| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៦. ចីវរសិព្ពនសិក្ខាបទវណ្ណនា
6. Cīvarasibbanasikkhāpadavaṇṇanā
១៧៥. ឆដ្ឋសិក្ខាបទេ – ឧទាយីតិ លាឡុទាយី។ បដ្ឋោតិ បដិពលោ, និបុណោ ចេវ សមត្ថោ ចាតិ វុត្តំ ហោតិ។ អញ្ញតរា ភិក្ខុនីតិ តស្សេវ បុរាណទុតិយិកា។ បដិភានចិត្តន្តិ អត្តនោ បដិភានេន កតចិត្តំ, សោ កិរ ចីវរំ រជិត្វា តស្ស មជ្ឈេ នានាវណ្ណេហិ វិប្បកតមេថុនំ ឥត្ថិបុរិសរូបមកាសិ។ តេន វុត្តំ – ‘‘មជ្ឈេ បដិភានចិត្តំ វុដ្ឋាបេត្វា’’តិ។ យថាសំហដន្តិ យថាសំហរិតមេវ។
175. Chaṭṭhasikkhāpade – udāyīti lāḷudāyī. Paṭṭhoti paṭibalo, nipuṇo ceva samattho cāti vuttaṃ hoti. Aññatarā bhikkhunīti tasseva purāṇadutiyikā. Paṭibhānacittanti attano paṭibhānena katacittaṃ, so kira cīvaraṃ rajitvā tassa majjhe nānāvaṇṇehi vippakatamethunaṃ itthipurisarūpamakāsi. Tena vuttaṃ – ‘‘majjhe paṭibhānacittaṃ vuṭṭhāpetvā’’ti. Yathāsaṃhaṭanti yathāsaṃharitameva.
១៧៦. ចីវរន្តិ យំ និវាសិតុំ វា បារុបិតុំ វា សក្កា ហោតិ, ឯវញ្ហិ មហាបច្ចរិយាទីសុ វុត្តំ។ សយំ សិព្ពតីតិ ឯត្ថ សិព្ពិស្សាមីតិ វិចារេន្តស្សាបិ ឆិន្ទន្តស្សាបិ ទុក្កដំ, សិព្ពន្តស្ស បន បាចិត្តិយំ។ អារាបថេ អារាបថេតិ សូចិំ បវេសេត្វា បវេសេត្វា នីហរណេ។ សចេ បន សកលសូចិំ អនីហរន្តោ ទីឃសុត្តប្បវេសនត្ថំ សតក្ខត្តុម្បិ វិជ្ឈិត្វា នីហរតិ, ឯកមេវ បាចិត្តិយំ។ សកិំ អាណត្តោតិ សកិំ ‘‘ចីវរំ សិព្ពា’’តិ វុត្តោ។ ពហុកម្បិ សិព្ពតីតិ សចេបិ សព្ពំ សូចិកម្មំ បរិយោសាបេត្វា ចីវរំ និដ្ឋាបេតិ, ឯកមេវ បាចិត្តិយំ។ អថ បន ‘‘ឥមស្មិំ ចីវរេ កត្តព្ពកម្មំ តវ ភារោ’’តិ វុត្តោ ករោតិ, អាណត្តស្ស អារាបថេ អារាបថេ ឯកមេកំ បាចិត្តិយំ, អាណាបកស្ស ឯកវាចាយ សម្ពហុលានិបិ។ បុនប្បុនំ អាណត្តិយំ បន វត្តព្ពមេវ នត្ថិ។
176.Cīvaranti yaṃ nivāsituṃ vā pārupituṃ vā sakkā hoti, evañhi mahāpaccariyādīsu vuttaṃ. Sayaṃ sibbatīti ettha sibbissāmīti vicārentassāpi chindantassāpi dukkaṭaṃ, sibbantassa pana pācittiyaṃ. Ārāpathe ārāpatheti sūciṃ pavesetvā pavesetvā nīharaṇe. Sace pana sakalasūciṃ anīharanto dīghasuttappavesanatthaṃ satakkhattumpi vijjhitvā nīharati, ekameva pācittiyaṃ. Sakiṃ āṇattoti sakiṃ ‘‘cīvaraṃ sibbā’’ti vutto. Bahukampi sibbatīti sacepi sabbaṃ sūcikammaṃ pariyosāpetvā cīvaraṃ niṭṭhāpeti, ekameva pācittiyaṃ. Atha pana ‘‘imasmiṃ cīvare kattabbakammaṃ tava bhāro’’ti vutto karoti, āṇattassa ārāpathe ārāpathe ekamekaṃ pācittiyaṃ, āṇāpakassa ekavācāya sambahulānipi. Punappunaṃ āṇattiyaṃ pana vattabbameva natthi.
យេបិ សចេ អាចរិយុបជ្ឈាយេសុ អត្តនោ ញាតិកានំ ចីវរំ សិព្ពន្តេសុ តេសំ និស្សិតកា ‘‘អាចរិយុបជ្ឈាយវត្តំ វា កថិនវត្តំ វា ករោមា’’តិ សិព្ពន្តិ, តេសម្បិ អារាបថគណនាយ អាបត្តិយោ។ អាចរិយុបជ្ឈាយា អត្តនោ ញាតិកានំ ចីវរំ អន្តេវាសិកេហិ សិព្ពាបេន្តិ, អាចរិយុបជ្ឈាយានំ ទុក្កដំ, អន្តេវាសិកានំ បាចិត្តិយំ។ អន្តេវាសិកា អត្តនោ ញាតិកានំ អាចរិយុបជ្ឈាយេហិ សិព្ពាបេន្តិ, តត្រាបិ ឯសេវ នយោ។ អន្តេវាសិកានម្បិ អាចរិយុបជ្ឈាយានម្បិ ញាតិកាយ ចីវរំ ហោតិ, អាចរិយុបជ្ឈាយា បន អន្តេវាសិកេ វញ្ចេត្វា សិព្ពាបេន្តិ, ឧភិន្នម្បិ ទុក្កដំ។ កស្មា? អន្តេវាសិកានំ អញ្ញាតិកសញ្ញាយ សិព្ពិតត្តា , ឥតរេសំ អកប្បិយេ និយោជិតត្តា។ តស្មា ‘‘ឥទំ តេ មាតុ ចីវរំ, ឥទំ ភគិនិយា’’តិ អាចិក្ខិត្វា សិព្ពាបេតព្ពំ។
Yepi sace ācariyupajjhāyesu attano ñātikānaṃ cīvaraṃ sibbantesu tesaṃ nissitakā ‘‘ācariyupajjhāyavattaṃ vā kathinavattaṃ vā karomā’’ti sibbanti, tesampi ārāpathagaṇanāya āpattiyo. Ācariyupajjhāyā attano ñātikānaṃ cīvaraṃ antevāsikehi sibbāpenti, ācariyupajjhāyānaṃ dukkaṭaṃ, antevāsikānaṃ pācittiyaṃ. Antevāsikā attano ñātikānaṃ ācariyupajjhāyehi sibbāpenti, tatrāpi eseva nayo. Antevāsikānampi ācariyupajjhāyānampi ñātikāya cīvaraṃ hoti, ācariyupajjhāyā pana antevāsike vañcetvā sibbāpenti, ubhinnampi dukkaṭaṃ. Kasmā? Antevāsikānaṃ aññātikasaññāya sibbitattā , itaresaṃ akappiye niyojitattā. Tasmā ‘‘idaṃ te mātu cīvaraṃ, idaṃ bhaginiyā’’ti ācikkhitvā sibbāpetabbaṃ.
១៧៩. អញ្ញំ បរិក្ខារន្តិ យំកិញ្ចិ ឧបាហនត្ថវិកាទិំ។ សេសំ ឧត្តានមេវ។ ឆសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
179.Aññaṃparikkhāranti yaṃkiñci upāhanatthavikādiṃ. Sesaṃ uttānameva. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ចីវរសិព្ពនសិក្ខាបទំ ឆដ្ឋំ។
Cīvarasibbanasikkhāpadaṃ chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ឱវាទវគ្គោ • 3. Ovādavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. ចីវរសិព្ពាបនសិក្ខាបទវណ្ណនា • 6. Cīvarasibbāpanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. ចីវរសិព្ពនសិក្ខាបទវណ្ណនា • 6. Cīvarasibbanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ចីវរសិព្ពនសិក្ខាបទវណ្ណនា • 6. Cīvarasibbanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. ចីវរសិព្ពនសិក្ខាបទំ • 6. Cīvarasibbanasikkhāpadaṃ
