| Library / Tipiṭaka / তিপিটক • Tipiṭaka / চূল়নিদ্দেসপাল়ি • Cūḷaniddesapāḷi |
১৭. পারাযনত্থুতিগাথা
17. Pārāyanatthutigāthā
ইদমৰোচ ভগৰা মগধেসু ৰিহরন্তো পাসাণকে চেতিযে, পরিচারকসোল়সানং 1 ব্রাহ্মণানং অজ্ঝিট্ঠো পুট্ঠো পুট্ঠো পঞ্হং 2 ব্যাকাসি। একমেকস্স চেপি পঞ্হস্স অত্থমঞ্ঞায ধম্মমঞ্ঞায ধম্মানুধম্মং পটিপজ্জেয্য, গচ্ছেয্যেৰ জরামরণস্স পারং। ‘‘পারঙ্গমনীযা ইমে ধম্মা’’তি – তস্মা ইমস্স ধম্মপরিযাযস্স পারাযনন্তেৰ 3 অধিৰচনং।
Idamavoca bhagavā magadhesu viharanto pāsāṇake cetiye, paricārakasoḷasānaṃ 4 brāhmaṇānaṃ ajjhiṭṭho puṭṭho puṭṭho pañhaṃ 5 byākāsi. Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya, gaccheyyeva jarāmaraṇassa pāraṃ. ‘‘Pāraṅgamanīyā ime dhammā’’ti – tasmā imassa dhammapariyāyassa pārāyananteva 6 adhivacanaṃ.
১৪৯.
149.
অজিতো তিস্সমেত্তেয্যো, পুণ্ণকো অথ মেত্তগূ।
Ajito tissametteyyo, puṇṇako atha mettagū;
ধোতকো উপসীৰো চ, নন্দো চ অথ হেমকো॥
Dhotako upasīvo ca, nando ca atha hemako.
১৫০.
150.
তোদেয্যকপ্পা দুভযো, জতুকণ্ণী চ পণ্ডিতো।
Todeyyakappā dubhayo, jatukaṇṇī ca paṇḍito;
ভদ্রাৰুধো উদযো চ, পোসালো চাপি ব্রাহ্মণো।
Bhadrāvudho udayo ca, posālo cāpi brāhmaṇo;
মোঘরাজা চ মেধাৰী, পিঙ্গিযো চ মহাইসি॥
Mogharājā ca medhāvī, piṅgiyo ca mahāisi.
১৫১.
151.
এতে বুদ্ধং উপাগচ্ছুং, সম্পন্নচরণং ইসিং।
Ete buddhaṃ upāgacchuṃ, sampannacaraṇaṃ isiṃ;
পুচ্ছন্তা নিপুণে পঞ্হে, বুদ্ধসেট্ঠং উপাগমুং॥
Pucchantā nipuṇe pañhe, buddhaseṭṭhaṃ upāgamuṃ.
১৫২.
152.
তেসং বুদ্ধো পব্যাকাসি, পঞ্হে পুট্ঠো যথাতথং।
Tesaṃ buddho pabyākāsi, pañhe puṭṭho yathātathaṃ;
পঞ্হানং ৰেয্যাকরণেন, তোসেসি ব্রাহ্মণে মুনি॥
Pañhānaṃ veyyākaraṇena, tosesi brāhmaṇe muni.
১৫৩.
153.
তে তোসিতা চক্খুমতা, বুদ্ধেনাদিচ্চবন্ধুনা।
Te tositā cakkhumatā, buddhenādiccabandhunā;
ব্রহ্মচরিযমচরিংসু, ৰরপঞ্ঞস্স সন্তিকে॥
Brahmacariyamacariṃsu, varapaññassa santike.
১৫৪.
154.
একমেকস্স পঞ্হস্স, যথা বুদ্ধেন দেসিতং।
Ekamekassa pañhassa, yathā buddhena desitaṃ;
তথা যো পটিপজ্জেয্য, গচ্ছে পারং অপারতো॥
Tathā yo paṭipajjeyya, gacche pāraṃ apārato.
১৫৫.
155.
অপারা পারং গচ্ছেয্য, ভাৰেন্তো মগ্গমুত্তমং।
Apārā pāraṃ gaccheyya, bhāvento maggamuttamaṃ;
মগ্গো সো পারং গমনায, তস্মা পারাযনং ইতি॥
Maggo so pāraṃ gamanāya, tasmā pārāyanaṃ iti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / চূল়নিদ্দেস-অট্ঠকথা • Cūḷaniddesa-aṭṭhakathā / ১৭. পারাযনত্থুতিগাথানিদ্দেসৰণ্ণনা • 17. Pārāyanatthutigāthāniddesavaṇṇanā
