| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៤. សក្កច្ចវគ្គវណ្ណនា
4. Sakkaccavaggavaṇṇanā
៦០៨. ចតុត្ថវគ្គាទីសុ សបទានន្តិ ឯត្ថ ទានំ វុច្ចតិ អវខណ្ឌនំ, អបេតំ ទានតោ អបទានំ, សហ អបទានេន សបទានំ, អវខណ្ឌនវិរហិតំ អនុបដិបាដិយាតិ វុត្តំ ហោតិ។ តេនាហ ‘‘តត្ថ តត្ថ ឱធិំ អកត្វា’’តិអាទិ។
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
៦១១. វិញ្ញត្តិយន្តិ សូបោទនវិញ្ញត្តិសិក្ខាបទំ សន្ធាយ វទតិ។ ‘‘វត្តព្ពំ នត្ថី’’តិ ឥមិនា បាឡិយាវ សព្ពំ វិញ្ញាយតីតិ ទស្សេតិ។ តត្ថ បាឡិយំ អសញ្ចិច្ចាតិអាទីសុ វត្ថុមត្តំ ញត្វា ភុញ្ជនេន អាបត្តិំ អាបជ្ជន្តស្សេវ បុន បណ្ណត្តិំ ញត្វា មុខគតំ ឆឌ្ឌេតុកាមស្ស យំ អរុចិយា បវិដ្ឋំ, តំ អសញ្ចិច្ច បវិដ្ឋំ នាម, តត្ថ អនាបត្តិ។ តទេវ បុន អញ្ញវិហិតតាយ វា អវិញ្ញត្តមិទន្តិសញ្ញាយ វា ភុញ្ជនេ ‘‘អសតិយា’’តិ វុច្ចតិ។
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
៦១៣. ‘‘អញ្ញស្សត្ថាយា’’តិ ឥទមស្ស សិក្ខាបទស្ស អត្តនោ អត្ថាយ វិញ្ញាបេត្វា សយំ ភុញ្ជនេ ឯវ បញ្ញត្តត្តា ឥមិនា សិក្ខាបទេន អនាបត្តិំ សន្ធាយ វុត្តំ។ បញ្ចសហធម្មិកានំ បន អត្ថាយ អញ្ញាតកអប្បវារិតដ្ឋានេ វិញ្ញាបេន្តោ វិញ្ញត្តិក្ខណេ អដ្ឋកថាសុ សុត្តានុលោមតោ វុត្តអកតវិញ្ញត្តិទុក្កដតោ ន មុច្ចតិ។ សញ្ចិច្ច ភុញ្ជនក្ខណេ សយញ្ច អញ្ញេ ច មិច្ឆាជីវតោ ន មុច្ចន្តីតិ គហេតព្ពំ។
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
៦១៥. ‘‘កុក្កុដណ្ឌំ អតិខុទ្ទក’’ន្តិ ឥទំ អសារុប្បវសេន វុត្តំ, អតិមហន្តេ ឯវ អាបត្តីតិ ទដ្ឋព្ពំ។ ភុញ្ជន្តេន បន ចោរាទិភយំ បដិច្ច មហន្តម្បិ អបរិមណ្ឌលម្បិ កត្វា សីឃំ ភុញ្ជនវសេនេត្ថ អាបទា។ ឯវមញ្ញេសុបិ យថានុរូបំ ទដ្ឋព្ពំ។
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
សក្កច្ចវគ្គវណ្ណនា និដ្ឋិតា។
Sakkaccavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៤. សក្កច្ចវគ្គោ • 4. Sakkaccavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៤. សក្កច្ចវគ្គវណ្ណនា • 4. Sakkaccavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. សក្កច្ចវគ្គវណ្ណនា • 4. Sakkaccavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៤. សក្កច្ចវគ្គ-អត្ថយោជនា • 4. Sakkaccavagga-atthayojanā
