| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
১৭. পারাযনত্থুতিগাথানিদ্দেসৰণ্ণনা
17. Pārāyanatthutigāthāniddesavaṇṇanā
৯৩. ইতো পরং সঙ্গীতিকারা দেসনং থোমেন্তা ‘‘ইদমৰোচ ভগৰা’’তিআদিমাহংসু। তত্থ ইদমৰোচাতি ইদং পারাযনং অৰোচ। পরিচারকসোল়সানন্তি বাৰরিস্স পরিচারকেন পিঙ্গিযেন সহ সোল়সানং, বুদ্ধস্স ৰা ভগৰতো পরিচারকানং সোল়সানন্তি পরিচারকসোল়সানং। তে এৰ চ ব্রাহ্মণা তত্থ সোল়সসু দিসাসু পুরতো চ পচ্ছতো চ ৰামপস্সতো চ দক্খিণপস্সতো চ ছ ছ যোজনা নিসিন্না উজুকেন দ্ৰাদসযোজনিকা অহোসি। অজ্ঝিট্ঠোতি যাচিতো।
93. Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ pārāyanaṃ avoca. Paricārakasoḷasānanti bāvarissa paricārakena piṅgiyena saha soḷasānaṃ, buddhassa vā bhagavato paricārakānaṃ soḷasānanti paricārakasoḷasānaṃ. Te eva ca brāhmaṇā tattha soḷasasu disāsu purato ca pacchato ca vāmapassato ca dakkhiṇapassato ca cha cha yojanā nisinnā ujukena dvādasayojanikā ahosi. Ajjhiṭṭhoti yācito.
৯৪-৯৭. অত্থমঞ্ঞাযাতি পাল়িঅত্থমঞ্ঞায। ধম্মমঞ্ঞাযাতি পাল়িমঞ্ঞায। পারাযনন্তি এৰং ইমস্স ধম্মপরিযাযস্স অধিৰচনং আরোপেত্ৰা তেসং ব্রাহ্মণানং নামানি কিত্তযন্তো ‘‘অজিতো…পে॰… বুদ্ধসেট্ঠমুপাগমু’’ন্তি আহংসু। তত্থ সম্পন্নচরণন্তি নিব্বানপদট্ঠানভূতেন পাতিমোক্খসীলাদিনা সম্পন্নং। ইসিন্তি মহেসিং।
94-97.Atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayanto ‘‘ajito…pe… buddhaseṭṭhamupāgamu’’nti āhaṃsu. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ.
নিদ্দেসে উপাগমিংসূতি সমীপং গমিংসু। উপসঙ্কমিংসূতি অৰিদূরট্ঠানং গমিংসু। পযিরুপাসিংসূতি সমীপে নিসীদিংসু। পরিপুচ্ছিংসূতি পরিপুচ্ছং আহরিংসু। পরিগণ্হিংসূতি তুলযিংসু। ‘‘চোদযিংসূ’’তি কেচি।
Niddese upāgamiṃsūti samīpaṃ gamiṃsu. Upasaṅkamiṃsūti avidūraṭṭhānaṃ gamiṃsu. Payirupāsiṃsūti samīpe nisīdiṃsu. Paripucchiṃsūti paripucchaṃ āhariṃsu. Parigaṇhiṃsūti tulayiṃsu. ‘‘Codayiṃsū’’ti keci.
সীলাচারনিব্বত্তীতি উত্তমসীলাচারনিব্বত্তি, মগ্গেন নিপ্ফন্নসীলন্তি অত্থো।
Sīlācāranibbattīti uttamasīlācāranibbatti, maggena nipphannasīlanti attho.
গম্ভীরেতি উত্তানভাৰপটিক্খেপৰচনং। দুদ্দসেতি গম্ভীরত্তা দুদ্দসে, দুক্খেন দট্ঠব্বে, ন সক্কা সুখেন দট্ঠুং। দুদ্দসত্তাৰ দুরনুবোধে, দুক্খেন অৰবুজ্ঝিতব্বে, ন সক্কা সুখেন অৰবুজ্ঝিতুং। সন্তেতি নিব্বুতে। পণীতেতি অতপ্পকে। ইদং দ্ৰযং লোকুত্তরমেৰ সন্ধায ৰুত্তং। অতক্কাৰচরেতি তক্কেন ন অৰচরিতব্বে ন ওগাহিতব্বে ঞাণেনেৰ অৰচরিতব্বে। নিপুণেতি সণ্হে। পণ্ডিতৰেদনীযেতি সম্মা পটিপন্নেহি পণ্ডিতেহি ৰেদিতব্বে।
Gambhīreti uttānabhāvapaṭikkhepavacanaṃ. Duddaseti gambhīrattā duddase, dukkhena daṭṭhabbe, na sakkā sukhena daṭṭhuṃ. Duddasattāva duranubodhe, dukkhena avabujjhitabbe, na sakkā sukhena avabujjhituṃ. Santeti nibbute. Paṇīteti atappake. Idaṃ dvayaṃ lokuttarameva sandhāya vuttaṃ. Atakkāvacareti takkena na avacaritabbe na ogāhitabbe ñāṇeneva avacaritabbe. Nipuṇeti saṇhe. Paṇḍitavedanīyeti sammā paṭipannehi paṇḍitehi veditabbe.
৯৮. তোসেসীতি তুট্ঠিং আপাদেসি। ৰিতোসেসীতি ৰিৰিধা তেসং সোমনস্সং উপ্পাদেসি। পসাদেসীতি তেসং চিত্তপ্পসাদং অকাসি । আরাধেসীতি আরাধযি সিদ্ধিং পাপেসি। অত্তমনে অকাসীতি সোমনস্সৰসেন সকমনে অকাসি।
98.Tosesīti tuṭṭhiṃ āpādesi. Vitosesīti vividhā tesaṃ somanassaṃ uppādesi. Pasādesīti tesaṃ cittappasādaṃ akāsi . Ārādhesīti ārādhayi siddhiṃ pāpesi. Attamane akāsīti somanassavasena sakamane akāsi.
৯৯. ততো পরং ব্রহ্মচরিযমচরিংসূতি মগ্গব্রহ্মচরিযং অচরিংসু।
99. Tato paraṃ brahmacariyamacariṃsūti maggabrahmacariyaṃ acariṃsu.
১০১. তস্মা পারাযনন্তি তস্স পারভূতস্স নিব্বানস্স আযতনন্তি ৰুত্তং হোতি।
101.Tasmā pārāyananti tassa pārabhūtassa nibbānassa āyatananti vuttaṃ hoti.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
পারাযনত্থুতিগাথানিদ্দেসৰণ্ণনা নিট্ঠিতা।
Pārāyanatthutigāthāniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
১৭. পারাযনত্থুতিগাথা • 17. Pārāyanatthutigāthā
১৭. পারাযনত্থুতিগাথানিদ্দেসো • 17. Pārāyanatthutigāthāniddeso
