องฺคุตฺตร นิกาย ๔ฯ๔๐

๔ฯ จกฺกวคฺค

อุทายีสุตฺต

อถ โข อุทายี พฺราหฺมโณ เยน ภควา เตนุปสงฺกมิ; อุปสงฺกมิตฺวา ภควตา …เป… เอกมนฺตํ นิสินฺโน โข อุทายี พฺราหฺมโณ ภควนฺตํ เอตทโวจ: “ภวมฺปิ โน โคตโม ยญฺญํ วณฺเณตี”ติ?

“น โข อหํ, พฺราหฺมณ, สพฺพํ ยญฺญํ วณฺเณมิ; น ปนาหํ, พฺราหฺมณ, สพฺพํ ยญฺญํ น วณฺเณมิฯ ยถารูเป โข, พฺราหฺมณ, ยญฺเญ คาโว หญฺญนฺติ, อเชฬกา หญฺญนฺติ, กุกฺกุฏสูกรา หญฺญนฺติ, วิวิธา ปาณา สงฺฆาตํ อาปชฺชนฺติ; เอวรูปํ โข อหํ, พฺราหฺมณ, สารมฺภํ ยญฺญํ น วณฺเณมิฯ ตํ กิสฺส เหตุ? เอวรูปญฺหิ, พฺราหฺมณ, สารมฺภํ ยญฺญํ น อุปสงฺกมนฺติ อรหนฺโต วา อรหตฺตมคฺคํ วา สมาปนฺนาฯ

ยถารูเป จ โข, พฺราหฺมณ, ยญฺเญ เนว คาโว หญฺญนฺติ, น อเชฬกา หญฺญนฺติ, น กุกฺกุฏสูกรา หญฺญนฺติ, น วิวิธา ปาณา สงฺฆาตํ อาปชฺชนฺติ; เอวรูปํ โข อหํ, พฺราหฺมณ, นิรารมฺภํ ยญฺญํ วณฺเณมิ, ยทิทํ นิจฺจทานํ อนุกุลยญฺญํฯ ตํ กิสฺส เหตุ? เอวรูปญฺหิ, พฺราหฺมณ, นิรารมฺภํ ยญฺญํ อุปสงฺกมนฺติ อรหนฺโต วา อรหตฺตมคฺคํ วา สมาปนฺนาติฯ

อภิสงฺขตํ นิรารมฺภํ, ยญฺญํ กาเลน กปฺปิยํ; ตาทิสํ อุปสํยนฺติ, สญฺญตา พฺรหฺมจารโยฯ

วิวฏจฺฉทา เย โลเก, วีติวตฺตา กุลํ คตึ; ยญฺญเมตํ ปสํสนฺติ, พุทฺธา ยญฺญสฺส โกวิทาฯ

ยญฺเญ วา ยทิ วา สทฺเธ, หพฺยํ กตฺวา ยถารหํ; ปสนฺนจิตฺโต ยชติ, สุเขตฺเต พฺรหฺมจาริสุฯ

สุหุตํ สุยิฏฺฐํ สุปฺปตฺตํ, ทกฺขิเณเยฺยสุ ยํ กตํ; ยญฺโญ จ วิปุโล โหติ, ปสีทนฺติ จ เทวตาฯ

เอวํ ยชิตฺวา เมธาวี, สทฺโธ มุตฺเตน เจตสา; อพฺยาพชฺฌํ สุขํ โลกํ, ปณฺฑิโต อุปปชฺชตี”ติฯ

ทสมํฯ

จกฺกวคฺโค จตุตฺโถฯ

ตสฺสุทฺทานํ

จกฺโก สงฺคโห สีโห, ปสาโท วสฺสกาเรน ปญฺจมํ; โทโณ อปริหานิโย ปติลีโน, อุชฺชโย อุทายินา เต ทสาติฯ