| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ဇန္တုသုတ္တဝဏ္ဏနာ
5. Jantusuttavaṇṇanā
၁၀၆. ပဉ္စမေ ကောသလေသု ဝိဟရန္တီတိ ဘဂဝတော သန္တိကေ ကမ္မဋ္ဌာနံ ဂဟေတ္ဝာ တတ္ထ ဂန္တ္ဝာ ဝိဟရန္တိ။ ဥဒ္ဓတာတိ အကပ္ပိယေ ကပ္ပိယသညိတာယ စ ကပ္ပိယေ အကပ္ပိယသညိတာယ စ အနဝဇ္ဇေ သာဝဇ္ဇသညိတာယ စ သာဝဇ္ဇေ အနဝဇ္ဇသညိတာယ စ ဥဒ္ဓစ္စပကတိကာ ဟုတ္ဝာ။ ဥန္နဠာတိ ဥဂ္ဂတနဠာ, ဥဋ္ဌိတတုစ္ဆမာနာတိ ဝုတ္တံ ဟောတိ။ စပလာတိ ပတ္တစီဝရမဏ္ဍနာဒိနာ စာပလ္လေန ယုတ္တာ။ မုခရာတိ မုခခရာ, ခရဝစနာတိ ဝုတ္တံ ဟောတိ။ ဝိကိဏ္ဏဝာစာတိ အသံယတဝစနာ, ဒိဝသမ္ပိ နိရတ္ထကဝစနပလာပိနော။ မုဋ္ဌသ္သတိနောတိ နဋ္ဌသ္သတိနော သတိဝိရဟိတာ, ဣဓ ကတံ ဧတ္ထ ပမုသ္သန္တိ။ အသမ္ပဇာနာတိ နိပ္ပညာ။ အသမာဟိတာတိ အပ္ပနာဥပစာရသမာဓိရဟိတာ, စဏ္ဍသောတေ ဗဒ္ဓနာဝာသဒိသာ။ ဝိဗ္ဘန္တစိတ္တာတိ အနဝဋ္ဌိတစိတ္တာ, ပန္ထာရုဠ္ဟဗာလမိဂသဒိသာ။ ပာကတိန္ဒ္ရိယာတိ သံဝရာဘာဝေန ဂိဟိကာလေ ဝိယ ဝိဝဋဣန္ဒ္ရိယာ။
106. Pañcame kosalesu viharantīti bhagavato santike kammaṭṭhānaṃ gahetvā tattha gantvā viharanti. Uddhatāti akappiye kappiyasaññitāya ca kappiye akappiyasaññitāya ca anavajje sāvajjasaññitāya ca sāvajje anavajjasaññitāya ca uddhaccapakatikā hutvā. Unnaḷāti uggatanaḷā, uṭṭhitatucchamānāti vuttaṃ hoti. Capalāti pattacīvaramaṇḍanādinā cāpallena yuttā. Mukharāti mukhakharā, kharavacanāti vuttaṃ hoti. Vikiṇṇavācāti asaṃyatavacanā, divasampi niratthakavacanapalāpino. Muṭṭhassatinoti naṭṭhassatino sativirahitā, idha kataṃ ettha pamussanti. Asampajānāti nippaññā. Asamāhitāti appanāupacārasamādhirahitā, caṇḍasote baddhanāvāsadisā. Vibbhantacittāti anavaṭṭhitacittā, panthāruḷhabālamigasadisā. Pākatindriyāti saṃvarābhāvena gihikāle viya vivaṭaindriyā.
ဇန္တူတိ ဧဝံနာမကော ဒေဝပုတ္တော။ တဒဟုပောသထေတိ တသ္မိံ အဟု ဥပောသထေ, ဥပောသထဒိဝသေတိ အတ္ထော။ ပန္နရသေတိ စာတုဒ္ဒသိကာဒိပဋိက္ခေပော။ ဥပသင္ကမီတိ စောဒနတ္ထာယ ဥပဂတော။ သော ကိရ စိန္တေသိ – ‘‘ဣမေ ဘိက္ခူ သတ္ထု သန္တိကေ ကမ္မဋ္ဌာနံ ဂဟေတ္ဝာ နိက္ခန္တာ, ဣဒာနိ ပမတ္တာ ဝိဟရန္တိ, န ခော ပနေတေ ပာဋိယေက္ကံ နိသိန္နဋ္ဌာနေ စောဒိယမာနာ ကထံ ဂဏ္ဟိသ္သန္တိ, သမာဂမနကာလေ စောဒိသ္သာမီ’’တိ ဥပောသထဒိဝသေ တေသံ သန္နိပတိတဘာဝံ ဉတ္ဝာ ဥပသင္ကမိ။ ဂာထာဟိ အဇ္ဈဘာသီတိ သဗ္ဗေသံ မဇ္ဈေ ဌတ္ဝာ ဂာထာ အဘာသိ။
Jantūti evaṃnāmako devaputto. Tadahuposatheti tasmiṃ ahu uposathe, uposathadivaseti attho. Pannaraseti cātuddasikādipaṭikkhepo. Upasaṅkamīti codanatthāya upagato. So kira cintesi – ‘‘ime bhikkhū satthu santike kammaṭṭhānaṃ gahetvā nikkhantā, idāni pamattā viharanti, na kho panete pāṭiyekkaṃ nisinnaṭṭhāne codiyamānā kathaṃ gaṇhissanti, samāgamanakāle codissāmī’’ti uposathadivase tesaṃ sannipatitabhāvaṃ ñatvā upasaṅkami. Gāthāhi ajjhabhāsīti sabbesaṃ majjhe ṭhatvā gāthā abhāsi.
တတ္ထ ယသ္မာ ဂုဏကထာယ သဒ္ဓိံ နိဂ္ဂုဏသ္သ အဂုဏော ပာကဋော ဟောတိ, တသ္မာ ဂုဏံ တာဝ ကထေန္တော သုခဇီဝိနော ပုရေ အာသုန္တိအာဒိမာဟ။ တတ္ထ သုခဇီဝိနော ပုရေ အာသုန္တိ ပုဗ္ဗေ ဘိက္ခူ သုပ္ပောသာ သုဘရာ အဟေသုံ, ဥစ္စနီစကုလေသု သပဒာနံ စရိတ္ဝာ လဒ္ဓေန မိသ္သကပိဏ္ဍေန ယာပေသုန္တိ အဓိပ္ပာယေန ဧဝမာဟ။ အနိစ္ဆာတိ နိတ္တဏ္ဟာ ဟုတ္ဝာ။
Tattha yasmā guṇakathāya saddhiṃ nigguṇassa aguṇo pākaṭo hoti, tasmā guṇaṃ tāva kathento sukhajīvino pure āsuntiādimāha. Tattha sukhajīvino pure āsunti pubbe bhikkhū supposā subharā ahesuṃ, uccanīcakulesu sapadānaṃ caritvā laddhena missakapiṇḍena yāpesunti adhippāyena evamāha. Anicchāti nittaṇhā hutvā.
ဧဝံ ပောရာဏကဘိက္ခူနံ ဝဏ္ဏံ ကထေတ္ဝာ ဣဒာနိ တေသံ အဝဏ္ဏံ ကထေန္တော ဒုပ္ပောသန္တိအာဒိမာဟ။ တတ္ထ ဂာမေ ဂာမဏိကာ ဝိယာတိ ယထာ ဂာမေ ဂာမကုဋာ နာနပ္ပကာရေန ဇနံ ပီဠေတ္ဝာ ခီရဒဓိတဏ္ဍုလာဒီနိ အာဟရာပေတ္ဝာ ဘုဉ္ဇန္တိ, ဧဝံ တုမ္ဟေပိ အနေသနာယ ဌိတာ တုမ္ဟာကံ ဇီဝိကံ ကပ္ပေထာတိ အဓိပ္ပာယေန ဝဒတိ။ နိပဇ္ဇန္တီတိ ဥဒ္ဒေသပရိပုစ္ဆာမနသိကာရေဟိ အနတ္ထိကာ ဟုတ္ဝာ သယနမ္ဟိ ဟတ္ထပာဒေ ဝိသ္သဇ္ဇေတ္ဝာ နိပဇ္ဇန္တိ။ ပရာဂာရေသူတိ ပရဂေဟေသု, ကုလသုဏ္ဟာဒီသူတိ အတ္ထော။ မုစ္ဆိတာတိ ကိလေသမုစ္ဆာယ မုစ္ဆိတာ။
Evaṃ porāṇakabhikkhūnaṃ vaṇṇaṃ kathetvā idāni tesaṃ avaṇṇaṃ kathento dupposantiādimāha. Tattha gāme gāmaṇikā viyāti yathā gāme gāmakuṭā nānappakārena janaṃ pīḷetvā khīradadhitaṇḍulādīni āharāpetvā bhuñjanti, evaṃ tumhepi anesanāya ṭhitā tumhākaṃ jīvikaṃ kappethāti adhippāyena vadati. Nipajjantīti uddesaparipucchāmanasikārehi anatthikā hutvā sayanamhi hatthapāde vissajjetvā nipajjanti. Parāgāresūti paragehesu, kulasuṇhādīsūti attho. Mucchitāti kilesamucchāya mucchitā.
ဧကစ္စေတိ ဝတ္တဗ္ဗယုတ္တကေယေဝ။ အပဝိဒ္ဓာတိ ဆဍ္ဍိတကာ။ အနာထာတိ အပတိဋ္ဌာ။ ပေတာတိ သုသာနေ ဆဍ္ဍိတာ ကာလင္ကတမနုသ္သာ။ ယထာ ဟိ သုသာနေ ဆဍ္ဍိတာ နာနာသကုဏာဒီဟိ ခဇ္ဇန္တိ, ဉာတကာပိ နေသံ နာထကိစ္စံ န ကရောန္တိ, န ရက္ခန္တိ, န ဂောပယန္တိ, ဧဝမေဝံ ဧဝရူပာပိ အာစရိယုပဇ္ဈာယာဒီနံ သန္တိကာ ဩဝာဒာနုသာသနိံ န လဘန္တီတိ အပဝိဒ္ဓာ အနာထာ, ယထာ ပေတာ, တထေဝ ဟောန္တိ။ ပဉ္စမံ။
Ekacceti vattabbayuttakeyeva. Apaviddhāti chaḍḍitakā. Anāthāti apatiṭṭhā. Petāti susāne chaḍḍitā kālaṅkatamanussā. Yathā hi susāne chaḍḍitā nānāsakuṇādīhi khajjanti, ñātakāpi nesaṃ nāthakiccaṃ na karonti, na rakkhanti, na gopayanti, evamevaṃ evarūpāpi ācariyupajjhāyādīnaṃ santikā ovādānusāsaniṃ na labhantīti apaviddhā anāthā, yathā petā, tatheva honti. Pañcamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဇန္တုသုတ္တံ • 5. Jantusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဇန္တုသုတ္တဝဏ္ဏနာ • 5. Jantusuttavaṇṇanā
