Sharabha Upanishad

॥ śarabhopaniṣat ॥

sarvaṃ santyajya munayo yadbhajantyātmarūpataḥ ।
tacchārabhaṃ tripādbrahma svamātramavaśiṣyate ॥

oṃ bhadraṃ karṇebhiḥ śṛṇuyāma devāḥ ।
bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhiḥ ।
vyaśema devahitaṃ yadāyuḥ ।
svasti na indro vṛddhaśravāḥ । svasti naḥ pūṣā viśvadevāḥ ।
svasti nastārkṣyo ariṣṭanemiḥ । svasti no bṛhaspatirdadhātu ॥

oṃ śāntiḥ śāntiḥ śāntiḥ ॥

atha hainaṃ paippalādo brahmāṇamuvāca bho bhagavan
brahmaviṣṇurudrāṇāṃ madhye ko vā adhikataro dhyeyaḥ
syāttattvameva no brūhīti ।
tasmai sa hovāca pitāmahaśca
he paippalāda śṛṇu vākyametat ।
bahūni puṇyāni kṛtāni yena
tenaiva labhyaḥ parameśvaro'sau ।
yasyāṅgajo'haṃ haririndramukhyā
mohānna jānanti surendramukhyāḥ ॥ 1॥

prabhuṃ vareṇyaṃ pitaraṃ maheśaṃ
yo brahmāṇaṃ vidadhāti tasmai ।
vedāṃśca sarvānprahiṇoti cāgryaṃ
taṃ vai prabhuṃ pitaraṃ devatānām ॥ 2॥

mamāpi viṣṇorjanakaṃ devamīḍyaṃ
yo'ntakāle sarvalokānsaṃjahāra ॥ 3॥

sa ekaḥ śreṣṭhaśca sarvaśāstā sa eva variṣṭhaśca ।
yo ghoraṃ veṣamāsthāya śarabhākhyaṃ maheśvaraḥ ।
nṛsiṃhaṃ lokahantāraṃ saṃjaghāna mahābalaḥ ॥ 4॥

hariṃ harantaṃ pādābhyāmanuyānti sureśvarāḥ ।
māvadhīḥ puruṣaṃ viṣṇuṃ vikramasva mahānasi ॥ 5॥

kṛpayā bhagavānviṣṇuṃ vidadāra nakhaiḥ kharaiḥ ।
carmāmbaro mahāvīro vīrabhadro babhūva ha ॥ 6॥

sa eko rudro dhyeyaḥ sarveṣāṃ sarvasiddhaye । yo brahmaṇaḥ pañcavakrahantā
tasmai rudrāya namo astu ॥ 7॥

yo visphuliṅgena lalāṭajena sarvaṃ jagadbhasmasātsaṃkaroti ।
punaśca sṛṣṭvā punarapyarakṣadevaṃ svatantraṃ prakaṭīkaroti ।
tasmai rudrāya namo astu ॥ 8॥

yo vāmapādena jaghāna kālaṃ ghoraṃ pape'tho hālahalaṃ dahantam ।
tasmai rudrāya namo astu ॥ 9॥

yo vāmapādārcitaviṣṇunetrastasmai dadau cakramatīva hṛṣṭaḥ ।
tasmai rudrāya namo astu ॥ 10॥

yo dakṣayajñe surasaṅghānvijitya
viṣṇuṃ babandhoragapāśena vīraḥ ।
tasmai rudrāya namo astu ॥ 11॥

yo līlayaiva tripuraṃ dadāha
viṣṇuṃ kaviṃ somasūryāgninetraḥ ।
sarve devāḥ paśutāmavāpuḥ
svayaṃ tasmātpaśupatirbabhūva ।
tasmai rudrāya namo astu ॥ 12॥

yo matsyakūrmādivarāhasiṃhā-
nviṣṇuṃ kramantaṃ vāmanamādiviṣṇum ।
viviklavaṃ pīḍyamānaṃ sureśaṃ
bhasmīcakāra manmathaṃ yamaṃ ca ।
tasmai rudrāya namo astu ॥ 13॥

evaṃ prakāreṇa bahudhā pratuṣṭvā
kṣamāpayāmāsurnīlakaṇṭhaṃ maheśvaram ।
tāpatrayasamudbhūtajanmamṛtyujarādibhiḥ ।
nāvidhāni duḥkhāni jahāra parameśvaraḥ ॥14॥

evaṃ mantraiḥ prārthyamāna ātmā vai sarvadehinām ।
śaṅkaro bhagavānādyo rarakṣa sakalāḥ prajāḥ ॥ 15॥

yatpādāmbhoruhadvandvaṃ mṛgyate viṣṇunā saha ।
stutvā stutyaṃ maheśānamavāṅmanasagocaram ॥ 16॥

bhaktyā namratanorviṣṇoḥ prasādamakarodvibhuḥ ।
yato vāco nivartante aprāpya manasā saha ।
ānandaṃ brahmaṇo vidvānna bibheti kadācaneti ॥ 17॥

aṇoraṇīyānmahato mahīyā-
nātmāsyajantornihito guhāyām ।
tamakratuṃ paśyati vītaśoko
dhātuḥprasādānmahimānamīśam ॥ 18॥

vasiṣṭhavaiyāsakivāmadeva-
viriñcimukhyairhṛdi bhāvyamānaḥ ।
sanatsujātādisanātanādyai-
rīḍyo maheśo bhagavānādidevaḥ ॥ 19॥

satyo nityaḥ sarvasākṣī maheśo
nityānando nirvikalpo nirākhyaḥ ।
acintyaśaktirbhagavāngirīśaḥ
svāvidyayā kalpitamānabhūmiḥ ॥ 20॥

atimohakarī māyā mama viṣṇośca suvrata ।
tasya pādāmbujadhyānāddustarā sutarā bhavet ॥ 21॥

viṣṇurviśvajagadyoniḥ svāṃśabhūtaiḥ svakaiḥ saha ।
mamāṃśasaṃbhavo bhūtvā pālayatyakhilaṃ jagat ॥ 22॥

vināśaṃ kālato yāti tato'nyatsakalaṃ mṛṣā ।
oṃ tasmai mahāgrāsāya mahādevāya śūline ।
maheśvarāya mṛḍāya tasmai rudrāya namo astu ॥ 23॥

eko viṣṇurmahadbhūtaṃ pṛthagbhūtāyanekaśaḥ ।
trīṃllokānvyāpya bhūtātmā bhuṅkte viśvabhugavyayaḥ ॥ 24॥

caturbhiśca caturbhiśca dvābhyāṃ pañcamireva ca ।
hūyate ca punardvābhyāṃ sa me viṣṇuḥ prasīdatu ॥ 25॥

brahmārpaṇaṃ brahma havirbrahmāgnau brahmaṇā hutam ।
brahmaiva tena gantavyaṃ brahmakarmasamādhinā ॥ 26॥

śarā jīvāstadaṅgeṣu bhāti nityaṃ hariḥ svayam ।
brahmaiva śarabhaḥ sākṣānmokṣado'yaṃ mahāmune ॥ 27॥

māyāvaśādeva devā mohitā mamatādibhiḥ ।
tasya māhātmyaleśāṃśaṃ vaktuṃ kenāpya śakyate ॥ 28॥

parātparataraṃ brahma yatparātparato hariḥ ।
parātparataro hīśastasmāttulyo'dhiko na hi ॥ 29॥

eka eva śivo nityastato'nyatsakalaṃ mṛṣā ।
tasmātsarvānparityajya dhyeyānviṣṇvādikānsurān ॥ 30॥

śiva eva sadā dhyeyaḥ sarvasaṃsāramocakaḥ ।
tasmai mahāgrāsāya maheśvarāya namaḥ ॥ 31॥

paippalādaṃ mahāśāstraṃ na deyaṃ yasya kasyacit ।
nāstikāya kṛtaghnāya durvṛttāya durātmane ॥ 32॥

dāṃbhikāya nṛśaṃsāya śaṭhāyānṛtabhāṣiṇe ।
suvratāya subhaktāya suvṛttāya suśīline ॥ 33॥

gurubhaktāya dāntāya śāntāya ṛjucetase ।
śivabhaktāya dātavyaṃ brahmakarmoktadhīmate ॥ 34॥

svabhaktāyaiva dātavyamakṛtaghnāya suvratam ।
na dātavyaṃ sadā gopyaṃ yatnenaiva dvijottama ॥ 35॥

etatpaippalādaṃ mahāśāstraṃ yo'dhīte śrāvayeddvijaḥ
sa janmamaraṇebhyo mukto bhavati । yo jānīte so'mṛtatvaṃ
ca gacchati । garbhavāsādvimukto bhavati । surāpānātpūto
bhavati । svarṇasteyātpūto bhavati । brahmahatyātpūto
bhavati । gurutalpagamanātpūto bhavati । sa sarvānvedānadhīto
bhavati । sa sarvāndevāndhyāto bhavati । sa samastamahāpātako-
papātakātpūto bhavati । tasmādavimuktamāśrito bhavati ।
sa satataṃ śivapriyo bhavati । sa śivasāyujyameti । na sa
punarāvartate na sa punarāvartate । brahmaiva bhavati । ityāha
bhagavānbrahmetyupaniṣat ॥

oṃ bhadraṃ karṇebhiḥ śṛṇuyāma devāḥ ।
bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhiḥ ।
vyaśema devahitaṃ yadāyuḥ ।
svasti na indro vṛddhaśravāḥ । svasti naḥ pūṣā viśvavedāḥ ।
svasti nastārkṣyo ariṣṭanemiḥ । svasti no bṛhaspatirdadhātu ।
oṃ śāntiḥ śāntiḥ śāntiḥ ॥

iti śarabhopaniṣatsamāptā ॥