| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៣៧. ចតុវគ្គករណាទិកថា
237. Catuvaggakaraṇādikathā
៣៨៨. បញ្ច សង្ឃា – ចតុវគ្គោ ភិក្ខុសង្ឃោ បញ្ចវគ្គោ ភិក្ខុសង្ឃោ, ទសវគ្គោ ភិក្ខុសង្ឃោ, វីសតិវគ្គោ ភិក្ខុសង្ឃោ, អតិរេកវីសតិវគ្គោ ភិក្ខុសង្ឃោ។ តត្រ, ភិក្ខវេ, យ្វាយំ ចតុវគ្គោ ភិក្ខុសង្ឃោ, ឋបេត្វា តីណិ កម្មានិ – ឧបសម្បទំ បវារណំ អព្ភានំ, ធម្មេន សមគ្គោ សព្ពកម្មេសុ កម្មប្បត្តោ។ តត្រ, ភិក្ខវេ, យ្វាយំ បញ្ចវគ្គោ ភិក្ខុសង្ឃោ, ឋបេត្វា ទ្វេ កម្មានិ – មជ្ឈិមេសុ ជនបទេសុ ឧបសម្បទំ អព្ភានំ, ធម្មេន សមគ្គោ សព្ពកម្មេសុ កម្មប្បត្តោ។ តត្រ, ភិក្ខវេ, យ្វាយំ ទសវគ្គោ ភិក្ខុសង្ឃោ, ឋបេត្វា ឯកំ កម្មំ – អព្ភានំ, ធម្មេន សមគ្គោ សព្ពកម្មេសុ កម្មប្បត្តោ។ តត្រ, ភិក្ខវេ, យ្វាយំ វីសតិវគ្គោ ភិក្ខុសង្ឃោ ធម្មេន សមគ្គោ សព្ពកម្មេសុ កម្មប្បត្តោ។ តត្រ, ភិក្ខវេ, យ្វាយំ អតិរេកវីសតិវគ្គោ ភិក្ខុសង្ឃោ ធម្មេន សមគ្គោ សព្ពកម្មេសុ កម្មប្បត្តោ។
388. Pañca saṅghā – catuvaggo bhikkhusaṅgho pañcavaggo bhikkhusaṅgho, dasavaggo bhikkhusaṅgho, vīsativaggo bhikkhusaṅgho, atirekavīsativaggo bhikkhusaṅgho. Tatra, bhikkhave, yvāyaṃ catuvaggo bhikkhusaṅgho, ṭhapetvā tīṇi kammāni – upasampadaṃ pavāraṇaṃ abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ pañcavaggo bhikkhusaṅgho, ṭhapetvā dve kammāni – majjhimesu janapadesu upasampadaṃ abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ dasavaggo bhikkhusaṅgho, ṭhapetvā ekaṃ kammaṃ – abbhānaṃ, dhammena samaggo sabbakammesu kammappatto. Tatra, bhikkhave, yvāyaṃ vīsativaggo bhikkhusaṅgho dhammena samaggo sabbakammesu kammappatto. Tatra, bhikkhave, yvāyaṃ atirekavīsativaggo bhikkhusaṅgho dhammena samaggo sabbakammesu kammappatto.
៣៨៩. ចតុវគ្គករណញ្ចេ, ភិក្ខវេ, កម្មំ ភិក្ខុនិចតុត្ថោ កម្មំ ករេយ្យ – អកម្មំ ន ច ករណីយំ។ ចតុវគ្គករណញ្ចេ, ភិក្ខវេ, កម្មំ សិក្ខមានចតុត្ថោ កម្មំ ករេយ្យ… អកម្មំ ន ច ករណីយំ…បេ.…។ សាមណេរចតុត្ថោ កម្មំ ករេយ្យ… អកម្មំ ន ច ករណីយំ។ សាមណេរិចតុត្ថោ កម្មំ ករេយ្យ… អកម្មំ ន ច ករណីយំ។ សិក្ខំ បច្ចក្ខាតកចតុត្ថោ កម្មំ ករេយ្យ… អកម្មំ ន ច ករណីយំ។ អន្តិមវត្ថុំ អជ្ឈាបន្នកចតុត្ថោ កម្មំ ករេយ្យ… អកម្មំ ន ច ករណីយំ។ អាបត្តិយា អទស្សនេ ឧក្ខិត្តកចតុត្ថោ កម្មំ ករេយ្យ… អកម្មំ ន ច ករណីយំ។ អាបត្តិយា អប្បដិកម្មេ ឧក្ខិត្តកចតុត្ថោ កម្មំ ករេយ្យ… អកម្មំ ន ច ករណីយំ។ បាបិកាយ ទិដ្ឋិយា អប្បដិនិស្សគ្គេ ឧក្ខិត្តកចតុត្ថោ កម្មំ ករេយ្យ… អកម្មំ ន ច ករណីយំ។ បណ្ឌកចតុត្ថោ កម្មំ ករេយ្យ… អកម្មំ ន ច ករណីយំ។ ថេយ្យសំវាសកចតុត្ថោ កម្មំ ករេយ្យ… អកម្មំ ន ច ករណីយំ។ តិត្ថិយបក្កន្តកចតុត្ថោ កម្មំ ករេយ្យ… អកម្មំ ន ច ករណីយំ។ តិរច្ឆានគតចតុត្ថោ កម្មំ ករេយ្យ… អកម្មំ ន ច ករណីយំ។ មាតុឃាតកចតុត្ថោ កម្មំ ករេយ្យ… អកម្មំ ន ច ករណីយំ។ បិតុឃាតកចតុត្ថោ កម្មំ ករេយ្យ… អកម្មំ ន ច ករណីយំ។ អរហន្តឃាតកចតុត្ថោ កម្មំ ករេយ្យ… អកម្មំ ន ច ករណីយំ។ ភិក្ខុនិទូសកចតុត្ថោ កម្មំ ករេយ្យ… អកម្មំ ន ច ករណីយំ។ សង្ឃភេទកចតុត្ថោ កម្មំ ករេយ្យ… អកម្មំ ន ច ករណីយំ។ លោហិតុប្បាទកចតុត្ថោ កម្មំ ករេយ្យ… អកម្មំ ន ច ករណីយំ។ ឧភតោព្យញ្ជនកចតុត្ថោ កម្មំ ករេយ្យ… អកម្មំ ន ច ករណីយំ។ នានាសំវាសកចតុត្ថោ កម្មំ ករេយ្យ… អកម្មំ ន ច ករណីយំ។ នានាសីមាយ ឋិតចតុត្ថោ កម្មំ ករេយ្យ… អកម្មំ ន ច ករណីយំ។ ឥទ្ធិយា វេហាសេ ឋិតចតុត្ថោ កម្មំ ករេយ្យ… អកម្មំ ន ច ករណីយំ។ យស្ស សង្ឃោ កម្មំ ករោតិ, តំចតុត្ថោ កម្មំ ករេយ្យ … អកម្មំ ន ច ករណីយំ។
389. Catuvaggakaraṇañce, bhikkhave, kammaṃ bhikkhunicatuttho kammaṃ kareyya – akammaṃ na ca karaṇīyaṃ. Catuvaggakaraṇañce, bhikkhave, kammaṃ sikkhamānacatuttho kammaṃ kareyya… akammaṃ na ca karaṇīyaṃ…pe…. Sāmaṇeracatuttho kammaṃ kareyya… akammaṃ na ca karaṇīyaṃ. Sāmaṇericatuttho kammaṃ kareyya… akammaṃ na ca karaṇīyaṃ. Sikkhaṃ paccakkhātakacatuttho kammaṃ kareyya… akammaṃ na ca karaṇīyaṃ. Antimavatthuṃ ajjhāpannakacatuttho kammaṃ kareyya… akammaṃ na ca karaṇīyaṃ. Āpattiyā adassane ukkhittakacatuttho kammaṃ kareyya… akammaṃ na ca karaṇīyaṃ. Āpattiyā appaṭikamme ukkhittakacatuttho kammaṃ kareyya… akammaṃ na ca karaṇīyaṃ. Pāpikāya diṭṭhiyā appaṭinissagge ukkhittakacatuttho kammaṃ kareyya… akammaṃ na ca karaṇīyaṃ. Paṇḍakacatuttho kammaṃ kareyya… akammaṃ na ca karaṇīyaṃ. Theyyasaṃvāsakacatuttho kammaṃ kareyya… akammaṃ na ca karaṇīyaṃ. Titthiyapakkantakacatuttho kammaṃ kareyya… akammaṃ na ca karaṇīyaṃ. Tiracchānagatacatuttho kammaṃ kareyya… akammaṃ na ca karaṇīyaṃ. Mātughātakacatuttho kammaṃ kareyya… akammaṃ na ca karaṇīyaṃ. Pitughātakacatuttho kammaṃ kareyya… akammaṃ na ca karaṇīyaṃ. Arahantaghātakacatuttho kammaṃ kareyya… akammaṃ na ca karaṇīyaṃ. Bhikkhunidūsakacatuttho kammaṃ kareyya… akammaṃ na ca karaṇīyaṃ. Saṅghabhedakacatuttho kammaṃ kareyya… akammaṃ na ca karaṇīyaṃ. Lohituppādakacatuttho kammaṃ kareyya… akammaṃ na ca karaṇīyaṃ. Ubhatobyañjanakacatuttho kammaṃ kareyya… akammaṃ na ca karaṇīyaṃ. Nānāsaṃvāsakacatuttho kammaṃ kareyya… akammaṃ na ca karaṇīyaṃ. Nānāsīmāya ṭhitacatuttho kammaṃ kareyya… akammaṃ na ca karaṇīyaṃ. Iddhiyā vehāse ṭhitacatuttho kammaṃ kareyya… akammaṃ na ca karaṇīyaṃ. Yassa saṅgho kammaṃ karoti, taṃcatuttho kammaṃ kareyya … akammaṃ na ca karaṇīyaṃ.
ចតុវរណំ។
Catuvaraṇaṃ.
៣៩០. បញ្ចវគ្គករណញ្ចេ, ភិក្ខវេ, កម្មំ ភិក្ខុនិបញ្ចមោ កម្មំ ករេយ្យ… អកម្មំ ន ច ករណីយំ។ បញ្ចវគ្គករណញ្ចេ, ភិក្ខវេ, កម្មំ សិក្ខមានបញ្ចមោ កម្មំ ករេយ្យ…បេ.…។ សាមណេរបញ្ចមោ កម្មំ ករេយ្យ… សាមណេរិបញ្ចមោ កម្មំ ករេយ្យ … សិក្ខំ បច្ចក្ខាតកបញ្ចមោ កម្មំ ករេយ្យ… អន្តិមវត្ថុំ អជ្ឈាបន្នកបញ្ចមោ កម្មំ ករេយ្យ… អាបត្តិយា អទស្សនេ ឧក្ខិត្តកបញ្ចមោ កម្មំ ករេយ្យ… អាបត្តិយា អប្បដិកម្មេ ឧក្ខិត្តកបញ្ចមោ កម្មំ ករេយ្យ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកបញ្ចមោ កម្មំ ករេយ្យ… បណ្ឌកបញ្ចមោ កម្មំ ករេយ្យ… ថេយ្យសំវាសកបញ្ចមោ កម្មំ ករេយ្យ… តិត្ថិយបក្កន្តកបញ្ចមោ កម្មំ ករេយ្យ… តិរច្ឆានគតបញ្ចមោ កម្មំ ករេយ្យ… មាតុឃាតកបញ្ចមោ កម្មំ ករេយ្យ… បិតុឃាតកបញ្ចមោ កម្មំ ករេយ្យ… អរហន្តឃាតកបញ្ចមោ កម្មំ ករេយ្យ… ភិក្ខុនិទូសកបញ្ចមោ កម្មំ ករេយ្យ… សង្ឃភេទកបញ្ចមោ កម្មំ ករេយ្យ… លោហិតុប្បាទកបញ្ចមោ កម្មំ ករេយ្យ… ឧភតោព្យញ្ជនកបញ្ចមោ កម្មំ ករេយ្យ… នានាសំវាសកបញ្ចមោ កម្មំ ករេយ្យ… នានាសីមាយ ឋិតបញ្ចមោ កម្មំ ករេយ្យ… ឥទ្ធិយា វេហាសេ ឋិតបញ្ចមោ កម្មំ ករេយ្យ… យស្ស សង្ឃោ កម្មំ ករោតិ, តំបញ្ចមោ កម្មំ ករេយ្យ – អកម្មំ ន ច ករណីយំ។
390. Pañcavaggakaraṇañce, bhikkhave, kammaṃ bhikkhunipañcamo kammaṃ kareyya… akammaṃ na ca karaṇīyaṃ. Pañcavaggakaraṇañce, bhikkhave, kammaṃ sikkhamānapañcamo kammaṃ kareyya…pe…. Sāmaṇerapañcamo kammaṃ kareyya… sāmaṇeripañcamo kammaṃ kareyya … sikkhaṃ paccakkhātakapañcamo kammaṃ kareyya… antimavatthuṃ ajjhāpannakapañcamo kammaṃ kareyya… āpattiyā adassane ukkhittakapañcamo kammaṃ kareyya… āpattiyā appaṭikamme ukkhittakapañcamo kammaṃ kareyya… pāpikāya diṭṭhiyā appaṭinissagge ukkhittakapañcamo kammaṃ kareyya… paṇḍakapañcamo kammaṃ kareyya… theyyasaṃvāsakapañcamo kammaṃ kareyya… titthiyapakkantakapañcamo kammaṃ kareyya… tiracchānagatapañcamo kammaṃ kareyya… mātughātakapañcamo kammaṃ kareyya… pitughātakapañcamo kammaṃ kareyya… arahantaghātakapañcamo kammaṃ kareyya… bhikkhunidūsakapañcamo kammaṃ kareyya… saṅghabhedakapañcamo kammaṃ kareyya… lohituppādakapañcamo kammaṃ kareyya… ubhatobyañjanakapañcamo kammaṃ kareyya… nānāsaṃvāsakapañcamo kammaṃ kareyya… nānāsīmāya ṭhitapañcamo kammaṃ kareyya… iddhiyā vehāse ṭhitapañcamo kammaṃ kareyya… yassa saṅgho kammaṃ karoti, taṃpañcamo kammaṃ kareyya – akammaṃ na ca karaṇīyaṃ.
បញ្ចវគ្គករណំ។
Pañcavaggakaraṇaṃ.
៣៩១. ទសវគ្គករណញ្ចេ, ភិក្ខវេ, កម្មំ ភិក្ខុនិទសមោ កម្មំ ករេយ្យ, អកម្មំ ន ច ករណីយំ។ ទសវគ្គករណញ្ចេ, ភិក្ខវេ, កម្មំ សិក្ខមានទសមោ កម្មំ ករេយ្យ, អកម្មំ ន ច ករណីយំ…បេ.… ។ ទសវគ្គករណញ្ចេ, ភិក្ខវេ, កម្មំ យស្ស សង្ឃោ កម្មំ ករោតិ, តំទសមោ កម្មំ ករេយ្យ – អកម្មំ ន ច ករណីយំ។
391. Dasavaggakaraṇañce, bhikkhave, kammaṃ bhikkhunidasamo kammaṃ kareyya, akammaṃ na ca karaṇīyaṃ. Dasavaggakaraṇañce, bhikkhave, kammaṃ sikkhamānadasamo kammaṃ kareyya, akammaṃ na ca karaṇīyaṃ…pe… . Dasavaggakaraṇañce, bhikkhave, kammaṃ yassa saṅgho kammaṃ karoti, taṃdasamo kammaṃ kareyya – akammaṃ na ca karaṇīyaṃ.
ទសវគ្គករណំ។
Dasavaggakaraṇaṃ.
៣៩២. វីសតិវគ្គករណញ្ចេ, ភិក្ខវេ, កម្មំ ភិក្ខុនិវីសោ កម្មំ ករេយ្យ – អកម្មំ ន ច ករណីយំ។ វីសតិវគ្គករណញ្ចេ, ភិក្ខវេ, កម្មំ សិក្ខមានវីសោ កម្មំ ករេយ្យ …បេ.… សាមណេរវីសោ កម្មំ ករេយ្យ… សាមណេរិវីសោ កម្មំ ករេយ្យ… សិក្ខំ បច្ចក្ខាតកវីសោ កម្មំ ករេយ្យ… អន្តិមវត្ថុំ អជ្ឈាបន្នកវីសោ កម្មំ ករេយ្យ… អាបត្តិយា អទស្សនេ ឧក្ខិត្តកវីសោ កម្មំ ករេយ្យ… អាបត្តិយា អប្បដិកម្មេ ឧក្ខិត្តកវីសោ កម្មំ ករេយ្យ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកវីសោ កម្មំ ករេយ្យ… បណ្ឌកវីសោ កម្មំ ករេយ្យ… ថេយ្យសំវាសកវីសោ កម្មំ ករេយ្យ… តិត្ថិយបក្កន្តកវីសោ កម្មំ ករេយ្យ… តិរច្ឆានគតវីសោ កម្មំ ករេយ្យ… មាតុឃាតកវីសោ កម្មំ ករេយ្យ… បិតុឃាតកវីសោ កម្មំ ករេយ្យ… អរហន្តឃាតកវីសោ កម្មំ ករេយ្យ… ភិក្ខុនិទូសកវីសោ កម្មំ ករេយ្យ… សង្ឃភេទកវីសោ កម្មំ ករេយ្យ… លោហិតុប្បាទកវីសោ កម្មំ ករេយ្យ… ឧភតោព្យញ្ជនកវីសោ កម្មំ ករេយ្យ… នានាសំវាសកវីសោ កម្មំ ករេយ្យ… នានាសីមាយ ឋិតវីសោ កម្មំ ករេយ្យ… ឥទ្ធិយា វេហាសេ ឋិតវីសោ កម្មំ ករេយ្យ… យស្ស សង្ឃោ កម្មំ ករោតិ, តំវីសោ កម្មំ ករេយ្យ – អកម្មំ ន ច ករណីយំ។
392. Vīsativaggakaraṇañce, bhikkhave, kammaṃ bhikkhunivīso kammaṃ kareyya – akammaṃ na ca karaṇīyaṃ. Vīsativaggakaraṇañce, bhikkhave, kammaṃ sikkhamānavīso kammaṃ kareyya …pe… sāmaṇeravīso kammaṃ kareyya… sāmaṇerivīso kammaṃ kareyya… sikkhaṃ paccakkhātakavīso kammaṃ kareyya… antimavatthuṃ ajjhāpannakavīso kammaṃ kareyya… āpattiyā adassane ukkhittakavīso kammaṃ kareyya… āpattiyā appaṭikamme ukkhittakavīso kammaṃ kareyya… pāpikāya diṭṭhiyā appaṭinissagge ukkhittakavīso kammaṃ kareyya… paṇḍakavīso kammaṃ kareyya… theyyasaṃvāsakavīso kammaṃ kareyya… titthiyapakkantakavīso kammaṃ kareyya… tiracchānagatavīso kammaṃ kareyya… mātughātakavīso kammaṃ kareyya… pitughātakavīso kammaṃ kareyya… arahantaghātakavīso kammaṃ kareyya… bhikkhunidūsakavīso kammaṃ kareyya… saṅghabhedakavīso kammaṃ kareyya… lohituppādakavīso kammaṃ kareyya… ubhatobyañjanakavīso kammaṃ kareyya… nānāsaṃvāsakavīso kammaṃ kareyya… nānāsīmāya ṭhitavīso kammaṃ kareyya… iddhiyā vehāse ṭhitavīso kammaṃ kareyya… yassa saṅgho kammaṃ karoti, taṃvīso kammaṃ kareyya – akammaṃ na ca karaṇīyaṃ.
វីសតិវគ្គករណំ។
Vīsativaggakaraṇaṃ.
ចតុវគ្គករណាទិកថា និដ្ឋិតា។
Catuvaggakaraṇādikathā niṭṭhitā.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ចតុវគ្គករណាទិកថា • Catuvaggakaraṇādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចតុវគ្គករណាទិកថាវណ្ណនា • Catuvaggakaraṇādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / កស្សបគោត្តភិក្ខុវត្ថុកថាទិវណ្ណនា • Kassapagottabhikkhuvatthukathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២៣៧. ចតុវគ្គករណាទិកថា • 237. Catuvaggakaraṇādikathā
