| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. နာမရူပသုတ္တံ
8. Nāmarūpasuttaṃ
၅၈. သာဝတ္ထိယံ ဝိဟရတိ။ပေ.။ ‘‘သံယောဇနိယေသု, ဘိက္ခဝေ, ဓမ္မေသု အသ္သာဒာနုပသ္သိနော ဝိဟရတော နာမရူပသ္သ အဝက္ကန္တိ ဟောတိ။ နာမရူပပစ္စယာ သဠာယတနံ။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ သမုဒယော ဟောတိ’’။
58. Sāvatthiyaṃ viharati…pe… ‘‘saṃyojaniyesu, bhikkhave, dhammesu assādānupassino viharato nāmarūpassa avakkanti hoti. Nāmarūpapaccayā saḷāyatanaṃ…pe… evametassa kevalassa dukkhakkhandhassa samudayo hoti’’.
‘‘သေယ္ယထာပိ, ဘိက္ခဝေ, မဟာရုက္ခော။ တသ္သ ယာနိ စေဝ မူလာနိ အဓောဂမာနိ, ယာနိ စ တိရိယင္ဂမာနိ, သဗ္ဗာနိ တာနိ ဥဒ္ဓံ ဩဇံ အဘိဟရန္တိ။ ဧဝဉ္ဟိ သော, ဘိက္ခဝေ, မဟာရုက္ခော တဒာဟာရော တဒုပာဒာနော စိရံ ဒီဃမဒ္ဓာနံ တိဋ္ဌေယ္ယ။ ဧဝမေဝ ခော, ဘိက္ခဝေ, သံယောဇနိယေသု ဓမ္မေသု အသ္သာဒာနုပသ္သိနော ဝိဟရတော နာမရူပသ္သ အဝက္ကန္တိ ဟောတိ။ပေ.။။
‘‘Seyyathāpi, bhikkhave, mahārukkho. Tassa yāni ceva mūlāni adhogamāni, yāni ca tiriyaṅgamāni, sabbāni tāni uddhaṃ ojaṃ abhiharanti. Evañhi so, bhikkhave, mahārukkho tadāhāro tadupādāno ciraṃ dīghamaddhānaṃ tiṭṭheyya. Evameva kho, bhikkhave, saṃyojaniyesu dhammesu assādānupassino viharato nāmarūpassa avakkanti hoti…pe….
‘‘သံယောဇနိယေသု, ဘိက္ခဝေ, ဓမ္မေသု အာဒီနဝာနုပသ္သိနော ဝိဟရတော နာမရူပသ္သ အဝက္ကန္တိ န ဟောတိ။ နာမရူပနိရောဓာ သဠာယတနနိရောဓော။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတိ။
‘‘Saṃyojaniyesu, bhikkhave, dhammesu ādīnavānupassino viharato nāmarūpassa avakkanti na hoti. Nāmarūpanirodhā saḷāyatananirodho…pe… evametassa kevalassa dukkhakkhandhassa nirodho hoti.
‘‘သေယ္ယထာပိ , ဘိက္ခဝေ, မဟာရုက္ခော။ အထ ပုရိသော အာဂစ္ဆေယ္ယ ကုဒ္ဒာလပိဋကံ အာဒာယ။ပေ.။ အာယတိံ အနုပ္ပာဒဓမ္မော။ ဧဝမေဝ ခော, ဘိက္ခဝေ, သံယောဇနိယေသု ဓမ္မေသု အာဒီနဝာနုပသ္သိနော ဝိဟရတော နာမရူပသ္သ အဝက္ကန္တိ န ဟောတိ။ နာမရူပနိရောဓာ သဠာယတနနိရောဓော။ပေ.။ ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတီ’’တိ။ အဋ္ဌမံ။
‘‘Seyyathāpi , bhikkhave, mahārukkho. Atha puriso āgaccheyya kuddālapiṭakaṃ ādāya…pe… āyatiṃ anuppādadhammo. Evameva kho, bhikkhave, saṃyojaniyesu dhammesu ādīnavānupassino viharato nāmarūpassa avakkanti na hoti. Nāmarūpanirodhā saḷāyatananirodho…pe… evametassa kevalassa dukkhakkhandhassa nirodho hotī’’ti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. တရုဏရုက္ခသုတ္တဝဏ္ဏနာ • 7. Taruṇarukkhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. တရုဏရုက္ခသုတ္တဝဏ္ဏနာ • 7. Taruṇarukkhasuttavaṇṇanā
