| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
ឧបោសថាគារាទិកថា
Uposathāgārādikathā
១៤១. អនុបរិវេណិយន្តិ ឯកសីមមហាវិហារេ តស្មិំ តស្មិំ បរិវេណេ។ អសង្កេតេនាតិ សង្កេតំ អកត្វា។ ឯកំ សមូហនិត្វាតិ កម្មវាចាយ សមូហនិត្វា។
141.Anupariveṇiyanti ekasīmamahāvihāre tasmiṃ tasmiṃ pariveṇe. Asaṅketenāti saṅketaṃ akatvā. Ekaṃ samūhanitvāti kammavācāya samūhanitvā.
១៤២. យតោ បាតិមោក្ខំ សុណាតីតិ យត្ថ កត្ថចិ ភិក្ខូនំ ហត្ថបាសេ និសិន្នោ យស្មា បាតិមោក្ខំ សុណាតិ; កតោវស្ស ឧបោសថោតិ អត្ថោ។ ឥទញ្ច វត្ថុវសេន វុត្តំ, ហត្ថបាសេ និសិន្នស្ស បន អសុណន្តស្សាបិ កតោវ ហោតិ ឧបោសថោ។ និមិត្តា កិត្តេតព្ពាតិ ឧបោសថបមុខស្ស ខុទ្ទកានិ វា មហន្តានិ វា បាសាណឥដ្ឋកទារុខណ្ឌទណ្ឌកាទីនិ យានិ កានិចិ និមិត្តានិ អព្ភោកាសេ វា មាឡកាទីសុ វា យត្ថ កត្ថចិ សញ្ញំ កត្វា កិត្តេតុំ វដ្ដតិ។ អថ វា និមិត្តា កិត្តេតព្ពាតិ និមិត្តុបគា វា អនិមិត្តុបគា វា បរិច្ឆេទជាននត្ថំ កិត្តេតព្ពា។
142.Yato pātimokkhaṃ suṇātīti yattha katthaci bhikkhūnaṃ hatthapāse nisinno yasmā pātimokkhaṃ suṇāti; katovassa uposathoti attho. Idañca vatthuvasena vuttaṃ, hatthapāse nisinnassa pana asuṇantassāpi katova hoti uposatho. Nimittā kittetabbāti uposathapamukhassa khuddakāni vā mahantāni vā pāsāṇaiṭṭhakadārukhaṇḍadaṇḍakādīni yāni kānici nimittāni abbhokāse vā māḷakādīsu vā yattha katthaci saññaṃ katvā kittetuṃ vaṭṭati. Atha vā nimittā kittetabbāti nimittupagā vā animittupagā vā paricchedajānanatthaṃ kittetabbā.
ថេរេហិ ភិក្ខូហិ បឋមតរំ សន្និបតិតុន្តិ ឯត្ថ សចេ មហាថេរោ បឋមតរំ ន អាគច្ឆតិ, ទុក្កដំ។ សព្ពេហេវ ឯកជ្ឈំ សន្និបតិត្វា ឧបោសថោ កាតព្ពោតិ ឯត្ថ សចេ បោរាណកោ អាវាសោ មជ្ឈេ វិហារស្ស ហោតិ, បហោតិ ចេត្ថ ភិក្ខូនំ និសជ្ជដ្ឋានំ, តត្ថ សន្និបតិត្វា ឧបោសថោ កាតព្ពោ។ សចេ បោរាណកោ បរិទុព្ពលោ ចេវ សម្ពាធោ ច អញ្ញោ បច្ឆា ឧដ្ឋិតាវាសោ អសម្ពាធោ, តត្ថ ឧបោសថោ កាតព្ពោ។
Therehi bhikkhūhi paṭhamataraṃ sannipatitunti ettha sace mahāthero paṭhamataraṃ na āgacchati, dukkaṭaṃ. Sabbeheva ekajjhaṃ sannipatitvā uposatho kātabboti ettha sace porāṇako āvāso majjhe vihārassa hoti, pahoti cettha bhikkhūnaṃ nisajjaṭṭhānaṃ, tattha sannipatitvā uposatho kātabbo. Sace porāṇako paridubbalo ceva sambādho ca añño pacchā uṭṭhitāvāso asambādho, tattha uposatho kātabbo.
យត្ថ វា បន ថេរោ ភិក្ខុ វិហរតីតិ ឯត្ថាបិ សចេ ថេរស្ស វិហារោ សព្ពេសំ បហោតិ, ផាសុកោ ហោតិ, តត្ថ ឧបោសថោ កាតព្ពោ។ សចេ បន សោ បច្ចន្តេ វិសមប្បទេសេ ហោតិ, ថេរស្ស វត្តព្ពំ – ‘‘ភន្តេ, តុម្ហាកំ វិហារោ អផាសុកទេសោ, នត្ថិ ឯត្ថ សព្ពេសំ ឱកាសោ , អសុកស្មិំ នាម អាវាសេ ឱកាសោ អត្ថិ, តត្ថ គន្តុំ វដ្ដតី’’តិ។ សចេ ថេរោ នាគច្ឆតិ, តស្ស ឆន្ទបារិសុទ្ធិំ អានេត្វា សព្ពេសំ បហោនកេ ផាសុកដ្ឋានេ ឧបោសថោ កាតព្ពោ។
Yattha vā pana thero bhikkhu viharatīti etthāpi sace therassa vihāro sabbesaṃ pahoti, phāsuko hoti, tattha uposatho kātabbo. Sace pana so paccante visamappadese hoti, therassa vattabbaṃ – ‘‘bhante, tumhākaṃ vihāro aphāsukadeso, natthi ettha sabbesaṃ okāso , asukasmiṃ nāma āvāse okāso atthi, tattha gantuṃ vaṭṭatī’’ti. Sace thero nāgacchati, tassa chandapārisuddhiṃ ānetvā sabbesaṃ pahonake phāsukaṭṭhāne uposatho kātabbo.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៧២. ឧបោសថាគារកថា • 72. Uposathāgārakathā
៧៣. ឧបោសថប្បមុខានុជាននា • 73. Uposathappamukhānujānanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧២. ឧបោសថាគារាទិកថា • 72. Uposathāgārādikathā
