| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
២. ទុតិយសង្ឃាទិសេសសិក្ខាបទវណ្ណនា
2. Dutiyasaṅghādisesasikkhāpadavaṇṇanā
៦៨៣. ទុតិយេ មល្លគណភដិបុត្តគណាទិកន្តិអាទីសុ មល្លគណោ នាម នារាយនភត្តិកោ តត្ថ តត្ថ បានីយដ្ឋបនបោក្ខរណីខណនាទិបុញ្ញកម្មការកោ គណោ, ភដិបុត្តគណោ នាម កុមារភត្តិកគណោ។ ធម្មគណោតិ សាសនភត្តិគណោ អនេកប្បការបុញ្ញកម្មការកគណោ វុច្ចតិ។ គន្ធិកសេណីតិ អនេកប្បការសុគន្ធិវិកតិការកោ គណោ។ ទុស្សិកសេណីតិ បេសការកគណោ។ កប្បគតិកន្តិ កប្បិយភាវំ គតំ។
683. Dutiye mallagaṇabhaṭiputtagaṇādikantiādīsu mallagaṇo nāma nārāyanabhattiko tattha tattha pānīyaṭṭhapanapokkharaṇīkhaṇanādipuññakammakārako gaṇo, bhaṭiputtagaṇo nāma kumārabhattikagaṇo. Dhammagaṇoti sāsanabhattigaṇo anekappakārapuññakammakārakagaṇo vuccati. Gandhikaseṇīti anekappakārasugandhivikatikārako gaṇo. Dussikaseṇīti pesakārakagaṇo. Kappagatikanti kappiyabhāvaṃ gataṃ.
វុដ្ឋាបេន្តិយាតិ ឧបសម្បាទេន្តិយា។ ‘‘ចោរិំ វុត្តនយេន អនាបុច្ឆា បព្ពាជេន្តិយា ទុក្កដ’’ន្តិ វទន្តិ។ បណ្ណត្តិំ អជានន្តា អរិយាបិ វុដ្ឋាបេន្តីតិ វា កម្មវាចាបរិយោសានេ អាបត្តិក្ខណេ វិបាកាព្យាកតសមង្គិតាវសេន វា ‘‘តិចិត្ត’’ន្តិ វុត្តន្តិ វេទិតព្ពំ។ សេសមេត្ថ ឧត្តានមេវ។ ចោរិតា, ចោរិសញ្ញា, អញ្ញត្រ អនុញ្ញាតការណា វុដ្ឋាបនន្តិ ឥមានិ បនេត្ថ តីណិ អង្គានិ។
Vuṭṭhāpentiyāti upasampādentiyā. ‘‘Coriṃ vuttanayena anāpucchā pabbājentiyā dukkaṭa’’nti vadanti. Paṇṇattiṃ ajānantā ariyāpi vuṭṭhāpentīti vā kammavācāpariyosāne āpattikkhaṇe vipākābyākatasamaṅgitāvasena vā ‘‘ticitta’’nti vuttanti veditabbaṃ. Sesamettha uttānameva. Coritā, corisaññā, aññatra anuññātakāraṇā vuṭṭhāpananti imāni panettha tīṇi aṅgāni.
ទុតិយសង្ឃាទិសេសសិក្ខាបទវណ្ណនា និដ្ឋិតា។
Dutiyasaṅghādisesasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ភិក្ខុនីវិភង្គ • Bhikkhunīvibhaṅga / ២. ទុតិយសង្ឃាទិសេសសិក្ខាបទំ • 2. Dutiyasaṅghādisesasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២. ទុតិយសង្ឃាទិសេសសិក្ខាបទំ • 2. Dutiyasaṅghādisesasikkhāpadaṃ
