Brahmavidya Upanishad

॥ brahmavidyopaniṣat ॥

svāvidyātatkāryajātaṃ yadvidyāpahnavaṃ gatam ।
taddhaṃsavidyāniṣpannaṃ rāmacandrapadaṃ bhaje ॥

oṃ saha nāvavatu ॥ saha nau bhunaktu ॥

saha vīryaṃ karavāvahai ॥

tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

atha brahmavidyopaniṣaducyate ॥

prasādādbrahmaṇastasya viṣṇoradbhutakarmaṇaḥ ।
rahasyaṃ brahmavidyāyā dhruvāgniṃ sampracakṣate ॥ 1॥

oṃityekākṣaraṃ brahma yaduktaṃ brahmavādibhiḥ ।
śarīraṃ tasya vakṣyāmi sthānaṃ kālatrayaṃ tathā ॥ 2॥

tatra devāstrayaḥ proktā lokā vedāstrayo'gnayaḥ ।
tisro mātrārdhamātrā ca tryakṣarasya śivasya tu ॥ 3॥

ṛgvedo gārhapatyaṃ ca pṛthivī brahma eva ca ।
ākārasya śarīraṃ tu vyākhyātaṃ brahmavādibhiḥ ॥ 4॥

yajurvedo'ntarikṣaṃ ca dakṣiṇāgnistathaiva ca ।
viṣṇuśca bhagavāndeva ukāraḥ parikīrtitaḥ ॥ 5॥

sāmavedastathā dyauścāhavanīyastathaiva ca ।
īśvaraḥ paramo devo makāraḥ parikīrtitaḥ ॥ 6॥

sūryamaṇḍalamadhye'tha hyakāraḥ śaṅkhamadhyagaḥ ।
ukāraścandrasaṃkāśastasya madhye vyavasthitaḥ ॥ 7॥

makārastvagnisaṃkāśo vidhūmo vidyutopamaḥ ।
tisro mātrāstathā jñeyā somasūryāgnirūpiṇaḥ ॥ 8॥

śikhā tu dīpasaṃkāśā tasminnupari vartate ।
ardhamātra tathā jñeyā praṇavasyopari sthitā ॥ 9॥

padmasūtranibhā sūkṣmā śikhā sā dṛśyate parā ।
sā nāḍī sūryasaṃkāśā sūryaṃ bhittvā tathāparā ॥ 10॥

dvisaptatisahasrāṇi nāḍīṃ bhittvā ca mūrdhani ।
varadaḥ sarvabhūtānāṃ sarvaṃ vyāpyāvatiṣṭhati ॥ 11॥

kāṃsyaghaṇṭāninādastu yathā līyati śāntaye ।
oṅkārastu tathā yojyaḥ śāntaye sarvamicchatā ॥ 12॥

yasminvilīyate śabdastatparaṃ brahma gīyate ।
dhiyaṃ hi līyate brahma so'mṛtatvāya kalpate ॥ 13॥

vāyuḥ prāṇastathākāśastrividho jīvasaṃjñakaḥ ।
sa jīvaḥ prāṇa ityukto vālāgraśatakalpitaḥ ॥ 14॥

nābhisthāne sthitaṃ viśvaṃ śuddhatattvaṃ sunirmalam ।
ādityamiva dīpyantaṃ raśmibhiścākhilaṃ śivam ॥ 15॥

sakāraṃ ca hakāraṃ ca jīvo japati sarvadā ।
nābhirandhrādviniṣkrāntaṃ viṣayavyāptivarjitam ॥ 16॥

tenedaṃ niṣkalaṃ vidyātkṣīrātsarpiryathā tathā ।
kāraṇenātmanā yuktaḥ prāṇāyāmaiśca pañcabhiḥ ॥ 17॥

catuṣkalā samāyukto bhrāmyate ca hṛdisthitaḥ ।
golakastu yadā dehe kṣīradaṇḍena vā hataḥ ॥ 18॥

etasminvasate śīghramaviśrāntaṃ mahākhagaḥ ।
yāvanniśvasito jīvastāvanniṣkalatāṃ gataḥ ॥ 19॥

nabhasthaṃ niṣkalaṃ dhyātvā mucyate bhavabandhanāt
anāhatadhvaniyutaṃ haṃsaṃ yo veda hṛdgatam ॥ 20॥

svaprakāśacidānandaṃ sa haṃsa iti gīyate ।
recakaṃ pūrakaṃ muktvā kumbhakena sthitaḥ sudhīḥ ॥ 21॥

nābhikande samau kṛtvā prāṇāpānau samāhitaḥ ।
mastakasthāmṛtāsvādaṃ pītvā dhyānena sādaram ॥ 22॥

dīpākāraṃ mahādevaṃ jvalantaṃ nābhimadhyame ।
abhiṣicyāmṛtenaiva haṃsa haṃseti yo japet ॥ 23॥

jarāmaraṇarogādi na tasya bhuvi vidyate ।
evaṃ dine dine kuryādaṇimādivibhūtaye ॥ 24॥

īśvaratvamavāpnoti sadābhyāsarataḥ pumān ।
bahavo naikamārgeṇa prāptā nityatvamāgatāḥ ॥ 25॥

haṃsavidyāmṛte loke nāsti nityatvasādhanam ।
yo dadāti mahāvidyāṃ haṃsākhyāṃ pārameśvarīm ॥ 26॥

tasya dāsyaṃ sadā kuryātprajñayā parayā saha ।
śubhaṃ vā'śubhamanyadvā yaduktaṃ guruṇā bhuvi ॥ 27॥

tatkuryādavicāreṇa śiṣyaḥ santoṣasaṃyutaḥ ।
haṃsavidyāmimāṃ labdhvā guruśuśrūṣayā naraḥ ॥ 28॥

ātmānamātmanā sākṣādbrahma buddhvā suniścalam ।
dehajātyādisambandhānvarṇāśramasamanvitān ॥ 29॥

vedaśāstrāṇi cānyāni padapāṃsumiva tyajet ।
gurubhaktiṃ sadā kuryācchreyase bhūyase naraḥ ॥ 30॥

gurureva hariḥ sākṣānnānya ityabravīcchṛtiḥ ॥ 31॥

śrutyā yaduktaṃ paramārthameva
tatsaṃśayo nātra tataḥ samastam ।
śrutyā virodhe na bhavetpramāṇaṃ
bhavedanarthāya vinā pramāṇam ॥ 32॥

dehasthaḥ sakalo jñeyo niṣkalo dehavarjitaḥ ।
āptopadeśagamyo'sau sarvataḥ samavasthitaḥ ॥ 33॥

haṃsahaṃseti yo brūyāddhaṃso brahmā hariḥ śivaḥ ।
guruvaktrāttu labhyeta pratyakṣaṃ sarvatomukham ॥ 34॥

tileṣu ca yathā tailaṃ puṣpe gandha ivāśritaḥ ।
puruṣasya śarīre'sminsa bāhyābhyantare tathā ॥ 35॥

ulkāhasto yathāloke dravyamālokya tāṃ tyajet ।
jñānena jñeyamālokya paścājjñānaṃ parityajet ॥ 36॥

puṣpavatsakalaṃ vidyādgandhastasya tu niṣkalaḥ ।
vṛkṣastu sakalaṃ vidyācchāyā tasya tu niṣkalā ॥ 37॥

niṣkalaḥ sakalo bhāvaḥ sarvatraiva vyavasthitaḥ ।
upāyaḥ sakalastadvadupeyaścaiva niṣkalaḥ ॥ 38॥

sakale sakalo bhāvo niṣkale niṣkalastathā ।
ekamātro dvimātraśca trimātraścaiva bhedataḥ ॥ 39॥

ardhamātra parā jñeyā tata ūrdhvaṃ parātparam ।
pañcadhā pañcadaivatyaṃ sakalaṃ paripaṭhyate ॥ 40॥

brahmaṇo hṛdayasthānaṃ kaṇṭhe viṣṇuḥ samāśritaḥ ।
tālumadhye sthito rudro lalāṭastho maheśvaraḥ ॥ 41॥

nāsāgre acyutaṃ vidyāttasyānte tu paraṃ padam ।
paratvāttu paraṃ nāstītyevaṃ śāstrasya nirṇayaḥ ॥ 42॥

dehātītaṃ tu taṃ vidyānnāsāgre dvādaśāṅgulam ।
tadantaṃ taṃ vijānīyāttatrastho vyāpayetprabhuḥ ॥ 43॥

mano'pyanyatra nikṣiptaṃ cakṣuranyatra pātitam ।
tathāpi yogināṃ yogo hyavicchinnaḥ pravartate ॥ 44॥

etattu paramaṃ guhyametattu paramaṃ śubham ।
nātaḥ parataraṃ kiñcinnātaḥ parataraṃ śubham ॥ 45॥

śuddhajñānāmṛtaṃ prāpya paramākṣaranirṇayam ।
guhyādguhyatamaṃ gopyaṃ grahaṇīyaṃ prayatnataḥ ॥ 46॥

nāputrāya pradātavyaṃ nāśiṣyāya kadācana ।
gurudevāya bhaktāya nityaṃ bhaktiparāya ca ॥ 47॥

pradātavyamidaṃ śāstraṃ netarebhyaḥ pradāpayet ।
dātāsya narakaṃ yāti siddhyate na kadācana ॥ 48॥

gṛhastho brahmacārī ca vānaprasthaśca bhikṣukaḥ ।
yatra tatra sthito jñānī paramākṣaravitsadā ॥ 49॥

viṣayī viṣayāsakto yāti dehāntare śubham ।
jñānādevāsya śāstrasya sarvāvastho'pi mānavaḥ ॥ 50॥

brahmahatyāśvamedhādyaiḥ puṇyapāpairna lipyate ।
codako bodhakaścaiva mokṣadaśca paraḥ smṛtaḥ ॥ 51॥

ityeṣaṃ trividho jñeya ācāryastu mahītale ।
codako darśayenmārgaṃ bodhakaḥ sthānamācaret ॥ 52॥

mokṣadastu paraṃ tattvaṃ yajjñātvā paramaśnute ।
pratyakṣayajanaṃ dehe saṃkṣepācchṛṇu gautama ॥ 53॥

teneṣṭvā sa naro yāti śāśvataṃ padamavyayam ।
svayameva tu sampaśyeddehe binduṃ ca niṣkalam ॥ 54॥

ayane dve ca viṣuve sadā paśyati mārgavit ।
kṛtvāyāmaṃ purā vatsa recapūrakakumbhakān ॥ 55॥

pūrvaṃ cobhayamuccārya arcayettu yathākramam ।
namaskāreṇa yogena mudrayārabhya cārcayet ॥ 56॥

sūryasya grahaṇaṃ vatsa pratyakṣayajanaṃ smṛtam ।
jñānātsāyujyamevoktaṃ toye toyaṃ yathā tathā ॥ 57॥

ete guṇāḥ pravartante yogābhyāsakṛtaśramaiḥ ।
tasmādyogaṃ samādāya sarvaduḥkhabahiṣkṛtaḥ ॥ 58॥

yogadhyānaṃ sadā kṛtvā jñānaṃ tanmayatāṃ vrajet ।
jñānātsvarūpaṃ paramaṃ haṃsamantraṃ samuccaret ॥ 59॥

prāṇināṃ dehamadhye tu sthito haṃsaḥ sadācyutaḥ ।
haṃsa eva paraṃ satyaṃ haṃsa eva tu śaktikam ॥ 60॥

haṃsa eva paraṃ vākyaṃ haṃsa eva tu vādikam ।
haṃsa eva paro rudro haṃsa eva parātparam ॥ 61॥

sarvadevasya madhyastho haṃsa eva maheśvaraḥ ।
pṛthivyādiśivāntaṃ tu akārādyāśca varṇakāḥ ॥ 62॥

kūṭāntā haṃsa eva syānmātṛketi vyavasthitāḥ ।
mātṛkārahitaṃ mantramādiśante na kutracit ॥ 63॥

haṃsajyotiranūpamyaṃ madhye devaṃ vyavasthitam ।
dakṣiṇāmukhamāśritya jñānamudrāṃ prakalpayet ॥ 64॥

sadā samādhiṃ kurvīta haṃsamantramanusmaran ।
nirmalasphaṭikākāraṃ divyarūpamanuttamam ॥ 65॥

madhyadeśe paraṃ haṃsaṃ jñānamudrātmarūpakam ।
prāṇo'pānaḥ samānaścodānavyānau ca vāyavaḥ ॥ 66॥

pañcakarmendriyairuktāḥ kriyāśaktibalodyatāḥ ।
nāgaḥ kūrmaśca kṛkaro devadatto dhanañjayaḥ ॥ 67॥

pañcajñānendriyairyuktā jñānaśaktibalodyatāḥ ।
pāvakaḥ śaktimadhye tu nābhicakre raviḥ sthitaḥ ॥ 68॥

bandhamudrā kṛtā yena nāsāgre tu svalocane ।
akārevahnirityāhurukāre hṛdi saṃsthitaḥ ॥ 69॥

makāre ca bhruvormadhye prāṇaśaktyā prabodhayet ।
brahmagranthirakāre ca viṣṇugranthirhṛdi sthitaḥ ॥ 70॥

rudragranthirbhruvormadhye bhidyate'kṣaravāyunā ।
akāre saṃsthito brahmā ukāre viṣṇurāsthitaḥ ॥ 71॥

makāre saṃsthito rudrastato'syāntaḥ parātparaḥ ।
kaṇṭhaṃ saṅkucya nāḍyādau stambhite yena śaktitaḥ ॥ 72॥

rasanā pīḍyamāneyaṃ ṣoḍaśī vordhvagāmini ।
trikūṭaṃ trividhā caiva golākhaṃ nikharaṃ tathā ॥ 73॥

triśaṅkhavajramoṅkāramūrdhvanālaṃ bhruvormukham ।
kuṇḍalīṃ cālayanprāṇānbhedayanśaśimaṇḍalam ॥ 74॥

sādhayanvajrakumbhāni navadvārāṇi bandhayet ।
sumanaḥpavanārūḍhaḥ sarāgo nirguṇastathā ॥ 75॥

brahmasthāne tu nādaḥ syācchākinyāmṛtavarṣiṇī ।
ṣaṭcakramaṇḍaloddhāraṃ jñānadīpaṃ prakāśayet ॥ 76॥

sarvabhūtasthitaṃ devaṃ sarveśaṃ nityamarcayet ।
ātmarūpaṃ tamālokya jñānarūpaṃ nirāmayam ॥ 77॥

dṛśyantaṃ divyarūpeṇa sarvavyāpī nirañjanaḥ ।
haṃsa haṃsa vadedvākyaṃ prāṇināṃ dehamāśritaḥ ।
saprāṇāpānayorgranthirajapetyabhidhīyate ॥ 78॥

sahasramekaṃ dvayutaṃ ṣaṭśataṃ caiva sarvadā ।
uccaranpaṭhito haṃsaḥ so'hamityabhidhīyate ॥ 79॥

pūrvabhāge hyadholiṅgaṃ śikhinyāṃ caiva paścimam ।
jyotirliṅgaṃ bhruvormadhye nityaṃ dhyāyetsadā yatiḥ ॥ 80॥

acyuto'hamacintyo'hamatarkyo'hamajo'smyaham ।
aprāṇo'hamakāyo'hamanaṅgo'smyabhayo'smyaham ॥ 81॥

aśabdo'hamarūpo'hamasparśo'smyahamadvayaḥ ।
araso'hamagandho'hamanādiramṛto'smyaham ॥ 82॥

akṣayo'hamaliṅgo'hamajaro'smyakalo'smyaham ।
aprāṇo'hamamūko'hamacintyo'smyakṛto'smyaham ॥ 83॥

antaryāmyahamagrāhyo'nirdeśyo'hamalakṣaṇaḥ ।
agotro'hamagātro'hamacakṣuṣko'smyavāgaham ॥ 84॥

adṛśyo'hamavarṇo'hamakhaṇḍo'smyahamadbhutaḥ ।
aśruto'hamadṛṣṭo'hamanveṣṭavyo'maro'smyaham ॥ 85॥

avāyurapyanākāśo'tejasko'vyabhicāryaham ।
amato'hamajāto'hamatisūkṣmo'vikāryaham ॥ 86॥

arajasko'tamasko'hamasattvosmyaguṇo'smyaham ।
amāyo'nubhavātmāhamananyo'viṣayo'smyaham ॥ 87॥

advaito'hamapūrṇo'hamabāhyo'hamanantaraḥ ।
aśroto'hamadīrgho'hamavyakto'hamanāmayaḥ ॥ 88॥

advayānandavijñānaghano'smyahamavikriyaḥ ।
aniccho'hamalepo'hamakartāsmyahamadvayaḥ ॥ 89॥

avidyākāryahīno'hamavāgrasanagocaraḥ ।
analpo'hamaśoko'hamavikalpo'smyavijvalan ॥ 90॥

ādimadhyāntahīno'hamākāśasadṛśo'smyaham ।
ātmacaitanyarūpo'hamahamānandacidghanaḥ ॥ 91॥

ānandāmṛtarūpo'hamātmasaṃsthohamantaraḥ ।
ātmakāmohamākāśātparamātmeśvarosmyaham ॥ 92॥

īśānosmyahamīḍyo'hamahamuttamapūruṣaḥ ।
utkṛṣṭo'hamupadraṣṭā ahamuttarato'smyaham ॥ 93॥

kevalo'haṃ kaviḥ karmādhyakṣo'haṃ karaṇādhipaḥ ।
guhāśayo'haṃ goptāhaṃ cakṣuṣaścakṣurasmyaham ॥ 94॥

cidānando'smyahaṃ cetā cidghanaścinmayo'smyaham ।
jyotirmayo'smyahaṃ jyāyāñjyotiṣāṃ jyotirasmyaham ॥ 95॥

tamasaḥ sākṣyahaṃ turyaturyo'haṃ tamasaḥ paraḥ ।
divyo devo'smi durdarśo dṛṣṭādhyāyo dhruvo'smyaham ॥ 96॥

nityo'haṃ niravadyo'haṃ niṣkriyo'smi nirañjanaḥ ।
nirmalo nirvikalpo'haṃ nirākhyāto'smi niścalaḥ ॥ 97॥

nirvikāro nityapūto nirguṇo niḥspṛho'smyaham ।
nirindriyo niyantāhaṃ nirapekṣo'smi niṣkalaḥ ॥ 98॥

puruṣaḥ paramātmāhaṃ purāṇaḥ paramo'smyaham ।
parāvaro'smyahaṃ prājñaḥ prapañcopaśamo'smyaham ॥ 99॥

parāmṛto'smyahaṃ pūrṇaḥ prabhurasmi purātanaḥ ।
pūrṇānandaikabodho'haṃ pratyagekaraso'smyaham ॥ 100॥

prajñāto'haṃ praśānto'haṃ prakāśaḥ parameśvaraḥ ।
ekadā cintyamāno'haṃ dvaitādvaitavilakṣaṇaḥ ॥ 101॥

buddho'haṃ bhūtapālo'haṃ bhārūpo bhagavānaham ।
mahājñeyo mahānasmi mahājñeyo maheśvaraḥ ॥ 102॥

vimukto'haṃ vibhurahaṃ vareṇyo vyāpako'smyaham ।
vaiśvānaro vāsudevo viśvataścakṣurasmyaham ॥ 103॥

viśvādhiko'haṃ viśado viṣṇurviśvakṛdasmyaham ।
śuddho'smi śukraḥ śānto'smi śāśvato'smi śivo'smyaham ॥ 104॥

sarvabhūtāntarātmahamahamasmi sanātanaḥ ।
ahaṃ sakṛdvibhāto'smi sve mahimni sadā sthitaḥ ॥ 105॥

sarvāntaraḥ svayaṃjyotiḥ sarvādhipatirasmyaham ।
sarvabhūtādhivāso'haṃ sarvavyāpī svarāḍaham ॥ 106॥

samastasākṣī sarvātmā sarvabhūtaguhāśayaḥ ।
sarvendriyaguṇābhāsaḥ sarvendriyavivarjitaḥ ॥ 107॥

sthānatrayavyatīto'haṃ sarvānugrāhako'smyaham ।
saccidānanda pūrṇātmā sarvapremāspado'smyaham ॥ 108॥

saccidānandamātro'haṃ svaprakāśo'smi cidghanaḥ ।
sattvasvarūpasanmātrasiddhasarvātmako'smyaham ॥ 109॥

sarvādhiṣṭhānasanmātraḥ svātmabandhaharo'smyaham ।
sarvagrāso'smyahaṃ sarvadraṣṭā sarvānubhūraham ॥ 110॥

evaṃ yo veda tattvena sa vai puruṣa ucyata ityupaniṣat ॥

oṃ saha nāvavatu ॥ saha nau bhunaktu ॥ saha vīryaṃ karavāvahai ॥

tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

iti brahmavidyopaniṣatsamāptā ॥