| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
បារិសុទ្ធិទានកថា
Pārisuddhidānakathā
១៦៤. កាយេន វិញ្ញាបេតីតិ បារិសុទ្ធិទានំ យេន កេនចិ អង្គបច្ចង្គេន វិញ្ញាបេតិ ជានាបេតិ; វាចំ បន និច្ឆារេតុំ សក្កោន្តោ វាចាយ វិញ្ញាបេតិ; ឧភយថា សក្កោន្តោ កាយវាចាហិ។ សង្ឃេន តត្ថ គន្ត្វា ឧបោសថោ កាតព្ពោតិ សចេ ពហូ តាទិសា គិលានា ហោន្តិ, សង្ឃេន បដិបាដិយា ឋត្វា សព្ពេ ហត្ថបាសេ កាតព្ពា។ សចេ ទូរេ ទូរេ ហោន្តិ, សង្ឃោ នប្បហោតិ, តំ ទិវសំ ឧបោសថោ ន កាតព្ពោ, នត្វេវ វគ្គេន សង្ឃេន ឧបោសថោ កាតព្ពោ។
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
តត្ថេវ បក្កមតីតិ សង្ឃមជ្ឈំ អនាគន្ត្វា តតោវ កត្ថចិ គច្ឆតិ។ សាមណេរោ បដិជានាតីតិ ‘‘សាមណេរោ អហ’’ន្តិ ឯវំ បដិជានាតិ; ភូតំយេវ វា សាមណេរភាវំ អារោចេតិ, បច្ឆា វា សាមណេរភូមិយំ តិដ្ឋតីតិ អត្ថោ។ ឯស នយោ សព្ពត្ថ។
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
សង្ឃប្បត្តោ បក្កមតីតិ សព្ពន្តិមេន បរិច្ឆេទេន ឧបោសថត្ថាយ សន្និបតិតានំ ចតុន្នំ ភិក្ខូនំ ហត្ថបាសំ បត្វា បក្កមតិ។ ឯស នយោ សព្ពត្ថ។ ឯត្ថ ច ឯកេន ពហូនម្បិ អាហដា បារិសុទ្ធិ អាហដាវ ហោតិ។ សចេ បន សោ អន្តរាមគ្គេ អញ្ញំ ភិក្ខុំ ទិស្វា យេសំ អនេន បារិសុទ្ធិ គហិតា, តេសញ្ច អត្តនោ ច បារិសុទ្ធិំ ទេតិ, តស្សេវ បារិសុទ្ធិ អាគច្ឆតិ, ឥតរា បន ពិលាឡសង្ខលិកបារិសុទ្ធិ នាម ហោតិ។ សា ន អាគច្ឆតិ។
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
សុត្តោ ន អារោចេតីតិ អាគន្ត្វា សុបតិ, ‘‘អសុកេន បារិសុទ្ធិ ទិន្នា’’តិ ន អារោចេតិ។ បារិសុទ្ធិហារកស្ស អនាបត្តីតិ ឯត្ថ សចេ សញ្ចិច្ច នារោចេតិ, ទុក្កដំ អាបជ្ជតិ, បារិសុទ្ធិ បន អាហដាវ ហោតិ។ អសញ្ចិច្ច អនារោចិតត្តា បនស្ស អនាបត្តិ, ឧភិន្នម្បិ ច ឧបោសថោ កតោយេវ ហោតិ។
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ៨៧. បារិសុទ្ធិទានកថា • 87. Pārisuddhidānakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បារិសុទ្ធិទានកថាវណ្ណនា • Pārisuddhidānakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បារិសុទ្ធិទានកថាវណ្ណនា • Pārisuddhidānakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បក្ខគណនាទិឧគ្គហណានុជាននកថាទិវណ្ណនា • Pakkhagaṇanādiuggahaṇānujānanakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៨៧. បារិសុទ្ធិទានកថា • 87. Pārisuddhidānakathā
