| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៦. ចីវរសិព្ពាបនសិក្ខាបទវណ្ណនា
6. Cīvarasibbāpanasikkhāpadavaṇṇanā
១៧៥. ឆដ្ឋេ សចេ សា ភិក្ខុនី តំ ចីវរំ អាទិតោវ បារុបេយ្យ, អញ្ញា ភិក្ខុនិយោ ទិស្វា ឧជ្ឈាបេយ្យុំ, តតោ មហាជនោ បស្សិតុំ ន លភតីតិ មញ្ញមានោ ‘‘យថាសំហដំ ហរិត្វា និក្ខិបិត្វា’’តិអាទិមាហ។
175. Chaṭṭhe sace sā bhikkhunī taṃ cīvaraṃ āditova pārupeyya, aññā bhikkhuniyo disvā ujjhāpeyyuṃ, tato mahājano passituṃ na labhatīti maññamāno ‘‘yathāsaṃhaṭaṃ haritvā nikkhipitvā’’tiādimāha.
១៧៦. នីហរតីតិ សកិំ នីហរតិ។ យេបិ តេសំ និស្សិតកាតិ សម្ពន្ធោ។ កថិនវត្តន្តិ ‘‘សព្រហ្មចារីនំ កាតុំ វដ្ដតី’’តិ ឥតិកត្តព្ពតាវសេន សូចិកម្មករណំ។ អាចរិយុបជ្ឈាយានំ ទុក្កដន្តិ អកប្បិយសមាទានវសេន ទុក្កដំ។ វញ្ចេត្វាតិ ‘‘តវ ញាតិកាយា’’តិ អវត្វា ‘‘ឯកិស្សា ភិក្ខុនិយា’’តិ ឯត្តកមេវ វត្វា។ ‘‘ឯកិស្សា ភិក្ខុនិយា’’តិ សុត្វា តេ អញ្ញាតិកសញ្ញិនោ ភវេយ្យុន្តិ អាហ ‘‘អកប្បិយេ និយោជិតត្តា’’តិ ។ ‘‘ឥទំ តេ មាតុ ចីវរ’’ន្តិអាទីនិ អវត្វាបិ ‘‘ឥទំ ចីវរំ សិព្ពេហី’’តិ សុទ្ធចិត្តេន សិព្ពាបេន្តស្សបិ អនាបត្តិ។
176.Nīharatīti sakiṃ nīharati. Yepi tesaṃ nissitakāti sambandho. Kathinavattanti ‘‘sabrahmacārīnaṃ kātuṃ vaṭṭatī’’ti itikattabbatāvasena sūcikammakaraṇaṃ. Ācariyupajjhāyānaṃ dukkaṭanti akappiyasamādānavasena dukkaṭaṃ. Vañcetvāti ‘‘tava ñātikāyā’’ti avatvā ‘‘ekissā bhikkhuniyā’’ti ettakameva vatvā. ‘‘Ekissā bhikkhuniyā’’ti sutvā te aññātikasaññino bhaveyyunti āha ‘‘akappiye niyojitattā’’ti . ‘‘Idaṃ te mātu cīvara’’ntiādīni avatvāpi ‘‘idaṃ cīvaraṃ sibbehī’’ti suddhacittena sibbāpentassapi anāpatti.
១៧៩. ឧបាហនត្ថវិកាទិន្តិ អាទិ-សទ្ទេន យំ ចីវរំ និវាសេតុំ វា បារុបិតុំ វា ន សក្កា ហោតិ, តម្បិ សង្គណ្ហាតិ។ សេសមេត្ថ ឧត្តានមេវ។ អញ្ញាតិកាយ ភិក្ខុនិយា សន្តកតា, និវាសនបារុបនូបគតា, វុត្តនយេន សិព្ពនំ វា សិព្ពាបនំ វាតិ ឥមានិ បនេត្ថ តីណិ អង្គានិ។
179.Upāhanatthavikādinti ādi-saddena yaṃ cīvaraṃ nivāsetuṃ vā pārupituṃ vā na sakkā hoti, tampi saṅgaṇhāti. Sesamettha uttānameva. Aññātikāya bhikkhuniyā santakatā, nivāsanapārupanūpagatā, vuttanayena sibbanaṃ vā sibbāpanaṃ vāti imāni panettha tīṇi aṅgāni.
ចីវរសិព្ពាបនសិក្ខាបទវណ្ណនា និដ្ឋិតា។
Cīvarasibbāpanasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ឱវាទវគ្គោ • 3. Ovādavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៦. ចីវរសិព្ពនសិក្ខាបទវណ្ណនា • 6. Cīvarasibbanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. ចីវរសិព្ពនសិក្ខាបទវណ្ណនា • 6. Cīvarasibbanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ចីវរសិព្ពនសិក្ខាបទវណ្ណនា • 6. Cīvarasibbanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. ចីវរសិព្ពនសិក្ខាបទំ • 6. Cīvarasibbanasikkhāpadaṃ
