| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၆. ရောဟိတသ္သသုတ္တဝဏ္ဏနာ
6. Rohitassasuttavaṇṇanā
၁၀၇. ဆဋ္ဌေ ယတ္ထာတိ စက္ကဝာဠလောကသ္သ ဧကောကာသေ ဘုမ္မံ။ န စဝတိ န ဥပပဇ္ဇတီတိ ဣဒံ အပရာပရံ စုတိပဋိသန္ဓိဝသေန ဂဟိတံ။ ဂမနေနာတိ ပဒဂမနေန။ နာဟံ တံ လောကသ္သ အန္တန္တိ သတ္ထာ သင္ခာရလောကသ္သ အန္တံ သန္ဓာယ ဝဒတိ။ ဉာတေယ္ယန္တိအာဒီသု ဉာတဗ္ဗံ, ဒဋ္ဌဗ္ဗံ, ပတ္တဗ္ဗန္တိ အတ္ထော။
107. Chaṭṭhe yatthāti cakkavāḷalokassa ekokāse bhummaṃ. Na cavati na upapajjatīti idaṃ aparāparaṃ cutipaṭisandhivasena gahitaṃ. Gamanenāti padagamanena. Nāhaṃ taṃ lokassa antanti satthā saṅkhāralokassa antaṃ sandhāya vadati. Ñāteyyantiādīsu ñātabbaṃ, daṭṭhabbaṃ, pattabbanti attho.
ဣတိ ဒေဝပုတ္တေန စက္ကဝာဠလောကသ္သ အန္တော ပုစ္ဆိတော, သတ္ထာရာ သင္ခာရလောကသ္သ ကထိတော။ သော ပန အတ္တနော ပဉ္ဟေန သဒ္ဓိံ သတ္ထု ဗ္ယာကရဏံ သမေတီတိ သညာယ ပသံသန္တော အစ္ဆရိယန္တိအာဒိမာဟ။
Iti devaputtena cakkavāḷalokassa anto pucchito, satthārā saṅkhāralokassa kathito. So pana attano pañhena saddhiṃ satthu byākaraṇaṃ sametīti saññāya pasaṃsanto acchariyantiādimāha.
ဒဠ္ဟဓမ္မောတိ ဒဠ္ဟဓနု, ဥတ္တမပ္ပမာဏေန ဓနုနာ သမန္နာဂတော။ ဓနုဂ္ဂဟောတိ ဓနုအာစရိယော။ သုသိက္ခိတောတိ ဒသ ဒ္ဝာဒသ ဝသ္သာနိ ဓနုသိပ္ပံ သိက္ခိတော။ ကတဟတ္ထောတိ ဥသဘပ္ပမာဏေပိ ဝာလဂ္ဂံ ဝိဇ္ဈိတုံ သမတ္ထဘာဝေန ကတဟတ္ထော။ ကတူပာသနောတိ ကတသရက္ခေပော ဒသ္သိတသိပ္ပော။ အသနေနာတိ ကဏ္ဍေန။ အတိပာတေယ္ယာတိ အတိက္ကမေယ္ယ။ ယာဝတာ သော တာလစ္ဆာယံ အတိက္ကမေယ္ယ, တာဝတာ ကာလေန ဧကစက္ကဝာဠံ အတိက္ကမာမီတိ အတ္တနော ဇဝသမ္ပတ္တိံ ဒသ္သေတိ။
Daḷhadhammoti daḷhadhanu, uttamappamāṇena dhanunā samannāgato. Dhanuggahoti dhanuācariyo. Susikkhitoti dasa dvādasa vassāni dhanusippaṃ sikkhito. Katahatthoti usabhappamāṇepi vālaggaṃ vijjhituṃ samatthabhāvena katahattho. Katūpāsanoti katasarakkhepo dassitasippo. Asanenāti kaṇḍena. Atipāteyyāti atikkameyya. Yāvatā so tālacchāyaṃ atikkameyya, tāvatā kālena ekacakkavāḷaṃ atikkamāmīti attano javasampattiṃ dasseti.
ပုရတ္ထိမာ သမုဒ္ဒာ ပစ္ဆိမောတိ ယထာ ပုရတ္ထိမသမုဒ္ဒာ ပစ္ဆိမသမုဒ္ဒော ဒူရေ, ဧဝံ မေ ဒူရေ ပဒဝီတိဟာရော အဟောသီတိ ဝဒတိ။ သော ကိရ ပာစီနစက္ကဝာဠမုခဝဋ္ဋိယံ ဌိတော ပာဒံ ပသာရေတ္ဝာ ပစ္ဆိမစက္ကဝာဠမုခဝဋ္ဋိယံ အက္ကမတိ, ပုန ဒုတိယံ ပာဒံ ပသာရေတ္ဝာ ပရစက္ကဝာဠမုခဝဋ္ဋိယံ အက္ကမတိ။ ဣစ္ဆာဂတန္တိ ဣစ္ဆာ ဧဝ။ အညတ္ရေဝာတိ နိပ္ပပဉ္စတံ ဒသ္သေတိ။ ဘိက္ခာစာရကာလေ ကိရေသ နာဂလတာဒန္တကဋ္ဌံ ခာဒိတ္ဝာ အနောတတ္တေ မုခံ ဓောဝိတ္ဝာ ကာလေ သမ္ပတ္တေ ဥတ္တရကုရုမ္ဟိ ပိဏ္ဍာယ စရိတ္ဝာ စက္ကဝာဠမုခဝဋ္ဋိယံ နိသိန္နော ဘတ္တကိစ္စံ ကရောတိ, တတ္ထ မုဟုတ္တံ ဝိသ္သမိတ္ဝာ ပုန ဇဝတိ။ ဝသ္သသတာယုကောတိ တဒာ ဒီဃာယုကကာလော ဟောတိ, အယံ ပန ဝသ္သသတာဝသိဋ္ဌေ အာယုမ္ဟိ ဂမနံ အာရဘိ။ ဝသ္သသတဇီဝီတိ တံ ဝသ္သသတံ အနန္တရာယေန ဇီဝန္တော။ အန္တရာဝ ကာလင္ကတောတိ စက္ကဝာဠလောကသ္သ အန္တံ အပ္ပတ္ဝာ အန္တရာဝ မတော။ သော ပန တတ္ထ ကာလံ ကတ္ဝာပိ အာဂန္တ္ဝာ ဣမသ္မိံယေဝ စက္ကဝာဠေ နိဗ္ဗတ္တိ။ အပ္ပတ္ဝာတိ သင္ခာရလောကသ္သ အန္တံ အပ္ပတ္ဝာ။ ဒုက္ခသ္သာတိ ဝဋ္ဋဒုက္ခသ္သ။ အန္တကိရိယန္တိ ပရိယန္တကရဏံ။ ကဠေဝရေတိ အတ္တဘာဝေ။ သသညိမ္ဟိ သမနကေတိ သသညေ သစိတ္တေ။ လောကန္တိ ဒုက္ခသစ္စံ။ လောကသမုဒယန္တိ သမုဒယသစ္စံ။ လောကနိရောဓန္တိ နိရောဓသစ္စံ။ ပဋိပဒန္တိ မဂ္ဂသစ္စံ။ ဣတိ – ‘‘နာဟံ, အာဝုသော, ဣမာနိ စတ္တာရိ သစ္စာနိ တိဏကဋ္ဌာဒီသု ပညပေမိ , ဣမသ္မိံ ပန စာတုမဟာဘူတိကေ ကာယသ္မိံ ယေဝ ပညပေမီ’’တိ ဒသ္သေတိ။ သမိတာဝီတိ သမိတပာပော။ နာသီသတီတိ န ပတ္ထေတိ။ ဆဋ္ဌံ။
Puratthimā samuddā pacchimoti yathā puratthimasamuddā pacchimasamuddo dūre, evaṃ me dūre padavītihāro ahosīti vadati. So kira pācīnacakkavāḷamukhavaṭṭiyaṃ ṭhito pādaṃ pasāretvā pacchimacakkavāḷamukhavaṭṭiyaṃ akkamati, puna dutiyaṃ pādaṃ pasāretvā paracakkavāḷamukhavaṭṭiyaṃ akkamati. Icchāgatanti icchā eva. Aññatrevāti nippapañcataṃ dasseti. Bhikkhācārakāle kiresa nāgalatādantakaṭṭhaṃ khāditvā anotatte mukhaṃ dhovitvā kāle sampatte uttarakurumhi piṇḍāya caritvā cakkavāḷamukhavaṭṭiyaṃ nisinno bhattakiccaṃ karoti, tattha muhuttaṃ vissamitvā puna javati. Vassasatāyukoti tadā dīghāyukakālo hoti, ayaṃ pana vassasatāvasiṭṭhe āyumhi gamanaṃ ārabhi. Vassasatajīvīti taṃ vassasataṃ anantarāyena jīvanto. Antarāva kālaṅkatoti cakkavāḷalokassa antaṃ appatvā antarāva mato. So pana tattha kālaṃ katvāpi āgantvā imasmiṃyeva cakkavāḷe nibbatti. Appatvāti saṅkhāralokassa antaṃ appatvā. Dukkhassāti vaṭṭadukkhassa. Antakiriyanti pariyantakaraṇaṃ. Kaḷevareti attabhāve. Sasaññimhi samanaketi sasaññe sacitte. Lokanti dukkhasaccaṃ. Lokasamudayanti samudayasaccaṃ. Lokanirodhanti nirodhasaccaṃ. Paṭipadanti maggasaccaṃ. Iti – ‘‘nāhaṃ, āvuso, imāni cattāri saccāni tiṇakaṭṭhādīsu paññapemi , imasmiṃ pana cātumahābhūtike kāyasmiṃ yeva paññapemī’’ti dasseti. Samitāvīti samitapāpo. Nāsīsatīti na pattheti. Chaṭṭhaṃ.
၁၀၈-၁၀၉. သတ္တမဋ္ဌမာနိ ဝုတ္တတ္ထာနေဝ။ သတ္တမံ, အဋ္ဌမံ။
108-109. Sattamaṭṭhamāni vuttatthāneva. Sattamaṃ, aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၆. ရောဟိတသ္သသုတ္တံ • 6. Rohitassasuttaṃ
၇. နန္ဒသုတ္တံ • 7. Nandasuttaṃ
၈. နန္ဒိဝိသာလသုတ္တံ • 8. Nandivisālasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā)
၆. ရောဟိတသ္သသုတ္တဝဏ္ဏနာ • 6. Rohitassasuttavaṇṇanā
၇-၈. နန္ဒသုတ္တနန္ဒိဝိသာလသုတ္တဝဏ္ဏနာ • 7-8. Nandasuttanandivisālasuttavaṇṇanā
