Kshurika Upanishad

॥ kṣurikopaniṣat ॥

kaivalyanāḍīkāntasthaparābhūminivāsinam ।
kṣurikopaniṣadyogabhāsuraṃ rāmamāśraye ॥

oṃ sahanāvavatu ॥ saha nau bhunaktu ॥ saha vīryaṃ karavāvahai ॥

tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

oṃ kṣurikāṃ sampravakṣyāmi dhāraṇāṃ yogasiddhaye ।
yaṃ prāpya na punarjanma yogayuktasya jāyate ॥ 1॥

vedatattvārthavihitaṃ yathoktaṃ hi svayaṃbhuvā ।
niḥśabdaṃ deśamāsthāya tatrāsanamavasthitaḥ ॥ 2॥

kūrmo'ṅgānīva saṃhṛtya mano hṛdi nirudhya ca ।
mātrādvādaśayogena praṇavena śanaiḥ śanaiḥ ॥ 3॥

pūrayetsarvamātmānaṃ sarvadvāraṃ nirudhya ca ।
uromukhakaṭigrīvaṃ kiñcidbhūdayamunnatam ॥ 4॥

prāṇānsandhārayettasmināsābhyantaracāriṇaḥ ।
bhūtvā tatra gataḥ prāṇaḥ śanairatha samutsṛjet ॥ 5॥

sthiramātrādṛḍhaṃ kṛtvā aṅguṣṭhena samāhitaḥ ।
dve gulphe tu prakurvīta jaṅghe caiva trayastrayaḥ ॥ 6॥

dve jānunī tathorubhyāṃ gude śiśne trayastrayaḥ ।
vāyorāyatanaṃ cātra nābhideśe samāśrayet ॥ 7॥

tatra nāḍī suṣumnā tu nāḍībhirbahubhirvṛtā ॥
aṇu raktaśca pītāśca kṛṣṇāstāmrā vilohitāḥ ॥ 8॥

atisūkṣmāṃ ca tanvīṃ ca śuklāṃ nāḍīṃ samāśrayet ।
tatra saṃcārayetprāṇānūrṇanābhīva tantunā ॥ 9॥

tato raktotpalābhāsaṃ puruṣāyatanaṃ mahat
daharaṃ puṇḍarīkaṃ tadvedānteṣu nigadyate ॥ 10॥

tadbhittvā kaṇṭhamāyāti tāṃ nāḍīṃ pūrayanyataḥ ।
manasastu kṣuraṃ gṛhya sutīkṣṇaṃ buddhinirmalam ॥ 11॥

pādasyopari yanmadhye tadrūpaṃ nāma kṛntayet ।
manodvāreṇa tīkṣṇena yogamāśritya nityaśaḥ ॥ 12॥

indravajra iti proktaṃ marmajaṅghānukīrtanam ।
taddhyānabalayogena dhāraṇābhirnikṛntayet ॥ 13॥

ūrvormadhye tu saṃsthāpya marmaprāṇavimocanam ।
caturabhyāsayogena chindedanabhiśaṅkitaḥ ॥14॥

tataḥ kaṇṭhāntare yogī samūhannāḍisañcayam ।
ekottaraṃ nāḍiśataṃ tāsāṃ madhye varāḥ smṛtāḥ ॥ 15॥

suṣumnā tu pare līnā virajā brahmarūpiṇī ।
iḍā tiṣṭhati vāmena piṅgalā dakṣiṇena ca ॥ 16॥

tayormadhye varaṃ sthānaṃ yastaṃ veda sa vedavit ।
dvāsaptatisahasrāṇi pratināḍīṣu taitilam ॥ 17॥

chidyate dhyānayogena suṣumnaikā na chidyate ।
yoganirmaladhāreṇa kṣureṇānalavarcasā ॥ 18॥

chindennāḍīśataṃ dhīraḥ prabhāvādiha janmani ।
jātīpuṣpasamāyogairyathā vāsyati taitilam ॥ 19॥

evaṃ śubhāśubhairbhāvaiḥ sā nāḍīti vibhāvayet ।
tadbhāvitāḥ prapadyante punarjanmavivarjitāḥ ॥ 20॥

tapovijitacittastu niḥśabdaṃ deśamāsthitaḥ ।
niḥsaṅgatattvayogajño nirapekṣaḥ śanaiḥ śanaiḥ ॥ 21॥

pāśaṃ chittvā yathā haṃso nirviśaṅkaṃ khamutkramet ।
chinnapāśastathā jīvaḥ saṃsāraṃ tarate sadā ॥ 22॥

yathā nirvāṇakāle tu dīpo dagdhvā layaṃ vrajet ।
tathā sarvāṇi karmāṇi yogī dagdhvā layaṃ vrajet ॥ 23॥

prāṇāyāmasutīkṣṇena mātrādhāreṇa yogavit ।
vairāgyopalaghṛṣṭena chittvā taṃ tu na badhyate ॥ 24॥

amṛtatvaṃ samāpnoti yadā kāmātsa mucyate ।
sarveṣaṇāvinirmuktaśchittvā taṃ tu na badhyata ityupaniṣat ॥

oṃ saha nāvavatu ॥ saha nau bhunaktu ॥ saha vīryaṃ karavāvahai ॥

tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

॥ iti kṣurikopaniṣatsamāptā ॥