| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២០. តមាលបុប្ផិយវគ្គោ
20. Tamālapupphiyavaggo
១-១០. តមាលបុប្ផិយត្ថេរអបទានាទិវណ្ណនា
1-10. Tamālapupphiyattheraapadānādivaṇṇanā
វីសតិមេ វគ្គេ បឋមត្ថេរាបទានំ ឧត្តានមេវ។
Vīsatime vagge paṭhamattherāpadānaṃ uttānameva.
៦. ទុតិយត្ថេរាបទានេ យំ ទាយវាសិកោ ឥសីតិ ឥសិបព្ពជ្ជំ បព្ពជិត្វា វនេ វសនភាវេន ទាយវាសិកោ ឥសីតិ សង្ខំ គតោ, អត្តនោ អនុកម្បាយ តំ វនំ ឧបគតស្ស សិទ្ធត្ថស្ស សត្ថុនោ វសនមណ្ឌបច្ឆាទនត្ថាយ យំ តិណំ, តំ លាយតិ ឆិន្ទតីតិ អត្ថោ។ ទព្ពឆទនំ កត្វា អនេកេហិ ខុទ្ទកទណ្ឌកេហិ មណ្ឌបំ កត្វា តំ តិណេន ឆាទេត្វា សិទ្ធត្ថស្ស ភគវតោ អហំ អទាសិំ បូជេសិន្តិ អត្ថោ។
6. Dutiyattherāpadāne yaṃ dāyavāsiko isīti isipabbajjaṃ pabbajitvā vane vasanabhāvena dāyavāsiko isīti saṅkhaṃ gato, attano anukampāya taṃ vanaṃ upagatassa siddhatthassa satthuno vasanamaṇḍapacchādanatthāya yaṃ tiṇaṃ, taṃ lāyati chindatīti attho. Dabbachadanaṃ katvā anekehi khuddakadaṇḍakehi maṇḍapaṃ katvā taṃ tiṇena chādetvā siddhatthassa bhagavato ahaṃ adāsiṃ pūjesinti attho.
៨. សត្តាហំ ធារយុំ តត្ថាតិ តំ មណ្ឌបំ តត្ថ ឋិតា ទេវមនុស្សា សត្តាហំ និរោធសមាបត្តិំ សមាបជ្ជិត្វា និសិន្នស្ស សត្ថុនោ ធារយុំ ធារេសុន្តិ អត្ថោ។ សេសំ ឧត្តានត្ថមេវាតិ។
8.Sattāhaṃ dhārayuṃ tatthāti taṃ maṇḍapaṃ tattha ṭhitā devamanussā sattāhaṃ nirodhasamāpattiṃ samāpajjitvā nisinnassa satthuno dhārayuṃ dhāresunti attho. Sesaṃ uttānatthamevāti.
តតិយត្ថេរស្ស អបទានេ ខណ្ឌផុល្លិយត្ថេរោតិ ឯត្ថ ខណ្ឌន្តិ កដ្ឋានំ ជិណ្ណត្តា ឆិន្នភិន្នដ្ឋានំ, ផុល្លន្តិ កដ្ឋានំ ជិណ្ណដ្ឋានេ កណ្ណកិតមហិច្ឆត្តកាទិបុប្ផនំ, ខណ្ឌញ្ច ផុល្លញ្ច ខណ្ឌផុល្លានិ, ខណ្ឌផុល្លានំ បដិសង្ខរណំ បុនប្បុនំ ថិរករណន្តិ ខណ្ឌផុល្លបដិសង្ខរណំ។ ឥមស្ស បន ថេរស្ស សម្ភារបូរណកាលេ ផុស្សស្ស ភគវតោ ចេតិយេ ឆិន្នភិន្នដ្ឋានេ សុធាបិណ្ឌំ មក្ខេត្វា ថិរករណំ ខណ្ឌផុល្លបដិសង្ខរណំ នាម។ តស្មា សោ ខណ្ឌផុល្លិយោ ថេរោតិ បាកដោ អហោសិ។ តតិយំ។
Tatiyattherassa apadāne khaṇḍaphulliyattheroti ettha khaṇḍanti kaṭṭhānaṃ jiṇṇattā chinnabhinnaṭṭhānaṃ, phullanti kaṭṭhānaṃ jiṇṇaṭṭhāne kaṇṇakitamahicchattakādipupphanaṃ, khaṇḍañca phullañca khaṇḍaphullāni, khaṇḍaphullānaṃ paṭisaṅkharaṇaṃ punappunaṃ thirakaraṇanti khaṇḍaphullapaṭisaṅkharaṇaṃ. Imassa pana therassa sambhārapūraṇakāle phussassa bhagavato cetiye chinnabhinnaṭṭhāne sudhāpiṇḍaṃ makkhetvā thirakaraṇaṃ khaṇḍaphullapaṭisaṅkharaṇaṃ nāma. Tasmā so khaṇḍaphulliyo theroti pākaṭo ahosi. Tatiyaṃ.
១៧. ចតុត្ថត្ថេរស្សាបទានេ រញ្ញោ ពទ្ធចរោ អហន្តិ រញ្ញោ បរិចារកោ កម្មការកោ អហោសិន្តិ អត្ថោ។
17. Catutthattherassāpadāne rañño baddhacaro ahanti rañño paricārako kammakārako ahosinti attho.
១៩. ជលជុត្តមនាមិនោតិ ជលេ ឧទកេ ជាតំ ជលជំ, កិំ តំ បទុមំ, បទុមេន សមាននាមត្តា បទុមុត្តរស្ស ភគវតោតិ អត្ថោ។ ឧត្តមបទុមនាមស្ស ភគវតោតិ វា អត្ថោ។ ចតុត្ថំ។
19.Jalajuttamanāminoti jale udake jātaṃ jalajaṃ, kiṃ taṃ padumaṃ, padumena samānanāmattā padumuttarassa bhagavatoti attho. Uttamapadumanāmassa bhagavatoti vā attho. Catutthaṃ.
បញ្ចមំ ឧត្តានត្ថមេវ។
Pañcamaṃ uttānatthameva.
២៨. ឆដ្ឋេ នគរេ ទ្វារវតិយាតិ មហាទ្វារវាតបានកវាដផលកាហិ វតិបាការដ្ដាលគោបុរកទ្ទមោទកបរិខាហិ ច សម្បន្នំ នគរន្តិ ទ្វារវតីនគរំ, ទ្វារំ វតិញ្ច បធានំ កត្វា នគរស្ស ឧបលក្ខិតត្តា ‘‘ទ្វារវតី នគរ’’ន្តិ វោហរន្តីតិ នគរេ ទ្វារវតិយាតិ វុត្តំ។ មាលាវច្ឆោ បុប្ផារាមោ មម អហោសីតិ អត្ថោ។
28. Chaṭṭhe nagare dvāravatiyāti mahādvāravātapānakavāṭaphalakāhi vatipākāraṭṭālagopurakaddamodakaparikhāhi ca sampannaṃ nagaranti dvāravatīnagaraṃ, dvāraṃ vatiñca padhānaṃ katvā nagarassa upalakkhitattā ‘‘dvāravatī nagara’’nti voharantīti nagare dvāravatiyāti vuttaṃ. Mālāvaccho pupphārāmo mama ahosīti attho.
៣១. តេ កិសលយាតិ តេ អសោកបល្លវា។ ឆដ្ឋំ។
31.Te kisalayāti te asokapallavā. Chaṭṭhaṃ.
សត្តមដ្ឋមនវមានិ ឧត្តានត្ថានេវ។ ទសមេបិ អបុព្ពំ នត្ថីតិ។
Sattamaṭṭhamanavamāni uttānatthāneva. Dasamepi apubbaṃ natthīti.
វីសតិមវណ្ណនា សមត្តា។
Vīsatimavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi
២. តិណសន្ថារកត្ថេរអបទានំ • 2. Tiṇasanthārakattheraapadānaṃ
៤. អសោកបូជកត្ថេរអបទានំ • 4. Asokapūjakattheraapadānaṃ
៦. កិសលយបូជកត្ថេរអបទានំ • 6. Kisalayapūjakattheraapadānaṃ
