| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
២. ឧបោសថក្ខន្ធកំ
2. Uposathakkhandhakaṃ
សន្និបាតានុជាននាទិកថាវណ្ណនា
Sannipātānujānanādikathāvaṇṇanā
១៣២. ឧបោសថក្ខន្ធកេ តរន្តិ ប្លវន្តិ ឯត្ថ ពាលាតិ តិត្ថំ។ ឥតោតិ ឥមស្មិំ សាសនេ លទ្ធិតោ។ តំ កថេន្តីតិ ‘‘ឥមស្មិំ នាម ទិវសេ មុហុត្តេ វា ឥទំ កត្តព្ព’’ន្តិអាទិនា កថេន្តិ។
132. Uposathakkhandhake taranti plavanti ettha bālāti titthaṃ. Itoti imasmiṃ sāsane laddhito. Taṃ kathentīti ‘‘imasmiṃ nāma divase muhutte vā idaṃ kattabba’’ntiādinā kathenti.
១៣៤. ‘‘សុណាតុ មេ ភន្តេ’’តិអាទីសុ យំ វត្តព្ពំ, តំ មាតិកាដ្ឋកថាយំ (កង្ខា. អដ្ឋ. និទានវណ្ណនា) វិត្ថារតោ អាគតមេវាតិ ន ឥធ វិត្ថារយិស្សាម, អត្ថិកេហិ បន តតោយេវ គហេតព្ពំ។
134. ‘‘Suṇātu me bhante’’tiādīsu yaṃ vattabbaṃ, taṃ mātikāṭṭhakathāyaṃ (kaṅkhā. aṭṭha. nidānavaṇṇanā) vitthārato āgatamevāti na idha vitthārayissāma, atthikehi pana tatoyeva gahetabbaṃ.
១៣៥. អាបជ្ជិត្វា វា វុដ្ឋិតោតិ ឯត្ថ អារោចិតាបិ អាបត្តិ អសន្តី នាម ហោតីតិ វេទិតព្ពំ។ តេនេវ មាតិកាដ្ឋកថាយំ (កង្ខា. អដ្ឋ. និទានវណ្ណនា) វុត្តំ ‘‘យស្ស បន ឯវំ អនាបន្នា វា អាបត្តិ អាបជ្ជិត្វា ច បន វុដ្ឋិតា វា ទេសិតា វា អារោចិតា វា, តស្ស សា អាបត្តិ អសន្តី នាម ហោតី’’តិ។ មុសាវាទោ នាម វចីភេទបច្ចយា ហោតីតិ អាហ ‘‘ន មុសាវាទលក្ខណេនា’’តិ។ ភគវតោ បន វចនេនាតិ សម្បជានមុសាវាទេ កិំ ហោតិ? ‘‘ទុក្កដំ ហោតី’’តិ ឥមិនា វចនេន។ វចីទ្វារេ អកិរិយសមុដ្ឋានា អាបត្តិ ហោតីតិ យស្មា យស្ស ភិក្ខុនោ អធម្មិកាយ បដិញ្ញាយ តុណ្ហីភូតស្ស និសិន្នស្ស មនោទ្វារេ អាបត្តិ នាម នត្ថិ, យស្មា បន អាវិ កាតព្ពំ ន អាវិ អកាសិ, តេនស្ស វចីទ្វារេ អកិរិយសមុដ្ឋានា អាបត្តិ ហោតិ។
135.Āpajjitvā vā vuṭṭhitoti ettha ārocitāpi āpatti asantī nāma hotīti veditabbaṃ. Teneva mātikāṭṭhakathāyaṃ (kaṅkhā. aṭṭha. nidānavaṇṇanā) vuttaṃ ‘‘yassa pana evaṃ anāpannā vā āpatti āpajjitvā ca pana vuṭṭhitā vā desitā vā ārocitā vā, tassa sā āpatti asantī nāma hotī’’ti. Musāvādo nāma vacībhedapaccayā hotīti āha ‘‘na musāvādalakkhaṇenā’’ti. Bhagavato pana vacanenāti sampajānamusāvāde kiṃ hoti? ‘‘Dukkaṭaṃ hotī’’ti iminā vacanena. Vacīdvāre akiriyasamuṭṭhānā āpatti hotīti yasmā yassa bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi, yasmā pana āvi kātabbaṃ na āvi akāsi, tenassa vacīdvāre akiriyasamuṭṭhānā āpatti hoti.
វាចាតិ វាចាយ, យ-ការលោបេនាយំ និទ្ទេសោ។ កេនចិ មនុជេន វាចាយ អនាលបន្តោតិ យោជេតព្ពំ។ គិរំ នោ ច បរេ ភណេយ្យាតិ ‘‘ឥមេ សោស្សន្តី’’តិ បរបុគ្គលេ សន្ធាយ សទ្ទម្បិ ន និច្ឆារេយ្យ។ អាបជ្ជេយ្យ វាចសិកន្តិ វាចតោ សមុដ្ឋិតំ អាបត្តិំ អាបជ្ជេយ្យ។
Vācāti vācāya, ya-kāralopenāyaṃ niddeso. Kenaci manujena vācāya anālapantoti yojetabbaṃ. Giraṃ no ca pare bhaṇeyyāti ‘‘ime sossantī’’ti parapuggale sandhāya saddampi na nicchāreyya. Āpajjeyya vācasikanti vācato samuṭṭhitaṃ āpattiṃ āpajjeyya.
អន្តរាយករោតិ វិប្បដិសារវត្ថុតាយ បាមោជ្ជាទិសម្ភវំ និវារេត្វា បឋមជ្ឈានាទីនំ អធិគមាយ អន្តរាយករោ។ តស្ស ភិក្ខុនោ ផាសុ ហោតីតិ អវិប្បដិសារមូលកានំ បាមោជ្ជាទីនំ វសេន តស្ស ភិក្ខុនោ សុខា បដិបទា សម្បជ្ជតីតិ អត្ថោ។
Antarāyakaroti vippaṭisāravatthutāya pāmojjādisambhavaṃ nivāretvā paṭhamajjhānādīnaṃ adhigamāya antarāyakaro. Tassa bhikkhuno phāsu hotīti avippaṭisāramūlakānaṃ pāmojjādīnaṃ vasena tassa bhikkhuno sukhā paṭipadā sampajjatīti attho.
សន្និបាតានុជាននាទិកថាវណ្ណនា និដ្ឋិតា។
Sannipātānujānanādikathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៦៨. សន្និបាតានុជាននា • 68. Sannipātānujānanā
៦៩. បាតិមោក្ខុទ្ទេសានុជាននា • 69. Pātimokkhuddesānujānanā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / សន្និបាតានុជាននាទិកថា • Sannipātānujānanādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / សន្និបាតានុជាននាទិកថាវណ្ណនា • Sannipātānujānanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / សន្និបាតានុជាននាទិកថាវណ្ណនា • Sannipātānujānanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦៨. សន្និបាតានុជាននាទិកថា • 68. Sannipātānujānanādikathā
