| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៨. ឧយ្យុត្តសេនាសិក្ខាបទវណ្ណនា
8. Uyyuttasenāsikkhāpadavaṇṇanā
៣១១. អដ្ឋមេ – អព្ភុយ្យាតោតិ អភិឧយ្យាតោ; បរសេនំ អភិមុខោ គមិស្សាមីតិ នគរតោ និគ្គតោតិ អត្ថោ។ ឧយ្យុត្តន្តិ កតឧយ្យោគំ; គាមតោ និក្ខន្តន្តិ អត្ថោ។
311. Aṭṭhame – abbhuyyātoti abhiuyyāto; parasenaṃ abhimukho gamissāmīti nagarato niggatoti attho. Uyyuttanti katauyyogaṃ; gāmato nikkhantanti attho.
៣១៤. ទ្វាទសបុរិសោ ហត្ថីតិ ចត្តារោ អារោហកា ឯកេកបាទរក្ខកា ទ្វេ ទ្វេតិ ឯវំ ទ្វាទសបុរិសោ ហោតិ។ តិបុរិសោ អស្សោតិ ឯកោ អារោហកោ ទ្វេ បាទរក្ខកាតិ ឯវំ តិបុរិសោ ហោតិ។ ចតុបុរិសោ រថោតិ ឯកោ សារថិ ឯកោ យោធោ ទ្វេ អាណិរក្ខកាតិ ឯវំ ចតុបុរិសោ ហោតិ។ ចត្តារោ បុរិសា សរហត្ថាតិ អាវុធហត្ថា ចត្តារោ បុរិសាតិ អយំ បច្ឆិមកោដិយា ចតុរង្គសមន្នាគតា សេនា នាម។ ឦទិសំ សេនំ ទស្សនាយ គច្ឆតោ បទេ បទេ ទុក្កដំ។ ទស្សនូបចារំ វិជហិត្វាតិ កេនចិ អន្តរិតា វា និន្នំ ឱរុឡ្ហា វា ន ទិស្សតិ; ឥធ ឋត្វា ន សក្កា ទដ្ឋុន្តិ អញ្ញំ ឋានំ គន្ត្វា បស្សតោ បយោគេ បយោគេ បាចិត្តិយន្តិ អត្ថោ។
314.Dvādasapuriso hatthīti cattāro ārohakā ekekapādarakkhakā dve dveti evaṃ dvādasapuriso hoti. Tipuriso assoti eko ārohako dve pādarakkhakāti evaṃ tipuriso hoti. Catupuriso rathoti eko sārathi eko yodho dve āṇirakkhakāti evaṃ catupuriso hoti. Cattāro purisā sarahatthāti āvudhahatthā cattāro purisāti ayaṃ pacchimakoṭiyā caturaṅgasamannāgatā senā nāma. Īdisaṃ senaṃ dassanāya gacchato pade pade dukkaṭaṃ. Dassanūpacāraṃ vijahitvāti kenaci antaritā vā ninnaṃ oruḷhā vā na dissati; idha ṭhatvā na sakkā daṭṭhunti aññaṃ ṭhānaṃ gantvā passato payoge payoge pācittiyanti attho.
៣១៥. ឯកមេកន្តិ ហត្ថិអាទីសុ ចតូសុ អង្គេសុ ឯកមេកំ; អន្តមសោ ឯកបុរិសារុឡ្ហកហត្ថិម្បិ ឯកម្បិ សរហត្ថំ បុរិសំ។ អនុយ្យុត្តា នាម រាជា ឧយ្យានំ វា នទិំ វា គច្ឆតិ; ឯវំ អនុយ្យុត្តា ហោតិ។
315.Ekamekanti hatthiādīsu catūsu aṅgesu ekamekaṃ; antamaso ekapurisāruḷhakahatthimpi ekampi sarahatthaṃ purisaṃ. Anuyyuttā nāma rājā uyyānaṃ vā nadiṃ vā gacchati; evaṃ anuyyuttā hoti.
៣១៦. អាបទាសូតិ ជីវិតព្រហ្មចរិយន្តរាយេសុ សតិ ឯត្ថ គតោ មុញ្ចិស្សាមីតិ គច្ឆតោ អនាបត្តិ។ សេសមេត្ថ ឧត្តានមេវ។ ឯឡកលោមសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, លោកវជ្ជំ, កាយកម្មំ, អកុសលចិត្តំ, តិវេទនន្តិ។
316.Āpadāsūti jīvitabrahmacariyantarāyesu sati ettha gato muñcissāmīti gacchato anāpatti. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
ឧយ្យុត្តសេនាសិក្ខាបទំ អដ្ឋមំ។
Uyyuttasenāsikkhāpadaṃ aṭṭhamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. អចេលកវគ្គោ • 5. Acelakavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៨. ឧយ្យុត្តសេនាសិក្ខាបទវណ្ណនា • 8. Uyyuttasenāsikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៨. ឧយ្យុត្តសេនាសិក្ខាបទវណ្ណនា • 8. Uyyuttasenāsikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៨. ឧយ្យុត្តសេនាសិក្ខាបទវណ្ណនា • 8. Uyyuttasenāsikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៨. ឧយ្យុត្តសេនាសិក្ខាបទំ • 8. Uyyuttasenāsikkhāpadaṃ
