| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
ហត្ថិមំសាទិបដិក្ខេបកថា
Hatthimaṃsādipaṭikkhepakathā
២៨១. សុនខមំសន្តិ ឯត្ថ អរញ្ញកោកា នាម សុនខសទិសា ហោន្តិ, តេសំ មំសំ វដ្ដតិ។ យោ បន គាមសុនខិយា វា កោកេន កោកសុនខិយា វា គាមសុនខេន សំយោគា ឧប្បន្នោ, តស្ស មំសំ ន វដ្ដតិ, សោ ហិ ឧភយំ ភជតីតិ។ អហិមំសន្តិ កស្សចិ អបាទកស្ស ទីឃជាតិកស្ស មំសំ ន វដ្ដតិ។ សីហមំសាទីនិ បាកដានេវ។
281.Sunakhamaṃsanti ettha araññakokā nāma sunakhasadisā honti, tesaṃ maṃsaṃ vaṭṭati. Yo pana gāmasunakhiyā vā kokena kokasunakhiyā vā gāmasunakhena saṃyogā uppanno, tassa maṃsaṃ na vaṭṭati, so hi ubhayaṃ bhajatīti. Ahimaṃsanti kassaci apādakassa dīghajātikassa maṃsaṃ na vaṭṭati. Sīhamaṃsādīni pākaṭāneva.
ឯត្ថ ច មនុស្សមំសំ សជាតិតាយ បដិក្ខិត្តំ, ហត្ថិអស្សមំសំ រាជង្គតាយ, សុនខមំសញ្ច អហិមំសញ្ច បដិកូលតាយ, សីហមំសាទីនិ បញ្ច អត្តនោ អនុបទ្ទវត្ថាយាតិ។ ឥមេសំ មនុស្សាទីនំ ទសន្នំ មំសម្បិ អដ្ឋិបិ លោហិតម្បិ ចម្មម្បិ លោមម្បិ សព្ពំ ន វដ្ដតិ, យំកិញ្ចិ ញត្វា វា អញត្វា វា ខាទន្តស្ស អាបត្តិយេវ។ យទា ជានាតិ, តទា ទេសេតព្ពា។ ‘‘អបុច្ឆិត្វា ខាទិស្សាមី’’តិ គណ្ហតោ បដិគ្គហណេ ទុក្កដំ, ‘‘បុច្ឆិត្វា ខាទិស្សាមី’’តិ គណ្ហតោ អនាបត្តិ។ ឧទ្ទិស្ស កតំ បន ជានិត្វា ខាទន្តស្សេវ អាបត្តិ, បច្ឆា ជានន្តោ អាបត្តិយា ន ការេតព្ពោតិ។
Ettha ca manussamaṃsaṃ sajātitāya paṭikkhittaṃ, hatthiassamaṃsaṃ rājaṅgatāya, sunakhamaṃsañca ahimaṃsañca paṭikūlatāya, sīhamaṃsādīni pañca attano anupaddavatthāyāti. Imesaṃ manussādīnaṃ dasannaṃ maṃsampi aṭṭhipi lohitampi cammampi lomampi sabbaṃ na vaṭṭati, yaṃkiñci ñatvā vā añatvā vā khādantassa āpattiyeva. Yadā jānāti, tadā desetabbā. ‘‘Apucchitvā khādissāmī’’ti gaṇhato paṭiggahaṇe dukkaṭaṃ, ‘‘pucchitvā khādissāmī’’ti gaṇhato anāpatti. Uddissa kataṃ pana jānitvā khādantasseva āpatti, pacchā jānanto āpattiyā na kāretabboti.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៦៩. ហត្ថិមំសាទិបដិក្ខេបកថា • 169. Hatthimaṃsādipaṭikkhepakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ហត្ថិមំសាទិបដិក្ខេបកថាវណ្ណនា • Hatthimaṃsādipaṭikkhepakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១៦៩. ហត្ថិមំសាទិបដិក្ខេបកថា • 169. Hatthimaṃsādipaṭikkhepakathā
