| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៤. សក្កច្ចវគ្គវណ្ណនា
4. Sakkaccavaggavaṇṇanā
៦០៨. ចតុត្ថវគ្គេ សបទានន្តិ ឯត្ថ ទានំ វុច្ចតិ អវខណ្ឌនំ, អបេតំ ទានតោ អបទានំ, អនវខណ្ឌនន្តិ អត្ថោ។ សហ អបទានេន សបទានំ, អវខណ្ឌនវិរហិតំ , អនុបដិបាដិយាតិ វុត្តំ ហោតិ។ តេនាហ ‘‘តត្ថ តត្ថ ឱធិំ អកត្វា អនុបដិបាដិយា’’តិ។
608. Catutthavagge sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, anavakhaṇḍananti attho. Saha apadānena sapadānaṃ, avakhaṇḍanavirahitaṃ , anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā anupaṭipāṭiyā’’ti.
៦១១. យស្មិំ សមយេ ‘‘បាណោ ន ហន្តព្ពោ’’តិ រាជានោ ភេរិំ ចរាបេន្តិ, អយំ មាឃាតសមយោ នាម។ ឥធ អនាបត្តិយំ គិលានោ ន អាគតោ, តស្មា គិលានស្សបិ អាបត្តិ។ សូបោទនវិញ្ញត្តិសិក្ខាបទេ អសញ្ចិច្ច អស្សតិយាតិ ឯត្ថ ‘‘មុខេ បក្ខិបិត្វា បុន វិប្បដិសារី ហុត្វា ឆឌ្ឌេន្តស្ស អរុចិយា បវិសន្តេ ‘អសញ្ចិច្ចា’តិ វុច្ចតិ, វិញ្ញត្តិម្បិ អវិញ្ញត្តិម្បិ ឯតស្មិំ ឋានេ ឋិតំ សហសា គហេត្វា ភុញ្ជន្តេ ‘អស្សតិយា’តិ វុច្ចតី’’តិ តីសុបិ គណ្ឋិបទេសុ វុត្តំ។
611. Yasmiṃ samaye ‘‘pāṇo na hantabbo’’ti rājāno bheriṃ carāpenti, ayaṃ māghātasamayo nāma. Idha anāpattiyaṃ gilāno na āgato, tasmā gilānassapi āpatti. Sūpodanaviññattisikkhāpade asañcicca assatiyāti ettha ‘‘mukhe pakkhipitvā puna vippaṭisārī hutvā chaḍḍentassa aruciyā pavisante ‘asañciccā’ti vuccati, viññattimpi aviññattimpi etasmiṃ ṭhāne ṭhitaṃ sahasā gahetvā bhuñjante ‘assatiyā’ti vuccatī’’ti tīsupi gaṇṭhipadesu vuttaṃ.
៦១៤-៦១៥. ឧជ្ឈានេ សញ្ញា ឧជ្ឈានសញ្ញា, សា អស្ស អត្ថីតិ ឧជ្ឈានសញ្ញី។ ‘‘មយូរណ្ឌំ អតិមហន្ត’’ន្តិ វចនតោ មយូរណ្ឌប្បមាណោ កពឡោ ន វដ្ដតិ។ កេចិ បន ‘‘មយូរណ្ឌតោ មហន្តោ ន វដ្ដតី’’តិ វទន្តិ, តំ ន គហេតព្ពំ, ‘‘នាតិមហន្ត’’ន្តិ ច អតិមហន្តស្សេវ បដិក្ខិត្តត្តា ខុទ្ទកេ អាបត្តិ ន ទិស្សតិ។ ‘‘មយូរណ្ឌំ អតិមហន្តំ, កុក្កុដណ្ឌំ អតិខុទ្ទកំ, តេសំ វេមជ្ឈប្បមាណោ’’តិ ឥមិនា បន សារុប្បវសេន ខុទ្ទកម្បិ បដិក្ខិបិត្វា បរិច្ឆេទោ ន ទស្សិតោតិ វេទិតព្ពំ។
614-615. Ujjhāne saññā ujjhānasaññā, sā assa atthīti ujjhānasaññī. ‘‘Mayūraṇḍaṃ atimahanta’’nti vacanato mayūraṇḍappamāṇo kabaḷo na vaṭṭati. Keci pana ‘‘mayūraṇḍato mahanto na vaṭṭatī’’ti vadanti, taṃ na gahetabbaṃ, ‘‘nātimahanta’’nti ca atimahantasseva paṭikkhittattā khuddake āpatti na dissati. ‘‘Mayūraṇḍaṃ atimahantaṃ, kukkuṭaṇḍaṃ atikhuddakaṃ, tesaṃ vemajjhappamāṇo’’ti iminā pana sāruppavasena khuddakampi paṭikkhipitvā paricchedo na dassitoti veditabbaṃ.
សក្កច្ចវគ្គវណ្ណនា និដ្ឋិតា។
Sakkaccavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៤. សក្កច្ចវគ្គោ • 4. Sakkaccavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៤. សក្កច្ចវគ្គវណ្ណនា • 4. Sakkaccavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. សក្កច្ចវគ្គវណ្ណនា • 4. Sakkaccavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៤. សក្កច្ចវគ្គ-អត្ថយោជនា • 4. Sakkaccavagga-atthayojanā
