| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៣៩. ទ្វេនិស្សារណាទិកថា
239. Dvenissāraṇādikathā
៣៩៥. ទ្វេមា, ភិក្ខវេ, និស្សារណា។ អត្ថិ, ភិក្ខវេ, បុគ្គលោ អប្បត្តោ និស្សារណំ។ តញ្ចេ សង្ឃោ និស្សារេតិ, ឯកច្ចោ សុនិស្សារិតោ, ឯកច្ចោ ទុន្និស្សារិតោ។ កតមោ ច, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – ទុន្និស្សារិតោ? ឥធ បន, ភិក្ខវេ, ភិក្ខុ សុទ្ធោ ហោតិ អនាបត្តិកោ។ តញ្ចេ សង្ឃោ និស្សារេតិ – ទុន្និស្សារិតោ។ អយំ វុច្ចតិ, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – ទុន្និស្សារិតោ។
395. Dvemā, bhikkhave, nissāraṇā. Atthi, bhikkhave, puggalo appatto nissāraṇaṃ. Tañce saṅgho nissāreti, ekacco sunissārito, ekacco dunnissārito. Katamo ca, bhikkhave, puggalo appatto nissāraṇaṃ, tañce saṅgho nissāreti – dunnissārito? Idha pana, bhikkhave, bhikkhu suddho hoti anāpattiko. Tañce saṅgho nissāreti – dunnissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – dunnissārito.
កតមោ ច, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – សុនិស្សារិតោ? ឥធ បន, ភិក្ខវេ, ភិក្ខុ ពាលោ ហោតិ អព្យត្តោ អាបត្តិពហុលោ អនបទានោ, គិហិសំសដ្ឋោ វិហរតិ អននុលោមិកេហិ គិហិសំសគ្គេហិ, តញ្ចេ សង្ឃោ និស្សារេតិ – សុនិស្សារិតោ។ អយំ វុច្ចតិ, ភិក្ខវេ, បុគ្គលោ អប្បត្តោ និស្សារណំ, តញ្ចេ សង្ឃោ និស្សារេតិ – សុនិស្សារិតោ។
Katamo ca, bhikkhave, puggalo appatto nissāraṇaṃ, tañce saṅgho nissāreti – sunissārito? Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi, tañce saṅgho nissāreti – sunissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – sunissārito.
៣៩៦. ទ្វេមា , ភិក្ខវេ, ឱសារណា។ អត្ថិ, ភិក្ខវេ, បុគ្គលោ អប្បត្តោ ឱសារណំ តញ្ចេ សង្ឃោ ឱសារេតិ, ឯកច្ចោ សោសារិតោ, ឯកច្ចោ ទោសារិតោ។ កតមោ ច, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ? បណ្ឌកោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ។ ថេយ្យសំវាសកោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ។ តិត្ថិយបក្កន្តកោ, ភិក្ខវេ…បេ.… តិរច្ឆានគតោ, ភិក្ខវេ… មាតុឃាតកោ, ភិក្ខវេ… បិតុឃាតកោ, ភិក្ខវេ… អរហន្តឃាតកោ, ភិក្ខវេ… ភិក្ខុនិទូសកោ, ភិក្ខវេ… សង្ឃភេទកោ, ភិក្ខវេ… លោហិតុប្បាទកោ, ភិក្ខវេ… ឧភតោព្យញ្ជនកោ, ភិក្ខវេ, អប្បត្តោ, ឱសារណំ, តញ្ចេ សង្ឃោ ឱសារេតិ – ទោសារិតោ។ អយំ វុច្ចតិ, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – ទោសារិតោ។ ឥមេ វុច្ចន្តិ, ភិក្ខវេ, បុគ្គលា អប្បត្តា ឱសារណំ, តេ ចេ សង្ឃោ ឱសារេតិ – ទោសារិតា។
396. Dvemā , bhikkhave, osāraṇā. Atthi, bhikkhave, puggalo appatto osāraṇaṃ tañce saṅgho osāreti, ekacco sosārito, ekacco dosārito. Katamo ca, bhikkhave, puggalo appatto osāraṇaṃ, tañce saṅgho osāreti – dosārito? Paṇḍako, bhikkhave, appatto osāraṇaṃ, tañce saṅgho osāreti – dosārito. Theyyasaṃvāsako, bhikkhave, appatto osāraṇaṃ, tañce saṅgho osāreti – dosārito. Titthiyapakkantako, bhikkhave…pe… tiracchānagato, bhikkhave… mātughātako, bhikkhave… pitughātako, bhikkhave… arahantaghātako, bhikkhave… bhikkhunidūsako, bhikkhave… saṅghabhedako, bhikkhave… lohituppādako, bhikkhave… ubhatobyañjanako, bhikkhave, appatto, osāraṇaṃ, tañce saṅgho osāreti – dosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – dosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – dosāritā.
កតមោ ច, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ? ហត្ថច្ឆិន្នោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ, សោសារិតោ។ បាទច្ឆិន្នោ, ភិក្ខវេ…បេ.… ហត្ថបាទច្ឆិន្នោ, ភិក្ខវេ… កណ្ណច្ឆិន្នោ , ភិក្ខវេ… នាសច្ឆិន្នោ, ភិក្ខវេ… កណ្ណនាសច្ឆិន្នោ, ភិក្ខវេ… អង្គុលិច្ឆិន្នោ, ភិក្ខវេ… អឡច្ឆិន្នោ, ភិក្ខវេ… កណ្ឌរច្ឆិន្នោ, ភិក្ខវេ… ផណហត្ថកោ, ភិក្ខវេ… ខុជ្ជោ, ភិក្ខវេ… វាមនោ, ភិក្ខវេ… គលគណ្ឌី, ភិក្ខវេ… លក្ខណាហតោ, ភិក្ខវេ… កសាហតោ, ភិក្ខវេ… លិខិតកោ, ភិក្ខវេ… សីបទិកោ, ភិក្ខវេ… បាបរោគី, ភិក្ខវេ… បរិសទូសកោ, ភិក្ខវេ… កាណោ, ភិក្ខវេ… កុណី, ភិក្ខវេ… ខញ្ជោ, ភិក្ខវេ… បក្ខហតោ, ភិក្ខវេ… ឆិន្និរិយាបថោ, ភិក្ខវេ… ជរាទុព្ពលោ, ភិក្ខវេ… អន្ធោ, ភិក្ខវេ… មូគោ, ភិក្ខវេ… ពធិរោ, ភិក្ខវេ… អន្ធមូគោ, ភិក្ខវេ… អន្ធពធិរោ, ភិក្ខវេ… មូគពធិរោ, ភិក្ខវេ… អន្ធមូគពធិរោ, ភិក្ខវេ, អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ។ អយំ វុច្ចតិ, ភិក្ខវេ, បុគ្គលោ អប្បត្តោ ឱសារណំ, តញ្ចេ សង្ឃោ ឱសារេតិ – សោសារិតោ។ ឥមេ វុច្ចន្តិ, ភិក្ខវេ, បុគ្គលា អប្បត្តា ឱសារណំ, តេ ចេ សង្ឃោ ឱសារេតិ – សោសារិតា។
Katamo ca, bhikkhave, puggalo appatto osāraṇaṃ, tañce saṅgho osāreti – sosārito? Hatthacchinno, bhikkhave, appatto osāraṇaṃ, tañce saṅgho osāreti, sosārito. Pādacchinno, bhikkhave…pe… hatthapādacchinno, bhikkhave… kaṇṇacchinno , bhikkhave… nāsacchinno, bhikkhave… kaṇṇanāsacchinno, bhikkhave… aṅgulicchinno, bhikkhave… aḷacchinno, bhikkhave… kaṇḍaracchinno, bhikkhave… phaṇahatthako, bhikkhave… khujjo, bhikkhave… vāmano, bhikkhave… galagaṇḍī, bhikkhave… lakkhaṇāhato, bhikkhave… kasāhato, bhikkhave… likhitako, bhikkhave… sīpadiko, bhikkhave… pāparogī, bhikkhave… parisadūsako, bhikkhave… kāṇo, bhikkhave… kuṇī, bhikkhave… khañjo, bhikkhave… pakkhahato, bhikkhave… chinniriyāpatho, bhikkhave… jarādubbalo, bhikkhave… andho, bhikkhave… mūgo, bhikkhave… badhiro, bhikkhave… andhamūgo, bhikkhave… andhabadhiro, bhikkhave… mūgabadhiro, bhikkhave… andhamūgabadhiro, bhikkhave, appatto osāraṇaṃ, tañce saṅgho osāreti – sosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – sosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – sosāritā.
ទ្វេនិស្សារណាទិកថា និដ្ឋិតា។
Dvenissāraṇādikathā niṭṭhitā.
វាសភគាមភាណវារោ និដ្ឋិតោ បឋមោ។
Vāsabhagāmabhāṇavāro niṭṭhito paṭhamo.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ទ្វេនិស្សារណាទិកថា • Dvenissāraṇādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទ្វេនិស្សារណាទិកថាវណ្ណនា • Dvenissāraṇādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ទ្វេនិស្សារណាទិកថាវណ្ណនា • Dvenissāraṇādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ទ្វេនិស្សរណាទិកថាវណ្ណនា • Dvenissaraṇādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២៣៩. ទ្វេនិស្សារណាទិកថា • 239. Dvenissāraṇādikathā
