| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
៩. ចម្បេយ្យក្ខន្ធកំ
9. Campeyyakkhandhakaṃ
កស្សបគោត្តភិក្ខុវត្ថុកថា
Kassapagottabhikkhuvatthukathā
៣៨០. ចម្បេយ្យក្ខន្ធកេ – គគ្គរាយ បោក្ខរណិយា តីរេតិ គគ្គរានាមិកាយ ឥត្ថិយា ការិតបោក្ខរណិយា តីរេ។ តន្តិពទ្ធោតិ តស្មិំ អាវាសេ កត្តព្ពតាតន្តិបដិពទ្ធោ។ ឧស្សុក្កម្បិ អកាសិ យាគុយាតិអាទីសុ មនុស្សេហិ អាគន្តុកេសុ អាគតេសុ អាចិក្ខេយ្យាថាតិ វុត្តដ្ឋានេយេវ ឧស្សុក្កំ កាតុំ វដ្ដតិ; ន អវុត្តដ្ឋានេ។ គច្ឆ ត្វំ ភិក្ខូតិ សត្ថា តស្ស ភិក្ខុនោ តត្ថេវ សេនាសនំ សប្បាយន្តិ អទ្ទស, តេនេវមាហ។
380. Campeyyakkhandhake – gaggarāya pokkharaṇiyā tīreti gaggarānāmikāya itthiyā kāritapokkharaṇiyā tīre. Tantibaddhoti tasmiṃ āvāse kattabbatātantipaṭibaddho. Ussukkampi akāsi yāguyātiādīsu manussehi āgantukesu āgatesu ācikkheyyāthāti vuttaṭṭhāneyeva ussukkaṃ kātuṃ vaṭṭati; na avuttaṭṭhāne. Gaccha tvaṃ bhikkhūti satthā tassa bhikkhuno tattheva senāsanaṃ sappāyanti addasa, tenevamāha.
៣៨២. អធម្មេន វគ្គកម្មំ ករោន្តីតិអាទីនំ បរតោ បាឡិយំយេវ នានាករណំ អាគមិស្សតិ។
382.Adhammena vaggakammaṃ karontītiādīnaṃ parato pāḷiyaṃyeva nānākaraṇaṃ āgamissati.
៣៨៥. អញ្ញត្រាបិ ធម្មា កម្មំ ករោន្តីតិ អញ្ញត្រាបិ ធម្មំ កម្មំ ករោន្តិ, អយមេវ វា បាឋោ។ ភូតេន វត្ថុនា កតំ ធម្មេន កតំ នាម ហោតិ, តថា ន ករោន្តីតិ អត្ថោ។ អញ្ញត្រាបិ វិនយា កម្មំ, អញ្ញត្រាបិ សត្ថុសាសនា កម្មន្តិ ឯតេសុបិ ឯសេវ នយោ។ ឯត្ថ បន វិនយោតិ ចោទនា ច សារណា ច។ សត្ថុសាសនន្តិ ញត្តិសម្បទា អនុស្សាវនសម្បទា ច; តាហិ វិនា កម្មំ ករោន្តីតិ អត្ថោ។ បដិកុដ្ឋកតន្តិ បដិកុដ្ឋញ្ចេវ កតញ្ច; យំ អញ្ញេសុ បដិក្កោសន្តេសុ កតំ តំ បដិកុដ្ឋញ្ចេវ ហោតិ កតញ្ច; តាទិសម្បិ កម្មំ ករោន្តីតិ អត្ថោ។
385.Aññatrāpi dhammā kammaṃ karontīti aññatrāpi dhammaṃ kammaṃ karonti, ayameva vā pāṭho. Bhūtena vatthunā kataṃ dhammena kataṃ nāma hoti, tathā na karontīti attho. Aññatrāpi vinayā kammaṃ, aññatrāpi satthusāsanā kammanti etesupi eseva nayo. Ettha pana vinayoti codanā ca sāraṇā ca. Satthusāsananti ñattisampadā anussāvanasampadā ca; tāhi vinā kammaṃ karontīti attho. Paṭikuṭṭhakatanti paṭikuṭṭhañceva katañca; yaṃ aññesu paṭikkosantesu kataṃ taṃ paṭikuṭṭhañceva hoti katañca; tādisampi kammaṃ karontīti attho.
៣៨៧. ឆយិមានិ ភិក្ខវេ កម្មានិ អធម្មកម្មន្តិអាទីសុ បន ‘‘ធម្មោ’’តិ បាឡិយា អធិវចនំ។ តស្មា យំ យថាវុត្តាយ បាឡិយា ន ករិយតិ, តំ អធម្មកម្មន្តិ វេទិតព្ពំ។ អយមេត្ថ សង្ខេបោ, វិត្ថារោ បន បាឡិយំយេវ អាគតោ។ សោ ច ខោ ញត្តិទុតិយញត្តិចតុត្ថកម្មានំយេវ វសេន។ យស្មា បន ញត្តិកម្មេ ញត្តិទុតិយញត្តិចតុត្ថេសុ វិយ ហាបនំ វា អញ្ញថា ករណំ វា នត្ថិ, អបលោកនកម្មញ្ច សាវេត្វាវ ករិយតិ, តស្មា តានិ បាឡិយំ ន ទស្សិតានិ, តេសំ សព្ពេសម្បិ កម្មានំ វិនិច្ឆយំ បរតោ វណ្ណយិស្សាម។
387.Chayimāni bhikkhave kammāni adhammakammantiādīsu pana ‘‘dhammo’’ti pāḷiyā adhivacanaṃ. Tasmā yaṃ yathāvuttāya pāḷiyā na kariyati, taṃ adhammakammanti veditabbaṃ. Ayamettha saṅkhepo, vitthāro pana pāḷiyaṃyeva āgato. So ca kho ñattidutiyañatticatutthakammānaṃyeva vasena. Yasmā pana ñattikamme ñattidutiyañatticatutthesu viya hāpanaṃ vā aññathā karaṇaṃ vā natthi, apalokanakammañca sāvetvāva kariyati, tasmā tāni pāḷiyaṃ na dassitāni, tesaṃ sabbesampi kammānaṃ vinicchayaṃ parato vaṇṇayissāma.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
២៣៤. កស្សបគោត្តភិក្ខុវត្ថុ • 234. Kassapagottabhikkhuvatthu
២៣៥. អធម្មេន វគ្គាទិកម្មកថា • 235. Adhammena vaggādikammakathā
២៣៦. ញត្តិវិបន្នកម្មាទិកថា • 236. Ñattivipannakammādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā
កស្សបគោត្តភិក្ខុវត្ថុកថាវណ្ណនា • Kassapagottabhikkhuvatthukathāvaṇṇanā
ញត្តិវិបន្នកម្មាទិកថាវណ្ណនា • Ñattivipannakammādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / កស្សបគោត្តភិក្ខុវត្ថុកថាទិវណ្ណនា • Kassapagottabhikkhuvatthukathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi
២៣៤. កស្សបគោត្តភិក្ខុវត្ថុកថា • 234. Kassapagottabhikkhuvatthukathā
២៣៦. ញត្តិវិបន្នកម្មាទិកថា • 236. Ñattivipannakammādikathā
