| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៧២. ឧបោសថាគារាទិកថា
72. Uposathāgārādikathā
១៤១. អនុបរិវេណិយន្តិ ឯត្ថ អនុសទ្ទស្ស វិច្ឆត្ថំ, បរិវេណសទ្ទស្ស ច លិង្គវិបល្លាសភាវំ ទស្សេតុំ វុត្តំ ‘‘តស្មិំ តស្មិំ បរិវេណេ’’តិ។ បរិវេណសទ្ទោ ហិ នបុំសកលិង្គោ, ឥធ បន លិង្គវិបល្លាសំ កត្វា ឥត្ថិលិង្គវសេន វុត្តំ។ ‘‘សង្កេតំ អកត្វា’’តិ ឥមិនា អសង្កេតេនាតិ បទស្ស កិរិយាវិសេសនត្តំ ទីបេតិ។ ‘‘កម្មវាចាយា’’តិ ឥមិនា សមូហនិត្វាតិ បទស្ស ករណំ ទស្សេតិ។
141.Anupariveṇiyanti ettha anusaddassa vicchatthaṃ, pariveṇasaddassa ca liṅgavipallāsabhāvaṃ dassetuṃ vuttaṃ ‘‘tasmiṃ tasmiṃ pariveṇe’’ti. Pariveṇasaddo hi napuṃsakaliṅgo, idha pana liṅgavipallāsaṃ katvā itthiliṅgavasena vuttaṃ. ‘‘Saṅketaṃ akatvā’’ti iminā asaṅketenāti padassa kiriyāvisesanattaṃ dīpeti. ‘‘Kammavācāyā’’ti iminā samūhanitvāti padassa karaṇaṃ dasseti.
១៤២. យតោតិ ឯត្ថ តោបច្ចយស្ស ការណត្ថេ បវត្តភាវំ ទស្សេន្តោ អាហ ‘‘យស្មា’’តិ។ ‘‘ហត្ថបាសេ’’តិ ឥមិនា ហត្ថបាសតោ ពហិ និសិន្នេ អកតោវស្ស ឧបោសថោ ហោតីតិ ទស្សេតិ។ អស្សាតិ ភិក្ខុនោ។ វត្ថុវសេនាតិ អដ្ឋុប្បត្តិវសេន។ ឧបោសថស្ស បមុខស្ស អព្ភោកាសេ វា មាឡកាទីសុ វាតិ សម្ពន្ធោ។ និមិត្តុបគា វា អនិមិត្តុបគា វាតិ ហេដ្ឋា អដ្ឋសុ និមិត្តេសុ វុត្តា និមិត្តុបគា វា អនិមិត្តុបគា វា បព្ពតាទយោ វា អញ្ញេ វា កិត្តេតព្ពា។
142.Yatoti ettha topaccayassa kāraṇatthe pavattabhāvaṃ dassento āha ‘‘yasmā’’ti. ‘‘Hatthapāse’’ti iminā hatthapāsato bahi nisinne akatovassa uposatho hotīti dasseti. Assāti bhikkhuno. Vatthuvasenāti aṭṭhuppattivasena. Uposathassa pamukhassa abbhokāse vā māḷakādīsu vāti sambandho. Nimittupagā vā animittupagā vāti heṭṭhā aṭṭhasu nimittesu vuttā nimittupagā vā animittupagā vā pabbatādayo vā aññe vā kittetabbā.
បឋមតរំ ន អាគច្ឆតិ, ទុក្កដន្តិ ឧបោសថេ ឃោសិយមានេ បឋមតរំ ន អាគច្ឆតិ, ទុក្កដំ។ វិហារស្ស មជ្ឈេ ហោតីតិ យោជនា។ ឯត្ថាតិ បោរាណកេ អាវាសេ។ តត្ថាតិ បោរាណកេ អាវាសេ។ អសម្ពាធោតិ សង្ឃស្ស និសជ្ជដ្ឋានបហោនកោ។ តត្ថាតិ បច្ឆា ឧដ្ឋិតេ អាវាសេ។
Paṭhamataraṃna āgacchati, dukkaṭanti uposathe ghosiyamāne paṭhamataraṃ na āgacchati, dukkaṭaṃ. Vihārassa majjhe hotīti yojanā. Etthāti porāṇake āvāse. Tatthāti porāṇake āvāse. Asambādhoti saṅghassa nisajjaṭṭhānapahonako. Tatthāti pacchā uṭṭhite āvāse.
សព្ពេសំ និសជ្ជដ្ឋានន្តិ យោជនា។ តត្ថាតិ ថេរស្ស វិហារេ។ សោតិ ថេរស្ស វិហារោ។ ឯត្ថាតិ តុម្ហាកំ វិហារេ។ សព្ពេសំ ឱកាសោ នត្ថីតិ សម្ពន្ធោ។ តត្ថាតិ តំ អសុកំ នាម អាវាសំ។ ‘‘វដ្ដតី’’តិ វត្តព្ពន្តិ យោជនា។ តស្សាតិ ថេរស្ស។
Sabbesaṃ nisajjaṭṭhānanti yojanā. Tatthāti therassa vihāre. Soti therassa vihāro. Etthāti tumhākaṃ vihāre. Sabbesaṃ okāso natthīti sambandho. Tatthāti taṃ asukaṃ nāma āvāsaṃ. ‘‘Vaṭṭatī’’ti vattabbanti yojanā. Tassāti therassa.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៧២. ឧបោសថាគារកថា • 72. Uposathāgārakathā
៧៣. ឧបោសថប្បមុខានុជាននា • 73. Uposathappamukhānujānanā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ឧបោសថាគារាទិកថា • Uposathāgārādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឧបោសថាគារាទិកថាវណ្ណនា • Uposathāgārādikathāvaṇṇanā
