| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៣៨. បារិវាសិកាទិកថា
238. Pārivāsikādikathā
៣៩៣. បារិវាសិកចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ។ មូលាយ បដិកស្សនារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ។ មានត្តារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ។ មានត្តចារិកចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ។ អព្ភានារហចតុត្ថោ ចេ, ភិក្ខវេ, បរិវាសំ ទទេយ្យ, មូលាយ បដិកស្សេយ្យ, មានត្តំ ទទេយ្យ, តំវីសោ អព្ភេយ្យ – អកម្មំ ន ច ករណីយំ។
393. Pārivāsikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mūlāya paṭikassanārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Abbhānārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ.
៣៩៤. ឯកច្ចស្ស, ភិក្ខវេ, សង្ឃមជ្ឈេ បដិក្កោសនា រុហតិ, ឯកច្ចស្ស ន រុហតិ។ កស្ស ច, ភិក្ខវេ, សង្ឃមជ្ឈេ បដិក្កោសនា ន រុហតិ? ភិក្ខុនិយា, ភិក្ខវេ, សង្ឃមជ្ឈេ បដិក្កោសនា ន រុហតិ។ សិក្ខមានាយ, ភិក្ខវេ…បេ.… សាមណេរស្ស, ភិក្ខវេ… សាមណេរិយា, ភិក្ខវេ… សិក្ខាបច្ចក្ខាតកស្ស ភិក្ខវេ… អន្តិមវត្ថុំ អជ្ឈាបន្នកស្ស, ភិក្ខវេ … ឧម្មត្តកស្ស, ភិក្ខវេ… ខិត្តចិត្តស្ស, ភិក្ខវេ… វេទនាដ្ដស្ស, ភិក្ខវេ… អាបត្តិយា អទស្សនេ ឧក្ខិត្តកស្ស, ភិក្ខវេ… អាបត្តិយា អប្បដិកម្មេ ឧក្ខិត្តកស្ស, ភិក្ខវេ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកស្ស, ភិក្ខវេ… បណ្ឌកស្ស, ភិក្ខវេ… ថេយ្យសំវាសកស្ស, ភិក្ខវេ… តិត្ថិយបក្កន្តកស្ស, ភិក្ខវេ … តិរច្ឆានគតស្ស ភិក្ខវេ… មាតុឃាតកស្ស, ភិក្ខវេ… បិតុឃាតកស្ស, ភិក្ខវេ… អរហន្តឃាតកស្ស, ភិក្ខវេ… ភិក្ខុនិទូសកស្ស, ភិក្ខវេ… សង្ឃភេទកស្ស, ភិក្ខវេ… លោហិតុប្បាទកស្ស, ភិក្ខវេ… ឧភតោព្យញ្ជនកស្ស, ភិក្ខវេ… នានាសំវាសកស្ស, ភិក្ខវេ… នានាសីមាយ ឋិតស្ស, ភិក្ខវេ… ឥទ្ធិយា វេហាសេ ឋិតស្ស, ភិក្ខវេ, យស្ស សង្ឃោ កម្មំ ករោតិ, តស្ស ច 1, ភិក្ខវេ, សង្ឃមជ្ឈេ បដិក្កោសនា ន រុហតិ។ ឥមេសំ ខោ, ភិក្ខវេ, សង្ឃមជ្ឈេ បដិក្កោសនា ន រុហតិ។
394. Ekaccassa, bhikkhave, saṅghamajjhe paṭikkosanā ruhati, ekaccassa na ruhati. Kassa ca, bhikkhave, saṅghamajjhe paṭikkosanā na ruhati? Bhikkhuniyā, bhikkhave, saṅghamajjhe paṭikkosanā na ruhati. Sikkhamānāya, bhikkhave…pe… sāmaṇerassa, bhikkhave… sāmaṇeriyā, bhikkhave… sikkhāpaccakkhātakassa bhikkhave… antimavatthuṃ ajjhāpannakassa, bhikkhave … ummattakassa, bhikkhave… khittacittassa, bhikkhave… vedanāṭṭassa, bhikkhave… āpattiyā adassane ukkhittakassa, bhikkhave… āpattiyā appaṭikamme ukkhittakassa, bhikkhave… pāpikāya diṭṭhiyā appaṭinissagge ukkhittakassa, bhikkhave… paṇḍakassa, bhikkhave… theyyasaṃvāsakassa, bhikkhave… titthiyapakkantakassa, bhikkhave … tiracchānagatassa bhikkhave… mātughātakassa, bhikkhave… pitughātakassa, bhikkhave… arahantaghātakassa, bhikkhave… bhikkhunidūsakassa, bhikkhave… saṅghabhedakassa, bhikkhave… lohituppādakassa, bhikkhave… ubhatobyañjanakassa, bhikkhave… nānāsaṃvāsakassa, bhikkhave… nānāsīmāya ṭhitassa, bhikkhave… iddhiyā vehāse ṭhitassa, bhikkhave, yassa saṅgho kammaṃ karoti, tassa ca 2, bhikkhave, saṅghamajjhe paṭikkosanā na ruhati. Imesaṃ kho, bhikkhave, saṅghamajjhe paṭikkosanā na ruhati.
កស្ស ច, ភិក្ខវេ, សង្ឃមជ្ឈេ បដិក្កោសនា រុហតិ? ភិក្ខុស្ស, ភិក្ខវេ, បកតត្តស្ស
Kassa ca, bhikkhave, saṅghamajjhe paṭikkosanā ruhati? Bhikkhussa, bhikkhave, pakatattassa
សមានសំវាសកស្ស សមានសីមាយ ឋិតស្ស អន្តមសោ អានន្តរិកស្សាបិ 3 ភិក្ខុនោ វិញ្ញាបេន្តស្ស សង្ឃមជ្ឈេ បដិក្កោសនា រុហតិ។ ឥមស្ស ខោ, ភិក្ខវេ, សង្ឃមជ្ឈេ បដិក្កោសនា រុហតិ។
Samānasaṃvāsakassa samānasīmāya ṭhitassa antamaso ānantarikassāpi 4 bhikkhuno viññāpentassa saṅghamajjhe paṭikkosanā ruhati. Imassa kho, bhikkhave, saṅghamajjhe paṭikkosanā ruhati.
បារិវាសិកាទិកថា និដ្ឋិតា។
Pārivāsikādikathā niṭṭhitā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ចតុវគ្គករណាទិកថា • Catuvaggakaraṇādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២៣៧. ចតុវគ្គករណាទិកថា • 237. Catuvaggakaraṇādikathā
