| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
ចត្តារោនិស្សយាទិកថា
Cattāronissayādikathā
១២៨. តាវទេវាតិ ឧបសម្បន្នសមនន្តរមេវ។ ឆាយា មេតព្ពាតិ ឯកបោរិសា វា ទ្វិបោរិសា វាតិ ឆាយា មេតព្ពា។ ឧតុប្បមាណំ អាចិក្ខិតព្ពន្តិ ‘‘វស្សានោ ហេមន្តោ គិម្ហោ’’តិ ឯវំ ឧតុប្បមាណំ អាចិក្ខិតព្ពំ។ ឯត្ថ ច ឧតុយេវ ឧតុប្បមាណំ។ សចេ វស្សានាទយោ អបរិបុណ្ណា ហោន្តិ, យត្តកេហិ ទិវសេហិ យស្ស យោ ឧតុ អបរិបុណ្ណោ, តេ ទិវសេ សល្លក្ខេត្វា សោ ទិវសភាគោ អាចិក្ខិតព្ពោ។ អថ វា ‘‘អយំ នាម ឧតុ, សោ ច ខោ បរិបុណ្ណោ វា អបរិបុណ្ណោ វា’’តិ ឯវំ ឧតុប្បមាណំ អាចិក្ខិតព្ពំ។ ‘‘បុព្ពណ្ហោ វា សាយន្ហោ វា’’តិ ឯវំ ទិវសភាគោ អាចិក្ខិតព្ពោ។ សង្គីតីតិ ឥទមេវ សព្ពំ ឯកតោ កត្វា ‘‘ត្វំ កិំ លភសិ, កា តេ ឆាយា, កិំ ឧតុប្បមាណំ, កោ ទិវសភាគោ’’តិ បុដ្ឋោ ‘‘ឥទំ នាម លភាមិ – វស្សំ វា ហេមន្តំ វា គិម្ហំ វា, អយំ មេ ឆាយា, ឥទំ ឧតុប្បមាណំ, អយំ ទិវសភាគោតិ វទេយ្យាសី’’តិ ឯវំ អាចិក្ខិតព្ពំ។
128.Tāvadevāti upasampannasamanantarameva. Chāyā metabbāti ekaporisā vā dviporisā vāti chāyā metabbā. Utuppamāṇaṃ ācikkhitabbanti ‘‘vassāno hemanto gimho’’ti evaṃ utuppamāṇaṃ ācikkhitabbaṃ. Ettha ca utuyeva utuppamāṇaṃ. Sace vassānādayo aparipuṇṇā honti, yattakehi divasehi yassa yo utu aparipuṇṇo, te divase sallakkhetvā so divasabhāgo ācikkhitabbo. Atha vā ‘‘ayaṃ nāma utu, so ca kho paripuṇṇo vā aparipuṇṇo vā’’ti evaṃ utuppamāṇaṃ ācikkhitabbaṃ. ‘‘Pubbaṇho vā sāyanho vā’’ti evaṃ divasabhāgo ācikkhitabbo. Saṅgītīti idameva sabbaṃ ekato katvā ‘‘tvaṃ kiṃ labhasi, kā te chāyā, kiṃ utuppamāṇaṃ, ko divasabhāgo’’ti puṭṭho ‘‘idaṃ nāma labhāmi – vassaṃ vā hemantaṃ vā gimhaṃ vā, ayaṃ me chāyā, idaṃ utuppamāṇaṃ, ayaṃ divasabhāgoti vadeyyāsī’’ti evaṃ ācikkhitabbaṃ.
១២៩. ឱហាយាតិ ឆឌ្ឌេត្វា។ ទុតិយំ ទាតុន្តិ ឧបសម្បទមាឡកតោ បរិវេណំ គច្ឆន្តស្ស ទុតិយកំ ទាតុំ អនុជានាមិ, ចត្តារិ ច អករណីយានិ អាចិក្ខិតុន្តិ អត្ថោ។ បណ្ឌុបលាសោតិ បណ្ឌុវណ្ណោ បត្តោ។ ពន្ធនា បវុត្តោតិ វណ្ដតោ បតិតោ។ អភព្ពោ ហរិតត្ថាយាតិ បុន ហរិតោ ភវិតុំ អភព្ពោ។ បុថុសិលាតិ មហាសិលា។
129.Ohāyāti chaḍḍetvā. Dutiyaṃ dātunti upasampadamāḷakato pariveṇaṃ gacchantassa dutiyakaṃ dātuṃ anujānāmi, cattāri ca akaraṇīyāni ācikkhitunti attho. Paṇḍupalāsoti paṇḍuvaṇṇo patto. Bandhanā pavuttoti vaṇṭato patito. Abhabbo haritatthāyāti puna harito bhavituṃ abhabbo. Puthusilāti mahāsilā.
១៣០. អលព្ភមានាយ សាមគ្គិយា អនាបត្តិ សម្ភោគេ សំវាសេតិ យាវ តស្ស ឧក្ខេបនីយកម្មករណត្ថាយ សាមគ្គី ន លព្ភតិ, តាវ តេន សទ្ធិំ សម្ភោគេ ច ឧបោសថបវារណាទិករណភេទេ សំវាសេ ច អនាបត្តីតិ។ សេសំ សព្ពត្ថ មហាវិភង្គេ វុត្តានុសារេន សុវិញ្ញេយ្យត្តា បាកដមេវាតិ។
130.Alabbhamānāya sāmaggiyā anāpatti sambhoge saṃvāseti yāva tassa ukkhepanīyakammakaraṇatthāya sāmaggī na labbhati, tāva tena saddhiṃ sambhoge ca uposathapavāraṇādikaraṇabhede saṃvāse ca anāpattīti. Sesaṃ sabbattha mahāvibhaṅge vuttānusārena suviññeyyattā pākaṭamevāti.
ចត្តារោនិស្សយាទិកថា និដ្ឋិតា។
Cattāronissayādikathā niṭṭhitā.
សមន្តបាសាទិកាយ វិនយសំវណ្ណនាយ
Samantapāsādikāya vinayasaṃvaṇṇanāya
ទ្វាសត្តតិអធិកវត្ថុសតបដិមណ្ឌិតស្ស មហាខន្ធកស្ស
Dvāsattatiadhikavatthusatapaṭimaṇḍitassa mahākhandhakassa
អត្ថវណ្ណនា និដ្ឋិតា។
Atthavaṇṇanā niṭṭhitā.
មហាខន្ធកវណ្ណនា និដ្ឋិតា។
Mahākhandhakavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៦៤. ចត្តារោ និស្សយា • 64. Cattāro nissayā
៦៥. ចត្តារិ អករណីយានិ • 65. Cattāri akaraṇīyāni
៦៦. អាបត្តិយា អទស្សនេ ឧក្ខិត្តកវត្ថូនិ • 66. Āpattiyā adassane ukkhittakavatthūni
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចត្តារោនិស្សយាទិកថាវណ្ណនា • Cattāronissayādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ចត្តារោនិស្សយាទិកថាវណ្ណនា • Cattāronissayādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ចត្តារោនិស្សយាទិកថាវណ្ណនា • Cattāronissayādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦៤. ចត្តារោនិស្សយាទិកថា • 64. Cattāronissayādikathā
