| Library / Tipiṭaka / តិបិដក • Tipiṭaka / ភិក្ខុនីវិភង្គ • Bhikkhunīvibhaṅga |
២. ទុតិយសង្ឃាទិសេសសិក្ខាបទំ
2. Dutiyasaṅghādisesasikkhāpadaṃ
៦៨២. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន វេសាលិយំ អញ្ញតរស្ស លិច្ឆវិស្ស បជាបតិ អតិចារិនី ហោតិ។ អថ ខោ សោ លិច្ឆវិ តំ ឥត្ថិំ ឯតទវោច – ‘‘សាធុ វិរមាហិ, អនត្ថំ ខោ តេ ករិស្សាមី’’តិ។ ឯវម្បិ សា វុច្ចមានា នាទិយិ។ តេន ខោ បន សមយេន វេសាលិយំ លិច្ឆវិគណោ សន្និបតិតោ ហោតិ កេនចិទេវ ករណីយេន។ អថ ខោ សោ លិច្ឆវិ តេ លិច្ឆវយោ ឯតទវោច – ‘‘ឯកំ មេ, អយ្យោ , ឥត្ថិំ អនុជានាថា’’តិ។ ‘‘កា នាម សា’’តិ? ‘‘មយ្ហំ បជាបតិ អតិចរតិ, តំ ឃាតេស្សាមី’’តិ។ ‘‘ជានាហី’’តិ។ អស្សោសិ ខោ សា ឥត្ថី – ‘‘សាមិកោ កិរ មំ ឃាតេតុកាមោ’’តិ។ វរភណ្ឌំ អាទាយ សាវត្ថិំ គន្ត្វា តិត្ថិយេ ឧបសង្កមិត្វា បព្ពជ្ជំ យាចិ។ តិត្ថិយា ន ឥច្ឆិំសុ បព្ពាជេតុំ។ ភិក្ខុនិយោ ឧបសង្កមិត្វា បព្ពជ្ជំ យាចិ។ ភិក្ខុនិយោបិ ន ឥច្ឆិំសុ បព្ពាជេតុំ។ ថុល្លនន្ទំ ភិក្ខុនិំ ឧបសង្កមិត្វា ភណ្ឌកំ ទស្សេត្វា បព្ពជ្ជំ យាចិ។ ថុល្លនន្ទា ភិក្ខុនី ភណ្ឌកំ គហេត្វា បព្ពាជេសិ។
682. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena vesāliyaṃ aññatarassa licchavissa pajāpati aticārinī hoti. Atha kho so licchavi taṃ itthiṃ etadavoca – ‘‘sādhu viramāhi, anatthaṃ kho te karissāmī’’ti. Evampi sā vuccamānā nādiyi. Tena kho pana samayena vesāliyaṃ licchavigaṇo sannipatito hoti kenacideva karaṇīyena. Atha kho so licchavi te licchavayo etadavoca – ‘‘ekaṃ me, ayyo , itthiṃ anujānāthā’’ti. ‘‘Kā nāma sā’’ti? ‘‘Mayhaṃ pajāpati aticarati, taṃ ghātessāmī’’ti. ‘‘Jānāhī’’ti. Assosi kho sā itthī – ‘‘sāmiko kira maṃ ghātetukāmo’’ti. Varabhaṇḍaṃ ādāya sāvatthiṃ gantvā titthiye upasaṅkamitvā pabbajjaṃ yāci. Titthiyā na icchiṃsu pabbājetuṃ. Bhikkhuniyo upasaṅkamitvā pabbajjaṃ yāci. Bhikkhuniyopi na icchiṃsu pabbājetuṃ. Thullanandaṃ bhikkhuniṃ upasaṅkamitvā bhaṇḍakaṃ dassetvā pabbajjaṃ yāci. Thullanandā bhikkhunī bhaṇḍakaṃ gahetvā pabbājesi.
អថ ខោ សោ លិច្ឆវិ តំ ឥត្ថិំ គវេសន្តោ សាវត្ថិំ គន្ត្វា ភិក្ខុនីសុ បព្ពជិតំ ទិស្វាន យេន រាជា បសេនទិ កោសលោ តេនុបសង្កមិ; ឧបសង្កមិត្វា រាជានំ បសេនទិំ កោសលំ ឯតទវោច – ‘‘បជាបតិ មេ, ទេវ, វរភណ្ឌំ អាទាយ សាវត្ថិំ អនុប្បត្តា។ តំ ទេវោ អនុជានាតូ’’តិ។ ‘‘តេន ហិ, ភណេ, វិចិនិត្វា អាចិក្ខា’’តិ។ ‘‘ទិដ្ឋា, ទេវ, ភិក្ខុនីសុ បព្ពជិតា’’តិ។ ‘‘សចេ, ភណេ, ភិក្ខុនីសុ បព្ពជិតា, ន សា លព្ភា កិញ្ចិ កាតុំ។ ស្វាក្ខាតោ ភគវតា ធម្មោ, ចរតុ ព្រហ្មចរិយំ សម្មា ទុក្ខស្ស អន្តកិរិយាយា’’តិ។ អថ ខោ សោ លិច្ឆវិ ឧជ្ឈាយតិ ខិយ្យតិ វិបាចេតិ – ‘‘កថញ្ហិ នាម ភិក្ខុនិយោ ចោរិំ បព្ពាជេស្សន្តី’’តិ! អស្សោសុំ ខោ ភិក្ខុនិយោ តស្ស លិច្ឆវិស្ស ឧជ្ឈាយន្តស្ស ខិយ្យន្តស្ស វិបាចេន្តស្ស។ យា តា ភិក្ខុនិយោ អប្បិច្ឆា…បេ.… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយ្យា ថុល្លនន្ទា ចោរិំ បព្ពាជេស្សតី’’តិ! អថ ខោ តា ភិក្ខុនិយោ ភិក្ខូនំ ឯតមត្ថំ អារោចេសុំ…បេ.… សច្ចំ កិរ, ភិក្ខវេ, ថុល្លនន្ទា ភិក្ខុនី ចោរិំ បព្ពាជេតីតិ 1? ‘‘សច្ចំ, ភគវា’’តិ។ វិគរហិ ពុទ្ធោ ភគវា…បេ.… កថញ្ហិ នាម, ភិក្ខវេ, ថុល្លនន្ទា ភិក្ខុនី ចោរិំ បព្ពាជេស្សតិ! នេតំ, ភិក្ខវេ, អប្បសន្នានំ វា បសាទាយ…បេ.… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –
Atha kho so licchavi taṃ itthiṃ gavesanto sāvatthiṃ gantvā bhikkhunīsu pabbajitaṃ disvāna yena rājā pasenadi kosalo tenupasaṅkami; upasaṅkamitvā rājānaṃ pasenadiṃ kosalaṃ etadavoca – ‘‘pajāpati me, deva, varabhaṇḍaṃ ādāya sāvatthiṃ anuppattā. Taṃ devo anujānātū’’ti. ‘‘Tena hi, bhaṇe, vicinitvā ācikkhā’’ti. ‘‘Diṭṭhā, deva, bhikkhunīsu pabbajitā’’ti. ‘‘Sace, bhaṇe, bhikkhunīsu pabbajitā, na sā labbhā kiñci kātuṃ. Svākkhāto bhagavatā dhammo, caratu brahmacariyaṃ sammā dukkhassa antakiriyāyā’’ti. Atha kho so licchavi ujjhāyati khiyyati vipāceti – ‘‘kathañhi nāma bhikkhuniyo coriṃ pabbājessantī’’ti! Assosuṃ kho bhikkhuniyo tassa licchavissa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā coriṃ pabbājessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ…pe… saccaṃ kira, bhikkhave, thullanandā bhikkhunī coriṃ pabbājetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī coriṃ pabbājessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
៦៨៣. ‘‘យា បន ភិក្ខុនី ជានំ ចោរិំ វជ្ឈំ វិទិតំ អនបលោកេត្វា រាជានំ វា សង្ឃំ វា គណំ វា បូគំ វា សេណិំ វា អញ្ញត្រ កប្បា វុដ្ឋាបេយ្យ, អយម្បិ ភិក្ខុនី បឋមាបត្តិកំ ធម្មំ អាបន្នា និស្សារណីយំ សង្ឃាទិសេស’’ន្តិ។
683.‘‘Yāpana bhikkhunī jānaṃ coriṃ vajjhaṃ viditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā aññatra kappā vuṭṭhāpeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
៦៨៤. យា បនាតិ យា យាទិសា…បេ.… ភិក្ខុនីតិ…បេ.… អយំ ឥមស្មិំ អត្ថេ អធិប្បេតា ភិក្ខុនីតិ។
684.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ជានាតិ នាម សាមំ វា ជានាតិ អញ្ញេ វា តស្សា អារោចេន្តិ, សា វា អារោចេតិ។
Jānāti nāma sāmaṃ vā jānāti aññe vā tassā ārocenti, sā vā āroceti.
ចោរី នាម យា បញ្ចមាសកំ វា អតិរេកបញ្ចមាសកំ វា អគ្ឃនកំ អទិន្នំ ថេយ្យសង្ខាតំ អាទិយតិ, ឯសា ចោរី នាម។
Corī nāma yā pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, esā corī nāma.
វជ្ឈា នាម យំ កត្វា វជ្ឈប្បត្តា ហោតិ។
Vajjhā nāma yaṃ katvā vajjhappattā hoti.
វិទិតា នាម អញ្ញេហិ មនុស្សេហិ ញាតា ហោតិ ‘‘វជ្ឈា ឯសា’’តិ។
Viditā nāma aññehi manussehi ñātā hoti ‘‘vajjhā esā’’ti.
អនបលោកេត្វាតិ អនាបុច្ឆា។
Anapaloketvāti anāpucchā.
រាជា នាម យត្ថ រាជា អនុសាសតិ, រាជា អបលោកេតព្ពោ។
Rājā nāma yattha rājā anusāsati, rājā apaloketabbo.
សង្ឃោ នាម ភិក្ខុនិសង្ឃោ វុច្ចតិ, ភិក្ខុនិសង្ឃោ អបលោកេតព្ពោ។
Saṅgho nāma bhikkhunisaṅgho vuccati, bhikkhunisaṅgho apaloketabbo.
គណោ នាម យត្ថ គណោ អនុសាសតិ, គណោ អបលោកេតព្ពោ។
Gaṇo nāma yattha gaṇo anusāsati, gaṇo apaloketabbo.
បូគោ នាម យត្ថ បូគោ អនុសាសតិ, បូគោ អបលោកេតព្ពោ។
Pūgo nāma yattha pūgo anusāsati, pūgo apaloketabbo.
សេណិ នាម យត្ថ សេណិ អនុសាសតិ, សេណិ អបលោកេតព្ពោ។
Seṇi nāma yattha seṇi anusāsati, seṇi apaloketabbo.
អញ្ញត្រ កប្បាតិ ឋបេត្វា កប្បំ។ កប្បំ នាម ទ្វេ កប្បានិ – តិត្ថិយេសុ វា បព្ពជិតា ហោតិ អញ្ញាសុ វា ភិក្ខុនីសុ បព្ពជិតា។ អញ្ញត្រ កប្បា ‘‘វុដ្ឋាបេស្សាមី’’តិ គណំ វា អាចរិនិំ វា បត្តំ វា ចីវរំ វា បរិយេសតិ, សីមំ វា សម្មន្នតិ, អាបត្តិ ទុក្កដស្ស។ ញត្តិយា ទុក្កដំ។ ទ្វីហិ កម្មវាចាហិ ថុល្លច្ចយា។ កម្មវាចាបរិយោសានេ ឧបជ្ឈាយាយ អាបត្តិ សង្ឃាទិសេសស្ស។ គណស្ស ច អាចរិនិយា ច អាបត្តិ ទុក្កដស្ស។
Aññatrakappāti ṭhapetvā kappaṃ. Kappaṃ nāma dve kappāni – titthiyesu vā pabbajitā hoti aññāsu vā bhikkhunīsu pabbajitā. Aññatra kappā ‘‘vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi thullaccayā. Kammavācāpariyosāne upajjhāyāya āpatti saṅghādisesassa. Gaṇassa ca ācariniyā ca āpatti dukkaṭassa.
អយម្បីតិ បុរិមំ ឧបាទាយ វុច្ចតិ។
Ayampīti purimaṃ upādāya vuccati.
បឋមាបត្តិកន្តិ សហ វត្ថុជ្ឈាចារា អាបជ្ជតិ អសមនុភាសនាយ។
Paṭhamāpattikanti saha vatthujjhācārā āpajjati asamanubhāsanāya.
និស្សារណីយន្តិ សង្ឃម្ហា និស្សារីយតិ។
Nissāraṇīyanti saṅghamhā nissārīyati.
សង្ឃាទិសេសន្តិ…បេ.… តេនបិ វុច្ចតិ សង្ឃាទិសេសោតិ។
Saṅghādisesanti…pe… tenapi vuccati saṅghādisesoti.
៦៨៥. ចោរិយា ចោរិសញ្ញា អញ្ញត្រ កប្បា វុដ្ឋាបេតិ, អាបត្តិ សង្ឃាទិសេសស្ស។ ចោរិយា វេមតិកា អញ្ញត្រ កប្បា វុដ្ឋាបេតិ, អាបត្តិ ទុក្កដស្ស។ ចោរិយា អចោរិសញ្ញា អញ្ញត្រ កប្បា វុដ្ឋាបេតិ, អនាបត្តិ។ អចោរិយា ចោរិសញ្ញា, អាបត្តិ ទុក្កដស្ស។ អចោរិយា វេមតិកា, អាបត្តិ ទុក្កដស្ស។ អចោរិយា អចោរិសញ្ញា, អនាបត្តិ។
685. Coriyā corisaññā aññatra kappā vuṭṭhāpeti, āpatti saṅghādisesassa. Coriyā vematikā aññatra kappā vuṭṭhāpeti, āpatti dukkaṭassa. Coriyā acorisaññā aññatra kappā vuṭṭhāpeti, anāpatti. Acoriyā corisaññā, āpatti dukkaṭassa. Acoriyā vematikā, āpatti dukkaṭassa. Acoriyā acorisaññā, anāpatti.
៦៨៦. អនាបត្តិ អជានន្តី វុដ្ឋាបេតិ, អបលោកេត្វា វុដ្ឋាបេតិ, កប្បកតំ វុដ្ឋាបេតិ, ឧម្មត្តិកាយ, អាទិកម្មិកាយាតិ។
686. Anāpatti ajānantī vuṭṭhāpeti, apaloketvā vuṭṭhāpeti, kappakataṃ vuṭṭhāpeti, ummattikāya, ādikammikāyāti.
ទុតិយសង្ឃាទិសេសសិក្ខាបទំ និដ្ឋិតំ។
Dutiyasaṅghādisesasikkhāpadaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ទុតិយសង្ឃាទិសេសសិក្ខាបទវណ្ណនា • 2. Dutiyasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២. ទុតិយសង្ឃាទិសេសសិក្ខាបទំ • 2. Dutiyasaṅghādisesasikkhāpadaṃ
