| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២៧. បទុមុក្ខិបវគ្គោ
27. Padumukkhipavaggo
១-១០. អាកាសុក្ខិបិយត្ថេរអបទានាទិវណ្ណនា
1-10. Ākāsukkhipiyattheraapadānādivaṇṇanā
១-២. សត្តវីសតិមេ វគ្គេ បឋមាបទានេ ជលជគ្គេ ទុវេ គយ្ហាតិ ជលេ ឧទកេ ជាតេ អគ្គេ ឧប្បលាទយោ ទ្វេ បុប្ផេ គហេត្វា ពុទ្ធស្ស សមីបំ គន្ត្វា ឯកំ បុប្ផំ បាទេសុ និក្ខិបិំ បូជេសិំ, ឯកំ បុប្ផំ អាកាសេ ខិបិន្តិ អត្ថោ។
1-2. Sattavīsatime vagge paṭhamāpadāne jalajagge duve gayhāti jale udake jāte agge uppalādayo dve pupphe gahetvā buddhassa samīpaṃ gantvā ekaṃ pupphaṃ pādesu nikkhipiṃ pūjesiṃ, ekaṃ pupphaṃ ākāse khipinti attho.
ទុតិយាបទានំ បាកដមេវ។
Dutiyāpadānaṃ pākaṭameva.
១០. តតិយាបទានេ ពោធិយា បាទបុត្តមេតិ ឧត្តមេ ពោធិបាទបេ។ អឌ្ឍចន្ទំ មយា ទិន្នន្តិ តស្មិំ ពោធិមូលេ អឌ្ឍចន្ទាការេន មយា អនេកបុប្ផានិ បូជិតានីតិ អត្ថោ។ ធរណីរុហបាទបេតិ រុក្ខបព្ពតរតនាទយោ ធារេតីតិ ធរណី, បថវី, ធរណិយា រុហតិ បតិដ្ឋហតីតិ ធរណីរុហោ, បាទសង្ខាតេន មូលេន ឧទកំ បិវតិ ខន្ធវិដបាទីសុ បត្ថរិយតីតិ បាទបោ, ធរណីរុហោ ច សោ បាទបោ ចេតិ ធរណីរុហបាទបោ, តស្មិំ ធរណីរុហបាទបេ បុប្ផំ មយា បូជិតន្តិ អត្ថោ។
10. Tatiyāpadāne bodhiyā pādaputtameti uttame bodhipādape. Aḍḍhacandaṃ mayā dinnanti tasmiṃ bodhimūle aḍḍhacandākārena mayā anekapupphāni pūjitānīti attho. Dharaṇīruhapādapeti rukkhapabbataratanādayo dhāretīti dharaṇī, pathavī, dharaṇiyā ruhati patiṭṭhahatīti dharaṇīruho, pādasaṅkhātena mūlena udakaṃ pivati khandhaviṭapādīsu patthariyatīti pādapo, dharaṇīruho ca so pādapo ceti dharaṇīruhapādapo, tasmiṃ dharaṇīruhapādape pupphaṃ mayā pūjitanti attho.
ចតុត្ថាបទានំ ឧត្តានត្ថមេវ។
Catutthāpadānaṃ uttānatthameva.
១៨-១៩. បញ្ចមាបទានេ ហិមវន្តស្សាវិទូរេតិ ហិមវន្តស្ស អាសន្នេ។ រោមសោ នាម បព្ពតោតិ រុក្ខលតាគុម្ពាភាវា កេវលំ ទព្ពតិណាទិសញ្ឆន្នត្តា រោមសោ នាម បព្ពតោ អហោសិ។ តម្ហិ បព្ពតបាទម្ហីតិ តស្មិំ បព្ពតបរិយន្តេ។ សមណោ ភាវិតិន្ទ្រិយោតិ សមិតបាបោ វូបសន្តកិលេសោ សមណោ វឌ្ឍិតឥន្ទ្រិយោ, រក្ខិតចក្ខុន្ទ្រិយាទិឥន្ទ្រិយោតិ អត្ថោ។ អថ វា វឌ្ឍិតឥន្ទ្រិយោ វឌ្ឍិតសទ្ធិន្ទ្រិយាទិឥន្ទ្រិយោតិ អត្ថោ។ តស្ស សមណស្ស អហំ ពិឡាលិអាលុវេ គហេត្វា អទាសិន្តិ អត្ថោ។
18-19. Pañcamāpadāne himavantassāvidūreti himavantassa āsanne. Romaso nāma pabbatoti rukkhalatāgumbābhāvā kevalaṃ dabbatiṇādisañchannattā romaso nāma pabbato ahosi. Tamhi pabbatapādamhīti tasmiṃ pabbatapariyante. Samaṇo bhāvitindriyoti samitapāpo vūpasantakileso samaṇo vaḍḍhitaindriyo, rakkhitacakkhundriyādiindriyoti attho. Atha vā vaḍḍhitaindriyo vaḍḍhitasaddhindriyādiindriyoti attho. Tassa samaṇassa ahaṃ biḷāliāluve gahetvā adāsinti attho.
ឆដ្ឋសត្តមដ្ឋមនវមទសមាបទានានិ ឧត្តានត្ថានេវាតិ។
Chaṭṭhasattamaṭṭhamanavamadasamāpadānāni uttānatthānevāti.
សត្តវីសតិមវគ្គវណ្ណនា សមត្តា។
Sattavīsatimavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi
១. អាកាសុក្ខិបិយត្ថេរអបទានំ • 1. Ākāsukkhipiyattheraapadānaṃ
៣. អឌ្ឍចន្ទិយត្ថេរអបទានំ • 3. Aḍḍhacandiyattheraapadānaṃ
៥. ពិឡាលិទាយកត្ថេរអបទានំ • 5. Biḷālidāyakattheraapadānaṃ
