុ ខន្ធេន តេ ទសាតិ។

កិលេសសំយុត្តំ សមត្តំ។