| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៧. មហានាមសិក្ខាបទវណ្ណនា
7. Mahānāmasikkhāpadavaṇṇanā
៣០៣. សត្តមសិក្ខាបទេ – មហានាមោ នាម ភគវតោ ចូឡបិតុបុត្តោ មាសមត្តេន មហល្លកតរោ ទ្វីសុ ផលេសុ បតិដ្ឋិតោ អរិយសាវកោ។ ភេសជ្ជំ ឧស្សន្នំ ហោតីតិ វជតោ អាហរិត្វា ឋបិតសប្បិ ពហុ ហោតិ។
303. Sattamasikkhāpade – mahānāmo nāma bhagavato cūḷapituputto māsamattena mahallakataro dvīsu phalesu patiṭṭhito ariyasāvako. Bhesajjaṃ ussannaṃ hotīti vajato āharitvā ṭhapitasappi bahu hoti.
៣០៦. សាទិតព្ពាតិ តស្មិំ សមយេ រោគោ នត្ថីតិ ន បដិក្ខិបិតព្ពា; រោគេ សតិ វិញ្ញាបេស្សាមីតិ អធិវាសេតព្ពា។ ឯត្តកេហិ ភេសជ្ជេហិ បវារេមីតិ នាមវសេន សប្បិតេលាទីសុ ទ្វីហិ តីហិ វា បរិមាណវសេន បត្ថេន នាឡិយា អាឡ្ហកេនាតិ វា។អញ្ញំ ភេសជ្ជំ វិញ្ញាបេតីតិ សប្បិនា បវារិតោ តេលំ វិញ្ញាបេតិ, អាឡ្ហកេន បវារិតោ ទោណំ។ ន ភេសជ្ជេន ករណីយេនាតិ មិស្សកភត្តេនបិ ចេ យាបេតុំ សក្កោតិ, ន ភេសជ្ជករណីយំ នាម ហោតិ។
306.Sāditabbāti tasmiṃ samaye rogo natthīti na paṭikkhipitabbā; roge sati viññāpessāmīti adhivāsetabbā. Ettakehi bhesajjehi pavāremīti nāmavasena sappitelādīsu dvīhi tīhi vā parimāṇavasena patthena nāḷiyā āḷhakenāti vā.Aññaṃ bhesajjaṃ viññāpetīti sappinā pavārito telaṃ viññāpeti, āḷhakena pavārito doṇaṃ. Na bhesajjena karaṇīyenāti missakabhattenapi ce yāpetuṃ sakkoti, na bhesajjakaraṇīyaṃ nāma hoti.
៣១០. បវារិតានន្តិ យេ អត្តនោ បុគ្គលិកាយ បវារណាយ បវារិតា; តេសំ បវារិតានុរូបេន វិញ្ញត្តិយា អនាបត្តិ។ សង្ឃវសេន បវារិតេសុ បន បមាណំ សល្លក្ខេតព្ពមេវាតិ។ សេសំ ឧត្តានមេវ។
310.Pavāritānanti ye attano puggalikāya pavāraṇāya pavāritā; tesaṃ pavāritānurūpena viññattiyā anāpatti. Saṅghavasena pavāritesu pana pamāṇaṃ sallakkhetabbamevāti. Sesaṃ uttānameva.
ឆសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
មហានាមសិក្ខាបទំ សត្តមំ។
Mahānāmasikkhāpadaṃ sattamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. អចេលកវគ្គោ • 5. Acelakavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៧. មហានាមសិក្ខាបទវណ្ណនា • 7. Mahānāmasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៧. មហានាមសិក្ខាបទវណ្ណនា • 7. Mahānāmasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៧. មហានាមសិក្ខាបទវណ្ណនា • 7. Mahānāmasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧. មហានាមសិក្ខាបទំ • 7. Mahānāmasikkhāpadaṃ
