| / Vedanta / Upanishads (Sanskrit) |
Mantrika Upanishad
Sanskrit Devanagari with Roman transliteration (IAST)
॥ मन्त्रिकोपनिषत् ॥
॥ mantrikopaniṣat ॥
स्वाविद्याद्वयतत्कार्यापह्नवज्ञानभासुरम् ।
मन्त्रिकोपनिषद्वेद्यं रामचन्द्रमहं भजे ॥
svāvidyādvayatatkāryāpahnavajñānabhāsuram ।
mantrikopaniṣadvedyaṃ rāmacandramahaṃ bhaje ॥
ॐ पूर्णमदः पूर्णमिदं पूर्णात्पूर्णमुदच्यते ।
पूर्णस्य पूर्णमादाय पूर्णमेवावशिष्यते ॥
oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥
ॐ शान्तिः शान्तिः शान्तिः ॥
oṃ śāntiḥ śāntiḥ śāntiḥ ॥
ॐ अष्टपादं शुचिं हंसं त्रिसूत्रमणुमव्ययम् ।
त्रिवर्त्मानं तेजसोहं सर्वतःपश्यन्न पश्यति ॥ १॥
oṃ aṣṭapādaṃ śuciṃ haṃsaṃ trisūtramaṇumavyayam ।
trivartmānaṃ tejasohaṃ sarvataḥpaśyanna paśyati ॥ 1॥
भूतसंमोहने काले भिन्ने तमसि वैखरे ।
अन्तः पश्यन्ति सत्त्वस्था निर्गुणं गुणगह्वरे ॥ २॥
bhūtasaṃmohane kāle bhinne tamasi vaikhare ।
antaḥ paśyanti sattvasthā nirguṇaṃ guṇagahvare ॥ 2॥
अशक्यः सोऽन्यथा द्रष्टुं ध्यायमानः कुमारकैः ।
विकारजननीमज्ञामष्टरूपामजां ध्रुवाम् ॥ ३॥
aśakyaḥ so'nyathā draṣṭuṃ dhyāyamānaḥ kumārakaiḥ ।
vikārajananīmajñāmaṣṭarūpāmajāṃ dhruvām ॥ 3॥
ध्यायतेऽध्यासिता तेन तन्यते प्रेर्यते पुनः ।
सूयते पुरुषार्थं च तेनैवाधिष्ठितं जगत् ॥ ४॥
dhyāyate'dhyāsitā tena tanyate preryate punaḥ ।
sūyate puruṣārthaṃ ca tenaivādhiṣṭhitaṃ jagat ॥ 4॥
गौरनाद्यन्तवती सा जनित्री भूतभाविनी ।
सितासिता च रक्ता च सर्वकामदुधा विभोः ॥ ५॥
gauranādyantavatī sā janitrī bhūtabhāvinī ।
sitāsitā ca raktā ca sarvakāmadudhā vibhoḥ ॥ 5॥
पिबन्त्येनामविषयामविज्ञातां कुमारकाः ।
एकस्तु पिबते देवः स्वच्छन्दोऽत्र वशानुगः ॥ ६॥
pibantyenāmaviṣayāmavijñātāṃ kumārakāḥ ।
ekastu pibate devaḥ svacchando'tra vaśānugaḥ ॥ 6॥
ध्यानक्रियाभ्यां भगवान्भुङ्क्तेऽसौ प्रसहद्विभुः ।
सर्वसाधारणीं दोग्ध्रीं पीयमानां तु यज्वमिः ॥ ७॥
dhyānakriyābhyāṃ bhagavānbhuṅkte'sau prasahadvibhuḥ ।
sarvasādhāraṇīṃ dogdhrīṃ pīyamānāṃ tu yajvamiḥ ॥ 7॥
पश्यन्त्यस्यां महात्मानः सुवर्णं पिप्पलाशनम् ।
उदासीनं ध्रुवं हंसं स्नातकाध्वर्यवो जगुः ॥ ८॥
paśyantyasyāṃ mahātmānaḥ suvarṇaṃ pippalāśanam ।
udāsīnaṃ dhruvaṃ haṃsaṃ snātakādhvaryavo jaguḥ ॥ 8॥
शंसन्तमनुशंसन्ति बह्वृचाः शास्त्रकोविदाः ।
रथन्तरं बृहत्साम सप्तवैधैस्तु गीयते ॥ ९॥
śaṃsantamanuśaṃsanti bahvṛcāḥ śāstrakovidāḥ ।
rathantaraṃ bṛhatsāma saptavaidhaistu gīyate ॥ 9॥
मन्त्रोपनिषदं ब्रह्म पदक्रमसमन्वितम् ।
पठन्ति भार्गवा ह्येते ह्यथर्वाणो भृगूत्तमाः ॥ १०॥
mantropaniṣadaṃ brahma padakramasamanvitam ।
paṭhanti bhārgavā hyete hyatharvāṇo bhṛgūttamāḥ ॥ 10॥
सब्रह्मचारिवृत्तिश्च स्तम्भोऽथ फलितस्तथा ।
अनड्वान्रोहितोच्छिष्टः पश्यन्तो बहुविस्तरम् ॥ ११॥
sabrahmacārivṛttiśca stambho'tha phalitastathā ।
anaḍvānrohitocchiṣṭaḥ paśyanto bahuvistaram ॥ 11॥
कालः प्राणश्च भगवान्मृत्युः शर्वो महेश्वरः ।
उग्रो भवश्च रुद्रश्च ससुरः सासुरस्तथा ॥ १२॥
kālaḥ prāṇaśca bhagavānmṛtyuḥ śarvo maheśvaraḥ ।
ugro bhavaśca rudraśca sasuraḥ sāsurastathā ॥ 12॥
प्रजापतिर्विराट् चैव पुरुषः सलिलमेव च ।
स्तूयते मन्त्रसंस्तुत्यैरथर्वविदितैर्विभुः ॥ १३॥
prajāpatirvirāṭ caiva puruṣaḥ salilameva ca ।
stūyate mantrasaṃstutyairatharvaviditairvibhuḥ ॥ 13॥
तं षड्विंशक इत्येते सप्तविंशं तथापरे ।
पुरुषं निर्गुणं साङ्ख्यमथर्वशिरसो विदुः ॥ १४॥
taṃ ṣaḍviṃśaka ityete saptaviṃśaṃ tathāpare ।
puruṣaṃ nirguṇaṃ sāṅkhyamatharvaśiraso viduḥ ॥ 14॥
चतुर्विंशतिसंख्यातं व्यक्तमव्यक्तमेव च ।
अद्वैतं द्वैतमित्याहुस्त्रिधा तं पञ्चधा तथा ॥ १५॥
caturviṃśatisaṃkhyātaṃ vyaktamavyaktameva ca ।
advaitaṃ dvaitamityāhustridhā taṃ pañcadhā tathā ॥ 15॥
ब्रह्माद्यं स्थावरान्तं च पश्यन्ति ज्ञानचक्षुषः ।
तमेकमेव पश्यन्ति परिशुभ्रं विभुं द्विजाः ॥ १६॥
brahmādyaṃ sthāvarāntaṃ ca paśyanti jñānacakṣuṣaḥ ।
tamekameva paśyanti pariśubhraṃ vibhuṃ dvijāḥ ॥ 16॥
यस्मिन्सर्वमिदं प्रोतं ब्रह्म स्थावरजङ्गमम् ।
तस्मिन्नेव लयं यान्ति स्रवन्त्यः सागरे यथा ॥ १७॥
yasminsarvamidaṃ protaṃ brahma sthāvarajaṅgamam ।
tasminneva layaṃ yānti sravantyaḥ sāgare yathā ॥ 17॥
यस्मिन्भावाः प्रलीयन्ते लीनाश्चाव्यक्ततां ययुः ।
पश्यन्ति व्यक्ततां भूयो जायन्ते बुद्बुदा इव ॥ १८॥
yasminbhāvāḥ pralīyante līnāścāvyaktatāṃ yayuḥ ।
paśyanti vyaktatāṃ bhūyo jāyante budbudā iva ॥ 18॥
क्षेत्रज्ञाधिष्ठितं चैव कारणैर्विद्यते पुनः ।
एवं स भगवान्देवं पश्यन्त्यन्ये पुनः पुनः ॥ १९॥
kṣetrajñādhiṣṭhitaṃ caiva kāraṇairvidyate punaḥ ।
evaṃ sa bhagavāndevaṃ paśyantyanye punaḥ punaḥ ॥ 19॥
ब्रह्म ब्रह्मेत्यथायान्ति ये विदुर्ब्राह्मणास्तथा ।
अत्रैव ते लयं यान्ति लीनाश्चाव्यक्तशालिनः ॥
brahma brahmetyathāyānti ye vidurbrāhmaṇāstathā ।
atraiva te layaṃ yānti līnāścāvyaktaśālinaḥ ॥
लीनाश्चाव्यक्तशालिन इत्युपनिषत् ॥
līnāścāvyaktaśālina ityupaniṣat ॥
ॐ पूर्णमदः पूर्णमिदं पूर्णात्पूर्णमुदच्यते ।
पूर्णस्य पूर्णमादाय पूर्णमेवावशिष्यते ॥
oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥
ॐ शान्तिः शान्तिः शान्तिः ॥
oṃ śāntiḥ śāntiḥ śāntiḥ ॥
इति मन्त्रिकोपनिषत्समाप्ता ॥
iti mantrikopaniṣatsamāptā ॥
YOU MAY ALSO LIKE
