| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៣. ទុដ្ឋុល្លវាចាសិក្ខាបទវណ្ណនា
3. Duṭṭhullavācāsikkhāpadavaṇṇanā
២៨៥. តតិយេ អសទ្ធម្មបដិសញ្ញុត្តន្តិ មេថុនធម្មបដិសំយុត្តំ។ ពាលាតិ សុភាសិតទុព្ភាសិតំ អជានន្តី , សុរាមទមត្តតាយ ឧម្មត្តកាទិភាវេន ច អជានន្តីបិ ឯត្ថេវ សង្គយ្ហតិ។ ន តាវ សីសំ ឯតីតិ សង្ឃាទិសេសបច្ចយត្តសង្ខាតំ មត្ថកំ បារិបូរិ ន ហោតិ, មគ្គមេថុនេហិ អឃដិតត្តា ទុក្កដំ បន ហោតិ ឯវ។
285. Tatiye asaddhammapaṭisaññuttanti methunadhammapaṭisaṃyuttaṃ. Bālāti subhāsitadubbhāsitaṃ ajānantī , surāmadamattatāya ummattakādibhāvena ca ajānantīpi ettheva saṅgayhati. Na tāva sīsaṃ etīti saṅghādisesapaccayattasaṅkhātaṃ matthakaṃ pāripūri na hoti, maggamethunehi aghaṭitattā dukkaṭaṃ pana hoti eva.
អបសាទេតីតិ អបសាទករវចនំ ករោតិ។ ទោសំ ទេតីតិ ទោសំ បតិដ្ឋាបេតិ។ តីហីតិ អនិមិត្តាសីតិអាទីនំ បទានំ អទុដ្ឋុល្លភាវេនាបិ អត្ថយោជនារហត្តា បស្សាវមគ្គាទិបដិសញ្ញុត្តតានិយមោ នត្ថីតិ វុត្តំ, តេហិ បន អដ្ឋហិ បទេហិ បរិព្ពាជិកាវត្ថុស្មិំ (បារា. ២៨៩) វិយ ថុល្លច្ចយន្តិ វេទិតព្ពំ។
Apasādetīti apasādakaravacanaṃ karoti. Dosaṃ detīti dosaṃ patiṭṭhāpeti. Tīhīti animittāsītiādīnaṃ padānaṃ aduṭṭhullabhāvenāpi atthayojanārahattā passāvamaggādipaṭisaññuttatāniyamo natthīti vuttaṃ, tehi pana aṭṭhahi padehi paribbājikāvatthusmiṃ (pārā. 289) viya thullaccayanti veditabbaṃ.
កុញ្ចិកបនាឡិមត្តន្តិ កុញ្ចិកាឆិទ្ទមត្តំ។ សុក្ខសោតាតិ ទកសោតស្ស សុក្ខតាយ លោហិតវណ្ណវិគមោ ហោតីតិ វុត្តំ។
Kuñcikapanāḷimattanti kuñcikāchiddamattaṃ. Sukkhasotāti dakasotassa sukkhatāya lohitavaṇṇavigamo hotīti vuttaṃ.
សុទ្ធានីតិ មេថុនាទិបទេហិ អយោជិតានិបិ។ មេថុនធម្មេន ឃដិតានេវាតិ ឥទំ ឧបលក្ខណមត្តំ, វច្ចមគ្គបស្សាវមគ្គេហិបិ អនិមិត្តេ ‘‘តវ វច្ចមគ្គោ, បស្សាវមគ្គោ វា ឦទិសោ’’តិអាទិនា ឃដិតេបិ អាបត្តិករានេវ។
Suddhānīti methunādipadehi ayojitānipi. Methunadhammena ghaṭitānevāti idaṃ upalakkhaṇamattaṃ, vaccamaggapassāvamaggehipi animitte ‘‘tava vaccamaggo, passāvamaggo vā īdiso’’tiādinā ghaṭitepi āpattikarāneva.
២៨៦. គរុកាបត្តិន្តិ ភិក្ខុនិយា ឧព្ភជាណុមណ្ឌលិកាយ បារាជិកាបត្តិំ សន្ធាយ វទតិ។
286.Garukāpattinti bhikkhuniyā ubbhajāṇumaṇḍalikāya pārājikāpattiṃ sandhāya vadati.
២៨៧. ហសន្តោ ហសន្តោតិ ឧបលក្ខណមត្តំ, អហសន្តោបិ យេន កេនចិ អាការេន អត្តនោ វិបរិណតចិត្តតំ ឥត្ថិយា បកាសេន្តោ វទតិ, អាបត្តិយេវ។
287.Hasanto hasantoti upalakkhaṇamattaṃ, ahasantopi yena kenaci ākārena attano vipariṇatacittataṃ itthiyā pakāsento vadati, āpattiyeva.
កាយចិត្តតោតិ ហត្ថមុទ្ទាយ ឱភាសេន្តស្ស កាយចិត្តតោ សមុដ្ឋាតិ។
Kāyacittatoti hatthamuddāya obhāsentassa kāyacittato samuṭṭhāti.
២៨៨. តស្មា ទុក្កដន្តិ អប្បដិវិជាននតោ ទុក្កដំ, បដិវិជាននេ បន សតិ ថុល្លច្ចយមេវ បរិព្ពាជិកាវត្ថុស្មិំ (បារា. ២៨៩) វិយ អខេត្តបទត្តា។ ខេត្តបទេ ហិ បដិវិជានន្តិយា សង្ឃាទិសេសោវ សិយា មេថុនធម្មយាចនវត្ថុទ្វយេ (បារា. ២៨៩) វិយ, តំ បន វត្ថុទ្វយំ មេថុនយាចនតោ ចតុត្ថសង្ឃាទិសេសេ វត្តព្ពម្បិ ទុដ្ឋុល្លវាចស្សាទមត្តេន បវត្តត្តា ឥធ វុត្តន្តិ វេទិតព្ពំ។ ឯវំ ខេត្តបទេន វទន្តស្ស ឥត្ថិយា អប្បដិវិជានន្តិយា កិំ ហោតីតិ? កិញ្ចាបិ អយំ នាម អាបត្តីតិ បាឡិអដ្ឋកថាសុ ន វុត្តំ, អថ ខោ ថុល្លច្ចយេនេវេត្ថ ភវិតព្ពំ ។ តថា ហិ អខេត្តបទេ អប្បដិវិជានន្តិយា ទុក្កដំ, បដិវិជានន្តិយា ថុល្លច្ចយំ វុត្តំ។ ខេត្តបទេ បន បដិវិជាននេ សង្ឃាទិសេសោវ វុត្តោ, អប្បដិវិជាននេ ថុល្លច្ចយមេវ ភវិតុំ យុត្តំ, ន ទុក្កដំ, អខេត្តបទតោ វិសេសាភាវប្បសង្គោតិ គហេតព្ពំ។ យថា ចេត្ថ, ឯវំ ចតុត្ថសិក្ខាបទេបិ អខេត្តបទេ បដិវិជានន្តិយា ថុល្លច្ចយំ, អប្បដិវិជានន្តិយា ទុក្កដំ, ខេត្តបទេ បន អប្បដិវិជានន្តិយា ថុល្លច្ចយន្តិ វេទិតព្ពំ។ បាឡិយំ នវាវុតន្តិ នវវីតំ។
288.Tasmā dukkaṭanti appaṭivijānanato dukkaṭaṃ, paṭivijānane pana sati thullaccayameva paribbājikāvatthusmiṃ (pārā. 289) viya akhettapadattā. Khettapade hi paṭivijānantiyā saṅghādisesova siyā methunadhammayācanavatthudvaye (pārā. 289) viya, taṃ pana vatthudvayaṃ methunayācanato catutthasaṅghādisese vattabbampi duṭṭhullavācassādamattena pavattattā idha vuttanti veditabbaṃ. Evaṃ khettapadena vadantassa itthiyā appaṭivijānantiyā kiṃ hotīti? Kiñcāpi ayaṃ nāma āpattīti pāḷiaṭṭhakathāsu na vuttaṃ, atha kho thullaccayenevettha bhavitabbaṃ . Tathā hi akhettapade appaṭivijānantiyā dukkaṭaṃ, paṭivijānantiyā thullaccayaṃ vuttaṃ. Khettapade pana paṭivijānane saṅghādisesova vutto, appaṭivijānane thullaccayameva bhavituṃ yuttaṃ, na dukkaṭaṃ, akhettapadato visesābhāvappasaṅgoti gahetabbaṃ. Yathā cettha, evaṃ catutthasikkhāpadepi akhettapade paṭivijānantiyā thullaccayaṃ, appaṭivijānantiyā dukkaṭaṃ, khettapade pana appaṭivijānantiyā thullaccayanti veditabbaṃ. Pāḷiyaṃ navāvutanti navavītaṃ.
២៨៨. អសទ្ធម្មំ សន្ធាយាតិ មេថុនំ សន្ធាយ វុត្តំ។ តញ្ហិ បុត្តសមុប្បត្តិយា ពីជនិក្ខេបតោ វប្បបរិយាយំ លភតីតិ។
288.Asaddhammaṃ sandhāyāti methunaṃ sandhāya vuttaṃ. Tañhi puttasamuppattiyā bījanikkhepato vappapariyāyaṃ labhatīti.
សំសីទតីតិ វហតិ, សំសរីយតីតិ វា អត្ថោ។ មនុស្សិត្ថី, តថាសញ្ញិតា, ទុដ្ឋុល្លវាចស្សាទរាគោ, តេន ឱភាសនំ, តង្ខណវិជាននន្តិ ឥមានេត្ថ បញ្ច អង្គានិ។
Saṃsīdatīti vahati, saṃsarīyatīti vā attho. Manussitthī, tathāsaññitā, duṭṭhullavācassādarāgo, tena obhāsanaṃ, taṅkhaṇavijānananti imānettha pañca aṅgāni.
ទុដ្ឋុល្លវាចាសិក្ខាបទវណ្ណនា និដ្ឋិតា។
Duṭṭhullavācāsikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ទុដ្ឋុល្លវាចាសិក្ខាបទំ • 3. Duṭṭhullavācāsikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៣. ទុដ្ឋុល្លវាចាសិក្ខាបទវណ្ណនា • 3. Duṭṭhullavācāsikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៣. ទុដ្ឋុល្លវាចាសិក្ខាបទវណ្ណនា • 3. Duṭṭhullavācāsikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បទភាជនីយវណ្ណនា • Padabhājanīyavaṇṇanā
